ROM 11

1Mak uker el kmo a Dios ng mla choititerir a re chedal? Ng kmal diak! Ngak a chad er a Israel, el ngelekel a Abraham, e chad er a kleblillel a Benjamin. 2A Dios a dimlak le chititerir a re chedal el di bla le ngilteterir. Kemiu a medenge ikel lolekoi a Chedaol Llechukl el kirel a Elias er a loluluuch el oltutakl er a Israel el kmo, 3“Rubak, te mla mekodeterir a re profet er kau, e mla toruud olengetongel er kau; ng di ngak el ta ku medechel, e tir a osiik er ngak el omekoad er ngak.” 4Ma Dios a ulenger er ngii el kmo, “Ak mla eklterir el kirek tirkel 7,000 el chad el dimlak bo longull el meluluuch er a Baal el diak le meral chelid.” 5Ng dirrek el ua ise er chelechang, el ngar ngii tirkel mlo medechel, el le ngilelteterir a Dios, el krasia er ngii a uchul. 6Ma le krasia er a Dios a mle uchul, e ng diak lomerellir a mle uchul; ele lak e a krasia er a Dios a mo diak a ultutelel. 7Me kede kmo ngerang? Sel lulsiik er ngii a re chad er a Israel a dimlak le betik er ngii. Te di mle mekesai, el le ngilelteterir a Dios, a miltik er ngii; e tirkel bebil a mlo medecherecher a rengrir. 8Ng di ua ia ikel lolekoi a Chedaol Llechukl el kmo, “A Dios a rirelleterir el mo cheldeng a rengrir, me ng me lmuut er chelechang el diak el sebechir el omes el olab a mederir e orrenges el olab a dingerir.” 9Ma lolekoi a David a kmo, “Bo lobedikl e le mudechem er a blengur er tir; e le mesibas e lobals er ngii. 10Bo le meiko me bo lak lomes; e bo lecharm er a ringel el mo cherechar.” 11Mak uker el kmo a re chad er a Israel te di melsibas el moubuu el dikea le bekiis? Ng kmal diak! Tir el mlor a klengit a uchul ma osobel a mla mer a re Chisentael, me te mocha mechechei er tir. 12Ma lsekum a rebetir a re chad er a Israel a mlo uchul a klengeltengat el mer a beluulchad, ma kngterir a mlo uchul a klengeltengat el mor a re Chisentael, e kele lluut el kmal mo klou a klengeltengat a bo le siseb er a ulecherangel a re chad er a Israel el rokui! 13Chelechang, e a ika kuk tekingek el ekor kemiu a re Chisentael. Chelechal kuba ngerachel el apostol er a re Chisentael, e ak kmal nguu a renguk el mo chemau ngii el urerek, 14me ng mo uchul a chelechei er a re chedak el chad er a Israel, ma lta e ng mo sebechir a re bebil er tir el mo suobel. 15Ele lsekum a dertel a delongelir tir ma Dios a mlo uchul okul a delongelir a re bebil er a re chad tir ma Dios, e a luut er tir er a Dios kele bai bo luchul a lmuut el klou el klengeltengat el di ua mlad el chad a lluut el me chad! 16A lsekum a telkib er a rremotel el blauang a chedaol, e sel blauang el rokir me ng chedaol; ma lsekum a risel a kerrekar a chedaol, e a rechelel me ng dirrek el chedaol. 17A bebil er a rechelel a olib er a sers a mla mengai, e a rechelel a olib er a ked a mla obech er ngii. Me kemiu a re Chisentael a di ua ia olib er a ked, me chelecha e kom mla mo mela klisichiu ma klungioliu er a re chad er a Israel. 18Ma le ua isei, e kemiu el Chisentael lak momdasu el kmo kom ngar uchei er tirkel mlengai, el ua rechelel a kerrekar. Lak bo le kedidai a rengmiu, me mobes el kmo kom rachel. Me ng diak le kemiu a uchul a klengar er a rais; ng bai rais a uchul a klengar er kemiu. 19Ngdi tar kemiu a mo kmo, “A rachel a mlengai el mo meledaes er a urebetellek.” 20Ng meral ua isei. Te mlengai, ele tir el dimlak loumerang, e kau a medechel ele kau el oumerang. Me lak bo le kedidai a rengum, e bai medakt. 21Ele lsekum a Dios a dimlak le bechititerir a re chad er a Judea el ua ia likel meral rechelel a kerrekar, e ng ulterkokl el sebechel el diak bo le bechikau. 22Me bo mungil el mtebengii a ungial a tekingel ma rengelel a tekingel a Dios. Ng meringel a tekingel er tirkel mla touchakl, e ungil a tekingel er kau, chomko ke melemolem el meruul a ungil er a rengul; ele lak e ke dirrek el mo mengai el mo cheroid er ngii. 23Me tirkel chad er a Judea chomko te lmuut el mo oumerang, e te lmuut er a smechir, ele Dios a sebechel el lmuut el sumecheterir. 24Ele lsekum kemiu el Chisentael a di ua rachel, el dimlak kom meral rechelel a kerrekar e mlo obech er ngii, e ng mekera e tirkel chad er a Judea el mle meral rechelel a kerrekar a diak el sebechir el lmuut el mengai el mo obech er ngii? 25Ng soak e rudam, cho bo modengelii tial tekoi el mle berrotel a belkul, me lak bo momdasu el kmo ng kmal mellomes a rengmiu. Ngiil tekoi a kmo, a tetiud er a re chad er a Israel a mlo medecherecher a rengrir, e ua isel mo lmuut er sel bo le mecherrungel a ildisir a re Chisentael el mo chedal a Dios. 26Me tiaikid ia rolel e te mo suobel a re chedal a Israel el rokir, el di ua ikel lolekoi a Chedaol Llechukl el kmo, “A Osobel a ngar a Sion el mei, e mo nguubet a kngterir a re ngelekel a Jakob. 27Ak mo rongedii tial telbilek ngak me tir, sel bo kngubet a kngterir.” 28A re chad er a Judea el dimlak bo loltirakl er a Ebangkelio uchul, me te cherrouel a Dios, el uchul a klungioliu a re Chisentael. E a Dios el ngilelteterir a uchul me te betik er a rengul, ele Dios a melatk er a telbilel el mor a ruchelir. 29Ele Dios a diak le ngedechii a rengul el kirir tirkel lolilt er tir e omekngeltengat er tir. 30E kemiu a re Chisentael a dimlak kom oltirakl a tekingel a Dios er a ngar a mong; e ngdi chelechang, e kom metke er a klechubechub er a Dios, le uchul e a re chad er a Judea a mlo diak loltirakl a tekingel a Dios. 31Me chelechang e a re chad er a Judea el mlo diak loltirakl a tekingel a Dios, me te dirrek el mo metik a klechubechub er a Dios ele kemiu el ua isei. 32Ele Dios a rirelleterir a rokui el chad el mo kor a ngar a kelebus el di mengoit a tekingel, me ng mo uchul e ng ochotii a klechubechub er ngii er tir. 33Kele ng kol meral klou a klungiolel a Dios! E kmal dmolech a llemesel a rengul ma lodengei! Ng techa sebechel el smaod a telbilel? E techa sebechel el mo medenge uchul a lokerang? 34Ng di ua ia ikel lolekoi a Chedaol Llechukl el kmo, “Ng techa medengelii a rengul a Dios, ma lechub e ng techa sebechel el ngosuir er a uldesuel? 35Ng techa mla msa ngerang, me ng mocha kirel el kuk omteche sulel?” 36Ele rokui el tekoi a mlar ngii e oeak ngii e mor ngii. A klebkall le bor ngii el mo cherechar. Amen.

will be added

X\