OCHOLT 8

1Ser a le kedekedii ongeuid el semosem a Ngelekel a Sib, e ng mlo kellechakl a eanged el mle bekord tedobech el sikang. 2E ngak a milseterir a re teuid el anghel el dilechor er medal a Dios, e ngilai a euid el trombetang el mo chemur. 3E a lmuut el tar a anghel el uleba kolt el blil ochod a mlei el mo dechor er a bitar a olengetongel. Ng ngilai a betok el ungil a bul ochod el mo obengkel a nglunguchir a rokui el chedal a Dios e mo oldars er bebul a olengetongel el mlar medal a kingall. 4Ma chetul ngiil ochod a mlor bab el obengkel a nglunguchir a re chedal a Dios el mlar a chimal a anghel el dechor er medal a Dios. 5E a anghel a ngiluu a blil ongat e mekekii er a ngau el mlar a olengetongel e nguu el choitii er a beluulchad. Me ng mlor ngii a cherrodech ma ngerel a derumk ma bisebusech ma desiu. 6E sola e tirkel teuid el anghel el ullab a kleuid el trombetang a mirrechbesrir el mochu outrombetang. 7Ma kot el anghel a uluutrombetang. A chull el kori ma ngau el urrachem er a rasech a rirebet er a beluulchad. A tar edeitiud er a beluulchad, ma tar edeitiud er a kerrekar ma bek el llel a chudel a milseseb. 8E sola e a ongerul anghel a uluutrombetang, ma kor a teletelel a kloul rois el kmard a ngau er ngii, a ulebidokl er a daob; 9ma tar a edeitiud er a daob a di mlo rasech, ma tar edeitiud er a ikel outeliil el ngar a daob a di mlad, ma tar edeitiud er a diall a di meltemall. 10A ongedel anghel a uluutrom-betang, ma klou el btuch er a eanged el mekerkard el ua okal a rirebet er a tar edeitiud er a omoachel ma ikel oumadedok el ralm. 11(A ngklel ingiil btuch a “Mechuached.”) A tar edeitiud er a ralm a mlo mechuached, e betok el chad a mlad a lolim er itial ralm, ele ng ulebult el mo mechuached. 12E a ongeual anghel a uluutrom-betang, ma tar edeitiud er a sils, ma tar edeitiud er a buil, ma tar edeitiud er a btuch a meltemall, me ng mlo diak a tar edeitiud er a llemesel; e dirrek el mlo diak a llemesel a tar edeitiud er a llomes ma tar edeitiud er a klebesei. 13E sola e ak ulemes, e rirengesii a uasi el silebek er bab er a melidiul el klou a ngerel el kmo, “Kdekudel! kdekudel! Ng meral mo kdekudel el kirir tirkel rokui el ngar a beluulchad, sel bo loutrombetang tirkel kuk tedei er a re anghel!”

will be added

X\