ROM 16

1Ak ulterkokl er a tar kid er a Febe er kemiu, el mesiungel a Ikelesia er a Senkrea, 2me mochotii el kmo kom chedal a Dios, me mnguu, ele ng chedal a Rubak; e a le ngar ngii a lousbech er ngii er kemiu, e mngesuir, ele ng kmal mle mesaul er a re betok el chad, e dirrek el kmal mle mesaul er ngak. 3Mdu yorosku er ngak er a Prisila ma Akuila el kldemek er omesiungel a Kristus Jesus, 4el dimlak lomekerreu a klengar er tir el kirek, el diak di le ngak a mereng a sulir; a rokui el Ikelesia er a re Chisentael a dirrek el mereng a sulir. 5Mdirrek el dmu yorosku er ngak el mor tirkel chad er a Ikelesia el me kldibel er a blirir. Mdu yorosku er ngak el mor a betik er a renguk el Epenetus, el ngii a mle kot er a renged er a Asia el mo oumera er a Kristus. 6Mdu yorosku er ngak el mor a Maria, el kmal mlo meringel el oureor el kiriu. 7E mdu yorosku er ngak el mor a Andronikus ma Junias, el chad er a Judea el ua ingak, el kim dilak el ngar a kelebus. Ng kmal mle ungil a chisir er a delongelir a re apostol, e uleak uche er ngak el mo chedal a Kristus. 8E mdu yorosku er ngak el mor a Ampliatus, el kmal sechelik el chedal a Kristus. 9E mdu yorosku er ngak el mor a Urbanus, el kim chad er a tal ureor el kirel a Kristus, ma yorosku el mor a betik er a renguk el Stakis. 10Mdu yorosku er ngak el mor a Apeles, el kmal mla mo chemolt el betik a rengul er a Kristus, ma yorosku el mor a re chad er a blil a Aristobulus. 11Mdu yorosku er ngak el mor a Herodion, el chad er a Judea el ua ingak, ma yorosku el mor a re chedal a Kristus el chad er a blil a Narsisus. 12Mdu yorosku er ngak el mor a Trifena ma Trifosa, el oureor el kirel a Rubak, ma yorosku el mor a berik er a renguk el Persis, el kmal mle meringel el oureor el kirel a Rubak. 13Mdu yorosku el mor a Rufus, el kmal ngar uche er omesiungel a Rubak, ma yorosku el mor a delal el ngilikak el mo tar a ngelekel. 14Mdu yorosku el mor a Asinkritus, ma Flekon, ma Hermes, ma Patrobas, ma Hermas, me tirkel chedal a Rubak el obengterir. 15Mdu yorosku el mor a Filolokus, ma Julia, ma Nereus ma ochedal, ma Olimpas, me tirkel rokui el chedal a Dios el obengterir. 16Mkautkeu el oba olechotel a bltikerreng, e a Ikelesia er a Kristus el rokui a mesumech a yorosku er tir el ekor kemiu. 17Ak kmal mengelechel er kemiu e rudam me mkekerengemiu er tirkel meruul a klautok er a delongeliu e oltuchakl er a re chad el mo omtok a ikel osisechakl el bla mngai. Mongeroid er kemiu er tir. 18Ele tirkel ua isel chad a diak losiou er a Rubak er kid el Kristus, e di mechesang el omdasu a kelir. Tousbech a melaok el tekoi e ombebekord a cheldechedecherir el mengeuid a rengrir a re chad el diak lodenge kngtil choua ikal tekoi. 19A re bek el chad a mla mo medenge chisiu el kmo ng kmal mesisiich a rengmiu el oltirakl er a Ebangkelio, me ng kmal dmeu a renguk el kiriu. E ngdi soak a bo le mellomes a rengmiu el kirel a ungil tekoi, e lak bo mchelsechusem er a mekngit. 20Seikid, e a Dios er a budech a di mo mereched el choitechetur a Satan me kom mo mesisiich er ngii. Ma Rubak er kid el Jesus Kristus lolemolem el omekngeltengat er kemiu. 21A Timothy el kimdak el oureor, a mesumech a yorosku er ngii el ekor kemiu; ma Lusius, ma Jason, ma Sosipater, el chad er a Judea el ua ingak, me te dirrek el mesumech a yorosku er tir. 22Me ngak el Tertius, el meluches er tial babier, mak uutkeu er kemiu el oba ngklel a Rubak. 23Ma Gaius, el kkie er a blil ma ikelesia el ousbech er a blil el kirel ongdibel, a mesumech a yorosku er ngii el ekor kemiu. Ma Erastus, el oungerachel a udoudbeluu, ma tar kid er a Kuartus, me te dirrek el mesumech a yorosku er tir el ekor kemiu. 24[A Rubak er kid el Jesus Krisrus lolemolem el omekngeltengat er kemiu. Amen.] 25Bo le modanges a Dios, el sebechel el melisiich er kemiu el okiu a kumerk er ngii el Ebangkelio, el osisechakl el kirel a Jesus Kristus, ma ochotel a mle berrotel el tekoi el dimlak bo lecholt er a kmal irechar, 26e ngdi chelecha e ng mla mo chemolt el okiu a osisecheklir a re profet me te mla mo medengelii a re chad er a bek el beluu, el oltirakl a tekingel a diak a ulebengelel el Dios, me ng mo sebechir a re chad er a bek el beluu el mo oumera er a Dios e orrenges a tekingel. 27Ngii el di tal Dios el mellomes a rengul bo le modanges el mo cherechar el okiu a Jesus Kristus. Amen.

will be added

X\