OCHOLT 6

1E sola e ngak a milsa Ngelekel a Sib el kodekedii sel kot er a ikel euid el semosem, e rirengesii a tar a ikel kleual ngar el kor a charm el melekoi el ua ngerel a derumk el kmo, “Mei!” 2Ak chilsngekl, e milsa becheleleu el uos. E a chad el mlar bebul a uleba balech ma kelel a balech, e a krone a le bilsang. Ng mlar a uos el tuobed el ua teletelel a chad el mo oumekemad el mo melabeluu. 3E sola e a Ngelekel a Sib a kildekedii a ongerul semosem; mak rirengesii a ongerul ngar el kor a charm el kmo, “Mei!” 4E mle tuobed a lmuut el tar a uos, el bekerkard a bedengel. Ngikel mlar bebul a le bilsa klisiich el mo omesebes a mekemad er a beluulchad, ma re chad bo le kaokoad. A klou el saider a dirrek el le bilsang. 5E a Ngelekel a Sib a mlo kodekedii a ongedel semosem; e ngak a rirengesii a ongedel ngar el kor a charm el kmo, “Mei!” Mak ulemes e a chedelekelek el uos a mle tuobed. Ngikel mlar bebul a uleba olebedabel. 6Ak rirengesii a kor a ngor el mlar a delongelel a ikel kleual ngar el kor a charm el dilu el kmo, “A kerrekerengel a tal sils a mecherar a tal quart el wheat, ma kerrekerengel a tal sils me ng di mechar a edei el quart el barley. Ngdi diak molemall a kerrekar el olib ma sers er a bilong!” 7E sola e a Ngelekel a Sib a kildekedii ongeual semosem; e ngak a rirengesii a ongeual ngar el kor a charm el kmo, “Mei!” 8Ak chisngekl e ng kor a mengeleu a bedengel el uos a mle duum. A ngklel ngikel mlar bebul ngiil uos a Kodall, e a Datk a di ulekiuellel el di kmeed er ngii. Te ngiluu a klisiich el mo mengedereder er a tar euaitiud er a beluulchad, el mo omekoad el ousbech a mekemad, ma bosech, ma rakt ma tebelik el charm. 9E sola e a Ngelekel a Sib a mlo kodekedii ongeim el semosem. Ak miles er eungel a olengetongel a delebengir tirkel mlad el kirel a tekingel a Dios ma ochotel a ikel tekoi el loumerang. 10Tuleldiu el klou a ngerir el kmo, “Rubak el Olab a Bek el Klisiich, chedaol e merang! Ke mengiil el mo oingerang e mochu oukerrekeriil er a re chad er a beluulchad e omals er tir el milekodkemam?” 11A derta er tir a le bilsang a kemanget el becheleleu el bail e mlor tir a tekoi me lluut el mo olengull el telkib, el dimerkmo le mecherrungel a ildisir tirkel ua itir el mesiou el bebil er tir, el kirir el mo mad el di ua itir. 12E ngak a milsa Ngelekel a Sib er a le kedekedii a ongelolem el semosem. Ng mlor ngii a mesisiich el desiu, ma sils a mlo chedelekelek el ua okrokr el chedelekelek el mamed, ma buil a di ulebult el mo bekerkard el rokir el ua rasech. 13A btuch a di mle kaireberebet el mer a chutem, el ua mengur el redechel a kerrekar el fig el mereberebet sel le mei a mesisiich el eolt. 14A eanged a ngilemed el ua babier a le meiuil, ma bek el rois ma iungs a milengukl el mo cheroid er a ikel le ngar ngii. 15E a re king er a beluulchad, ma re mengedereder a beluu ma re mengeteklir a re soldau, ma re meteet ma rulab a klisiich, ma rokui el chad, el sibai ma re mimokl, a mlo omart er tir er a ii ma delongelel a bad er bebul a rois. 16Tulemekedong a rois ma risois el kmo, “Meukel el me mertemam er a medal ngikel dengchokl er a kingall ma ngesechel a rengul a Ngelekel a Sib! 17Sel kdekudel el sils er a ngesechel a rengrir a mla mei, me ng techa sebechel el dechor el chobengelii?”

will be added

X\