ROM 10

1Rudam, ak kmal di oureng e di meluluuch er a Dios el kmo a re chad er a beluak el chad er a Judea bo le sebechir el mo suobel. 2Ak ungil el medengei el kmo ng kmal blak a rengrir el mesiou er a Dios, e ngdi diak lungil el medengei el kmo te mekera losiou er a Dios. 3Ele ng diak lodengei el kmo ng mekera Dios a loruul er tir el mo ungil er a rengul, me te millasem el di tir el meruul er a rolel, me ng dimlak loltirakl er a rolel er a Dios a loruul er tir el mo ungil er a rengul. 4Ele Kristus a rirellii a Llach el mo diak a klisichel, me ng mo uchul e ngikel chad el mo oumerang a mo ungil er a rengul a Dios. 5A Moses a milluches el kmo ngikel chad el melasem el mo ungil er a rengul a Dios el okiu a Llach, a mo okiu a Llach el melemolem er a klengar er ngii. 6E ngdi tiaikid ia lolekoi er ngii a Chedaol Llechukl el kirel a oumerang e mo muklemalt er medal a Dios el kmo: “Lak molekoi er a rengum el kmo, Ng techa mo ngmasech el mor a eanged?” (el belkul a kmo ng mo oltengel er a Kristus). 7“E dirrek el lak molekoi el kmo, Ng techa mo metengel el mor a datk?” (el belkul a kmo ng mo olekiis er a Kristus er a kodall). 8A lolekoi er ngii a Chedaol Llechukl a kmo, “A tekingel a Dios a kmeed er kau el ngar a ngerem e ngar a rengum” (el ngii el tekoi el kmo moumera er a Dios a kim omerk er ngii). 9Ele lsekum ke dulii er a ngerem el kmo, ‘A Jesus a Rubak,” e oumera er a chelsel a rengum el kmo a Dios a ulekisii er a kodall, e ke mo suobel. 10Ele chad a oumera er a chelsel a rengul, me ng muklemalt er medal a Dios, e melekoi a loumera el tekoi me ng suobel. 11A Chedaol Llechukl a dmu el kmo, “Ngikel chad el oumera er ngii a diak bo louuchel er a rengul,” 12ele ng diak a klekakerous er a medal a Dios er a re chad er a Judea ma re chad el Chisentael, ele Dios a di Rubak er a rokui el chad, e kmal omekngeltengat er tirkel rokui el omekedo er ngii. 13Ng di ua ikel lolekoi a Chedaol Llechukl el kmo, “Tirkel rokui el omekedo er a ngklel a Rubak a mo suobel.” 14E ngdi te mekera e mo omekedo er a Dios, a le dirkak bo loumerang? E mekera e mo oumerang, a le dirkak le renges a tekingel? E mekera e mo remenges a tekingel a Dios a lak a re chad el mo omerk? 15E mekera e a re chad a mo omerk a tekingel a Dios a lak le modurech? Ng di ua ikel lolekoi a Chedaol Llechuk el kmo, “Ng meral ungil el tekoi a le me re chad el olab a Ungil Chais.” 16E ngdi diak le rokui el chad a mlo olengesenges er a Ungil Chais; ele Isaia a kmo, “Rubak, ng techa mlo oumera ikel kim ulemerk el tekoi?” 17Me ng ua isei el chad a mo oumerang el okiu a tekoi el le renges, ma ikel le renges a okiu a berkel a tekoi el kirel a Kristus. 18E ngdi ngak oker el kmo, Ng meral dirkak le renges a tekingel a Dios a re chad? Tulterkokl el mla remenges, el di ua ikel lolekoi a Chedaol Llechukl el kmo, “A klumech el lullekoi a uleberk er a beluulchad el rokir; ma tekingir a mlor a rokui el chad.” 19Mak lmuut el oker el kmo, a re chad er a Israel ng dimlak bo lodengei? A Moses ingii ia kot el onger el kmo, “Ak mo rullemiu el mo mechechei er a re chad el dirkak le moterkokl a belurir; Ak mo rullemiu el mo kesib a rengmiu er a beluu el chelsengsang a re chad er ngii.” 20A Isaia a di mle bekeu el kmo, “Te miltik er ngak a re dimlak losiik er ngak; ak mlo duum er tirkel dimlak loker er ngak.” 21E a tekingel el kirir a re chad er a Israel a kmo, “Ng tal sils el kullasem el meruul er a delongelek ngak ma re chad, el dimlak lorrenges a kulekoi e mlo omtok er ngak.”

will be added

X\