OCHOLT 7

1Uriul er itiang e ak milseterir a re teual anghel el dechor er a eual uchul a eolt er a beluulchad, el merers a ikel eual eolt er ngii me ng diak lolokou er a beluulchad ma daob ma ngii di le kerrekar. 2E sola e ngak a milsa tar a anghel el mle duum er a ongos el oba olangch er a di ngar el Dios. Ng uleldiu el mor tirkel teual anghel el le bilsterir a klisiich a Dios el mo melemall er a beluulchad ma daob. 3Ngiil anghel a dilu el kmo, “Lak molemall er a beluulchad, ma daob, ma lechub a kerrekar, el di mereko bo kim merek el melecha olengchelel a Dios er a medal a bderrir a re mesiungel” 4E ngak a rirenges el kmo a ulecherengelir tirkel mlor ngii olengchelel a Dios er a medal a bderrir a mle 144,000. Te mlengai er a ikel tacher ma teblol kebliil er a Israel, 5- 8el derstruich ma erul telael er a chimol kebliil, el Juda, ma Ruben, ma Gad, ma Aser, ma Naftali, ma Manase, ma Simeon, ma Levi, ma Isakar, ma Sebulun, ma Josef, ma Benjamin. 9Uriul er itiang e a kulemes e milsa kloul seked; ng dimlak a chad el sebechel el mechur a ildisir el rokui! Te chad er a bek el beluu, ma kebliil, ma bek el bedengir a re chad ma omelekoi, e dilechor er medal a kingall ma medal a Ngelekel a Sib, e bliull a becheleleu el bail e olab a chucher er a chimorir, 10e uleldiu el klou a ngerir el kmo, “Osobel a mlar a Dios er kid el mei, el ngii a dengchokl er a kingall, e dirrek el mlar a Ngelekel a Sib el mei!” 11A re anghel el rokui a dilechor el meliuekl er a kingall, me tirkel mechuodel, ma ikel kleual ngar el kor a charm. E sola e te mlo terrob er medal a kingall e milengull el meluluuch er a Dios 12el kmo, “Amen! A odanges, ma klebkall, ma llomeserreng, ma omerengelsaul, ma chetengakl, ma omengedereder, ma klisiich le bor a Dios er kid el mo cherechar! Amen!” 13A tar tirkel mechuodel a uleker er ngak el kmo, “Tirka te rua techal chad el bliull a becheleleu el bail, e mlar ker el mei?” 14Mak ulenger el kmo, “Ng diak kudengei e rubang. Kau a bai medengei.” Me ng dilu er ngak el kmo, “Tirka tirkel chad el silobel er sel meringel el odechelakl. Te sililek a bilir er a rsechel a Ngelekel a Sib me ng mlo becheleleu. 15Sei a uchul me te dechor er a medal a kingellel a Dios e mesiou er ngii er a llomes ma klebesei er a templo er ngii. E ngikel dengchokl er a kingall a mo mesebechakl er tir, el di ngar bita er tir. 16Ng diak lluut el mo songerenger ma ka bo le meched a rengrir; ma diak a sils ma lechub e ng kleald el mo melul er tir, 17ele Ngelekel a Sib el ngar a belngel a kingall, a mo mengeteklir, e mo ngoititerir el mor a madedok el ralm er a klengar. E a Dios a mo smuld a rokui el chiuosech er a mederir.”

will be added

X\