ROM 15

1Kid el mesisiich el oumerang a kired el olengeseu er tirkel mechitechut, er a ikel metacherbesrir er ngii. Ng diak di de ngar a ikel ungil er kid. 2Ng bai kirel a ta ma tar kid el meruul er a rengul a tar kid el oltirakl er a ungil er ngii, me ng mo mesisiich el oumerang. 3Ele Kristus a dimlak di loruul a ungil er ngii. Ng bai di mlo ua ia ikel lolekoi a Chedaol Llechukl el kmo, “A ikel otuub el lullekoi el kirem a mler ngak.” 4A ikel ngar a Chedaol Llechukl a melluches el olisechakl er kid, me ng mo sebeched el melatk e mengiil el klou a rengud e meduch a rengud el ultuil er a Chedaol Llechukl. 5Ma Dios el uchul a kllourreng ma ducherreng le ngesukemiu el odak a uldesuiu el mesuub a blekerdelel a Kristus Jesus, 6me bo le sebechiu el rokui el mo ta ngeriu el odengesii a Dios el Demal a Rubak er kid el Jesus Kristus. 7Ma le ua isei, e lak mkaiuedik e bai mkangingai el ua ia Kristus el ngilikemiu, me bo luchul e a re chad bo lodengesii a Dios. 8Ele ksubedemiu el kmo a Kristus a mlo mesiungir a re chad er a Judea, el olecholt el kmo a Dios a diak loiit a tekingel, e ngii oltaut a telbilel el mlor a ruchelir el kmo ng merang, 9e dirrek el meruul er a re Chisentael el mo chemat er a Dios er a klechubechub er ngii. Ng di ua lolekoi a Chedaol Llechukl el kmo, “A le ua isei, e ak mo mereng a sulem er a delongelir a re Chisentael, e mo mengitakl el chemat er kau.” 10Ng dirrek el dmu el kmo, “Kemiu el Chisentael, moldeu a rengmiu el obengterir a re chedal a Dios.” 11E dirrek el kmo, “Kemiu el rokui el Chisentael, moldanges er a Dios; moldanges er ngii, kemiu el rokui el chad.” 12Ma ngar a Isaia dmu el kmo, “A chad a me duubech er a kleblillel a Jesse, el mo mekiis el mo mengedereder er a re Chisentael, el ngii a mo uchul e a re Chisentael a mo melatk e mengiil er ngii.” 13Ma Dios, el uchul e kom melatk e mengiil er ngii, le beskemiu a klou el deurreng ma budech, ele kemiu el oumera er ngii, me bo le sebechiu el mesisiich el melatk e mengiil er ngii el ultuil er a klisichel a Chedaol Reng. 14Rudam er ngak, ak kmal ungil el medenge el kmo kemiu a kmal ungil, e kmal medenge tekoi, e sebechiu el kaosisechakl. 15E ngdi ngak a kmal di mle beches el melekoi er kemiu er tial babier a bebil el tekoi el bla kumeklatk er kemiu er ngii. Ak di mle beches el melekoi, ele ngak el le ngileltak a Dios el mo 16mesiungel a Kristus Jesus el kirir a re Chisentael, el prist er ngii el omerk er a Ebangkelio er a Dios, me ng mo sebechir a re Chisentael el modars el ungilbesul er a rengul a Dios, el modars el mor ngii el oeak a Chedaol Reng. 17Ngak el oltirakl er a Kristus a uchul me ng smiich a renguk er omesiungek er a Dios. 18Ele ng diak bo kulekoi a ngodech el tekoi, ng di ikel le riruul a Kristus el ousbech er ngak el mo meruul er a re Chisentael el mo oltirakl er a Dios, el okiu a tekoi me omeruul, 19ma klisichel olangch ma tekoi el chelid, ma klisichel a Chedaol Reng. Mak ulemerk er a Ebangkelio el kirel a Kristus er a Jerusalem el mo lmuut er a Ilirikum el dimlak a mo medechel. 20Ng kmal di mle blechoel el soak el omerk er a Ebangkelio er a ikel beluu el dirkak le morenges er ngii a chisel a Kristus, e dimlak kulemolem er a ureor el lulechelii a tar a re chad. 21Ng di ua ikel lolekoi a Chedaol Llechukl el kmo, “Tirkel dimlak loberk el mor tir a chisel a mo mesang, me tirkel dirkak le renges a chisel a mo medengei.” 22Tiaikid ia uchul me ng mle betok el le mesngerekl omerolek el eko oldingel er kemiu. 23E ngdi chelechal le mereko urerek er a ilel beluu, e mla mo betok el rak el di kulatk a ekong, 24e a kumdasu a eko mesekemiu er a melengel omerolek el mor a Spain, e kemiu a mo ngosukak er omerolek el mor sei, er uriul er a bo lungil a renguk el telkib el obengkemiu. 25E ngdi chelechang, e ak mor a Jerusalem el mo omes er a re chedal a Dios el ngar isei. 26Ele Ikelesia er a Masedonia ma Akaia a kmal mlo mesaul el kudmokl a ulengesurir el mor tirkel mechebuul el chedal a Dios el ngar a Jerusalem. 27Tia di mle telbilel a rengrir. Ng ulterkokl el ngar ngii a ngerchelir el olengeseu er a re mechebuul. E a re chad er a Judea olengeseu er tir er a tekoi er a reng, me ng kuk kirir el olengeseu er tir er a kloklel a beluulchad el ngar ngii er tir. 28Me sel kmerekong e kbesterir a ikel rokui el mlo mekedmokl el kirir, e seikid e ak mo merael el mor a Spain, mak mo touchakl el eko odngelemiu. 29Sel kikong e ak medengei el kmo a kikong el oba cherrungel el klengeltengat er a Kristus. 30Rudam, ak kmal olengit er kemiu el ultuil er a Rubak er kid el Jesus Kristus ma bltikerreng er a Chedaol Reng, me bo dedak el kmal meluluuch er a Dios el kirek. 31Moluluuch me tirkel ngar a Judea el diak loumera er a Jesus Kristus lak le keskelak, ma urerek er a Jerusalem bo lungilbesul er a rengrir a re chedal a Dios el ngar isei. 32Ma bo le ua isei, e ak mer kemiu el kmal dmeu a renguk, a lungil er a rengul a Dios, ma kungellak e kmal mo ungil a renguk el obengkemiu. 33A Dios, el uchul a budech, lobengkemiu el rokui. Amen.

will be added

X\