OCHOLT 5

1Ak milsa iluil babier el ngar a kadekmel a chimal ngikel dengchokl er a kingall; ng mle llechukl a bita ma bitang er ngii e selemosem er a euid el semosem. 2E ngak a milsa mesisiich el anghel el mle klou a ngerel el oker el kmo, “Ng techa sebechel el mo kodoked a ikel semosem e meketii sel babier?” 3Ngdi dimlak a tal chad el mlar a eanged ma lechub e ng chutem ma datk el mle sebechel el meketii sel babier e mesa chelsel. 4Ak kmal lilangel, ele ng dimlak a tal chad el mle rredemelel a mo omoket er isel iluil babier ma lechub e ng omes er a chelsel. 5E a tar tirkel mechuodel a dula er ngak el kmo, “Lak mlangel. Ka momes! Ngikel Laion er a kebliil er a Juda, el ngikel meraelchisel el uldidellel a rsechel a David, a mla mo mesisiich, e ngii a sebechel el kodoked a ikel euid el semosem e meketii sel iluil babier.” 6E sola e ak milsa Ngelekel a Sib el dechor er a delongelel a kingall ma ikel kleual ngar el kor a charm me tirkel mechuodel el terrob el meliuekl er ngii. Ngikel Ngelekel a Sib a ua ble lulekoad. Ng mle kleuid orsul e kleuid a chelsul a medal, el ikel euid el reng er a Dios el mlodurech el mor a beluulchad el rokir. 7Ma Ngelekel a Sib a mlo nguu isel iluil babier er a kadekmel a chimal ngikel dengchokl er a kingall. 8E ser a le nguu, e a ikel kleual ngar el kor a charm ma re 24 el mechuodel a mlo terrob er medal a Ngelekel a Sib. Te mle chemur a harp ma delluchel el belatong el kolt el mui er ngii a bechochod el ongat, el nglunguchir a re chedal a Dios. 9Te milengitakl er a beches el chelitakl el kmo, “Kau a rredemelel a mo melai er a iluil babier e kodoked a semesemel. Ele kau a lulekodkau, e a kodellem el mlo tenget a ulemechar er a re chad er a bek el kebliil, ma omelekoi, ma beluu ma bek el bedengir a re chad el mo chedal a Dios. 10Ke mla rulleterir el mo chedal a chimol renged er a re prist el mo mesiou er a Dios er kid, me te mo mengedereder el ngar a beluulchad.” 11Ak liluut el omes, e rirengesterir a re anghel, el betok el telael ma re betok el milion! Te dilechor el meliuekl er a kingall, ma ikel kleual ngar el kor a charm, me tirkel mechuodel, 12e milengitakl el klou a ngerir el kmo: “A mlad el Ngelekel a Sib a kirel a ngma dereder, ma siich, ma llomeserreng, ma klisiich, ma omengull, ma klebkall, me odanges!” 13E ngak a rirenges a rokui el bleob el ngar a eanged, ma chutem ma datk, ma chelsel a daob, ma ikel rokui el ngar ngii er a eanged ma chutem, el milengitakl el kmo: “Odanges ma omengull, ma klebkall ma klisiich, le bor ngikel dengchokl er a kingall ma Ngelekel a Sib el mo cherechar!” 14Ma ikel kleual ngar el kor a charm a ulenger el kmo, “Amen!” E tirkel mechuodel a mlo terrob e milengull el meluluuch er ngii.

will be added

X\