ROM 2

1Kau el chad, koukerrekeriil er a tar a re chad? A cho mtechang, me kau a di diak a omesodem; ele cho moukerrekeriil er ngii, e di mua ingii e ng di kau el oltutakl er kau. 2Kid a medengei el kmo a Dios a melemalt sel loukerrekeriil er a re chad el meruul a choua isel tekoi. 3E ngdi kau el chad a meruul a ikel osisiu el tekoi, el kau a oukerrekeriil er a tar a re chad el kirel! A cho momdasu e ke mochib er a kerrekerilel a Dios? 4Ada ng metetoech a medam er a Dios, ele ngii el kmal chubechubchad, e meoud el omals, e klou a rengul? Ng diak modengei el kmo a Dios a chubechubchad, ele ngii el omeskau a techellem el obult el mo imikr a mekngit? 5Kau, el medecherecher e diak le mesmechokl a rengum el chad, a di kau el menguml er a ngesechel a rengul a Dios el kirem, sel le mei isel Sils el bo lecholt er ngii a ngesechel a rengul ma melemalt el kerrekerilel a Dios. 6Ele Dios a mo omteche sulir a re bek el chad el redemelel a ikel le riruul. 7Me tirkel millemolem el meruul a ungil, e osiik a klebkall, ma odanges, ma diak bo le ngemed el klengar, a le besterir a diak a ulebengelel klengar. 8E tirkel di ngar a ikel ungil er tir e diak loltirakl a klemerang el tekoi, e bai di oltirakl a mekngit, a bo le meringel el omals er tir a Dios. 9Te mo chuarm er a ringel ma chelebuul tirkel rokui el chad el meruul a mekngit, el omuchel er a re chad er a Judea, e dirrek el mor a re Chisentael, 10e ngdi klebkall, ma odanges, ma budech a mor a re bek el chad el meruul a ungil el omuchel er a re chad er a Judea e dirrek el mor a re Chisentael. 11Ele Dios a diak a soal ma chetil el chad. 12A re Chisentael a diak er tir a Llach er a Moses; e a le bor a klengit e te remiid el ngar a ikrel a Llach. A re chad er a Judea a oba Llach; e a le bor a klengit e te mukerrekeriil el okiu a Llach. 13Ele ng diak lorengesel a Llach a rullii a chad el mo melemalt er medal a Dios, ng bai otireklel a Llach. 14A re Chisentael a dimlak le bor tir a Llach el mlar a Moses el mei, e ngdi sel loltirakl er a rengrir el meruul a ikel lolekoi a Llach, e te di tir el llach er tir, e ngdi dimlak le bor tir a Llach. 15A omerellir a ochotii el kmo sel longelechel er ngii a Llach a llechukl er a rengrir. Ma rengrir a dirrek el ochotii el kmo tiang a merang; ele le bebil, e a rengrir a oltutakl er tir, e a le bebil, e ng mesebechakl er tir. 16Ma Ebangkelio el kumerk er ngii a melekoi el kmo ng mo ua ise er isel Sils, sel le bo lokiu a Jesus Kristus a Dios el oukerrekeriil a berrotel el uldesuir a re chad. 17E kau el chad, a lsekum ke kmo, ke chad er a Judea, e ultuil er a Llach, e meruul chisem el kmo ke chedal a Dios, 18e medenge ikel soal a Dios cho moruul, e mla suub er a Llach a rolel omerellel a ungil tekoi, 19e kmal medengei el kmo komesiur er a re meiko, e llemesir tirkel ngar a ilkolk, 20e mesmechokl er a re cheldeng a rengrir, e olisechakl er a re ngalek, e ungil el medengei el kmo a Llach a cho mngai er ngii a klemedengei ma meral tekoi, 21me kolisechakl er a re bebil er a re chad, e ngera me ng diak di le kau el osisecheklau? Kolsisechakl el kmo, “Lak morechorech,” e kau a merechorech? 22Ke kmo, “Lak bor a laokreng,” e kau a ngar a laokreng? Kouketui a bleob el chelid, e meruul a recherchem er a ikel templo el le ngar ngii? 23Ke meruul chisem el kmo kolab a llechul a Dios, e melemall a llechul me ke ngma otuub el mor a Dios? 24A Chedaol Llechukl a kmo, “Ng kemiu el chad er a Judea uchul, e a re Chisentael a melekoi a mekngit el kirel a Dios.” 25A botk a ngar ngii a ultutelel a lsekum koltirakl a Llach, e ngdi lsekum ng diak molrirakl a Llach, e ng mo diak a ultutelel sel botk er kau. 26Ma lsekum a Chisentael, el diak le blotk, a oltirakl a lolekoi a Llach, e a Dios ng diak el bo lomes er ngii el kmo ng ua le blotk? 27Ma le ua isei, e tirkel diak le blotk e ngdi toltirakl a Llach a mo oltutakl er kemiu el blotk el olab a llechukl el Llach e diak moltirakl. 28Ng techa meral chad er a Judea, el ngikel meral blotk? Ng diak el ngikel chad el di Chijudea er a ikrel el blotk a tech er ngii a meral chad er a Judea, 29a meral chad er a Judea a bai ngikel Chijudea er a chelsel, el blotk a rengul, e tia urerel a Reng er a Dios, el dimlak el mei el oeak a Llach. A ua isei el chad a nguu a odanges el mei el ngar a Dios, ng diak el mei el ngar a re chad.

will be added

X\