ROM 12

1Ma le ua isei e ak ulengit er kemiu el odam er ngak el okiu a klechubechub er a Dios, me modars a klengar er kemiu el tonget el kirel omesiungel a Dios ma deuil a rengul. Tiaikid a meral rolel omengull el meluluuch er a Dios el kiriu el odersii. 2Lak di moltirakl a blekerdelel a tekoi er tial beluulchad, e bai bsa techellel a Dios me lukbeches a rengmiu e le ngodech a blekerdeliu. E seikid e kom mo medengelii a rengul a Dios er a kmo, ng ngera ungil, ma ngera odeuir a rengul, ma ngera kmal cherrungel el ungil. 3Mak ukiu sel le bilskak a Dios, el ungial a tekingel a uchul, e melekoi er a ta ma tar kemiu el kmo, lak bo momdasu el kmo kom kmal ngarbab el mo engelakl a uldesuiu er a meral deruchelliu. Bai bo le delodau a rengmiu, e di le ngii a ta ma tar kemiu el merriter er ngii el oltirakl er a telkelel a loumera er ngii el lulterkeklii a Dios. 4A bedenged a betok a keskelel, e ngii el rokui a diak di losisiu a urerel. 5Me kid me kede ua isei el betok el chad, e di tal chelechad, el ulak a delongeled el okiu a Kristus, me kede kerous bedenged e ngdi kaukuak a delongeled. 6Kede olab a kakerous el sengk el de ngilai el oeak a krasia er a Dios, me dousbech el oltirakl a ikel kuk ngar ngii er kid. Ma lsekum a sengk er kid a kuk kirel omelekingel a tekingel a Dios, e de bor ngii el oltirakl er a telkelel a doumerang. 7Ma lsekum ng kuk kirel omesiou, e ng kired el mesiou; ma le kirel osisechakl, e ng kired el olisechakl. 8Ma lsekum ng kuk kirel olisichel a reng, e ng kired el melisiich a rengrir a re chad. Me ngikel kuk oldars a ulengesuil, lak a le kiresii; me ngikel kuk oungerachel a tekoi, bo le blak a rengul; me ngikel kuk meruul a kirel a klechubechubchad, le rellii a medal el mo ungil. 9Cho moubltikerreng e le meral ngar a rengmiu; bo miikr a mekngit, e bo mchau a ungil tekoi. 10Bo mungil el kaubltikerreng el odam el ngar a Kristus, e bo le blak a rengmiu el kakull. 11Bo meses, e lak kom mesaik, e le semeriar a rengmiu el mesiou er a Dios. 12A omeltkiu le rellemiu me di ledeu a rengmiu; mkilou a rengmiu er a ringel, e di blechoel el meluluuch. 13Molengeseu er a re bebil er kemiu el Kristiano er a techerelbeserir, e mo metechakl er a re merael el chad. 14Moluluuch er a Dios me lomekngeltengat er tirkel mekngit er kemiu; momekngeltengat e lak molebeakl er tir. 15Bo ledeu a rengmiu el obengterir a re dmeu a rengrir, e mlangel el obengterir a re lmangel. 16Bo le ta delongeliu; lak le kedidai a rengmiu e bo mobengterir a re ngariou el chad, e lak momdasu el kmo ng mellomes a rengmiu. 17A le rellii a mekngit a chad el ekor kemiu, e lak momtechei er sel mekngit el oba mekngit, e molasem el meruul a ikel tekoi el ungil er mederir a rokuil chad. 18E bor a ikel sebechiu el kie el ngar a budech kemiu ma rokui el chad. 19Lak molaitechei, kemiu el betik er a renguk, becherei me di le mechoit er a ngesechel a rengul a Dios. Ele Chedaol Llechukl a kmo, “A omelaitechei a ngar ngak, mak mo melaitechei, ng dmu Rubak.” 20Ng diak molaitechei, el di ua ikel lolekoi a Chedaol Llechukl el kmo, “A le sengerenger a cherrouem, e mokelii; ma le meched a rengul e mungelmii. Ele cho mua isei, e ke rullii me ng mo merur er a blekerdelel.” 21Lak bo mechitechut er a mekngit; e bai bo mesisiich er ngii el meruul a ungil tekoi.

will be added

X\