ROM 14

1Mongemedaol er ngikel diak le mesisiich el oumerang, e kele mongaititekangel er ngii er sel kuk uldesuel. 2A tar a chad a oumera el kmo ng di ungil a donga ngii di le ngerang, e ngdi ngikel diak le mesisiich el oumerang a di menga iasai. 3Me ngikel menga ngii di le ngerang lak le metengel osengel er ngikel diak longang; me ngikel di menga iasai lak loukerrekeriil er ngikel menga ngii di le ngerang, ele Dios a mla kongei el nguu. 4Kau ke bekord techang, me koukerrekeriil er a mesiungel a tar a re chad? Ng di Rubak er ngii a sebechel el olterkokl er a kmo ng meruul er a ungil ada ng diak. E ngii a mo meruul er a ungil, ele Rubak er ngii a rullii el mo sebechel. 5A tar a chad a omdasu el kmo a tar a sils a kuk klou a belkul er a ikel kuk bebil, e a kuk tar a chad a omdasu el kmo a rokui el sils a di osisiu. Ng kirel a ta ma tar a chad el mo bleketakl er a rengul a uchul me ng omdasu el ua isei. 6Ngikel mengull er a tar a sils, a mengull er ngii el oldanges er a Rubak; me ngikel menga ngii di le ngerang, a mengang el mengull er a Rubak, ele ng mereng a sulel a Dios el kirel a ikel kall. Me ngikel omekiai omengelel a bebil er a kall, me ng omekiai el mengull er a Rubak, e mereng a sulel a Dios. 7Ng diak a tar kid el di ngar el kirel a di ngii, ma diak a tar kid el mad el kirel a di ngii. 8A de ngar, e kede ngar el kirel a Rubak; ma de mad, e kede mad el kirel a Rubak. Ma le ua isei, e a de ngar ma de mad me kid a di mesiungel a Rubak. 9Ele Kristus a mlad e lmuut el me ngar er a kodall el mo Rubak er a re di ngar ma re mla mad. 10Me ngera me koukerrekeriil er a tar kau? E ngera me ng metengel osengem er a tar kau? Kid el rokui a di mor medal a Dios e ng mo oukerrekeriil er kid. 11Ele Chedaol Llechukl a kmo, “A Rubak a kmo tulterkokl a rokui el chad el mo outubuach er medak, e rokui el chad el mo oldanges er ngak el kmo ak Dios.” 12Ma le ua isei, e kede bek el chad el mo mesaod er kid er medal a Dios. 13Ma le ua isei, e mereko e lak di de kaukerrekeriil. Bai mtib er a rengmiu el diak komluut el mo meruul olibesongel ma lechub e ng mo uchul e ng ruebet er a klengit a tar kemiu. 14Ngak el oltirakl er a Rubak el Jesus a uchul mak ungil el medenge el kmo ng diak a ngera el di ngii el mekngit; e ngdi lsekum a chad a omdasu el kmo ng mekngit, e ng mocha mekngit el kuk di kirel ngiil chad. 15Ma lsekum a cho monga er ngii a mo uchul a kngtil a rengul a tar kau, e a omerellem a mla imiit er a bltikerreng. Lak bechere omengelem er a kmo ng ngerang me bo luchul a temellel a chad el blo le mad a Kristus el kirel. 16Me lak mrellii a ungil tekoi el cho moruul er ngii el bo lolekoi er ngii a re chad el kmo ng mekngit. 17Ele Rengedel a Dios a diak lultuil er a kall ma ilumel; ng bai ultuil er a llemalt, ma budech, ma deurreng el le beskid a Chedaol Reng. 18Me ngikel mesiou er a Kristus el ua isei a mo ungil er a rengul a Dios ma re chad a mo mengull er ngii. 19Ma le ua isei, e ng kired el di blechoel el telbiil er a rengud a meruul a ikel mo uchul a budech ma olisichel a delongeled. 20Me lak di le kall a uchul e mtemellii a rellel a Dios. A rokui el kall a di ungil a dongang, e ngdi diak lungil a donga er a ngerang el mo uchul e ng ruebet er a klengit a tar a chad. 21Ng ungil a lak monga techel a charm, ma lechub e molim a bilong, ma lechub e moruul er a ngii di le ngerang el mo uchul e ng ruebet er a klengit a tar kau. 22Sel moumera er ngii el kirel tial tekoi di le medechel er a delongelem kau ma Dios. Ng ngeltengat ngikel chad el diak bo louedikel a rengul, sel loruul er a lodengelii el kmo ng ungil. 23E ngdi lsekum ng oumededenger er a kall e mo menga er ngii, e ng mla mo kirel el obals er a Dios, ele omerellel a diak loltirakl er a loumera er ngii. A ikel rokui el doruul el diak loltirakl er a doumera er ngii a klengit.

will be added

X\