OCHOLT 4

1Itiaikid e ak liluut el mesang a tar a ues mak milsa chesimer er a eanged el nglai. E a kor a ngerel a trombetang el mla tal krengesii a dilu el kmo, “Mer tiei er bab e bo kucholt er kau a ikel tekoi el mo duubech er uriul er tiang.” 2Me ng di mle seikid e ak meltuchel er a Reng. Ng mlar ngii a kingall er a eanged el ngar ngii a dengchokl er ngii. 3Ngikel dilengchokl a diliich el ua ikel mekreos el bad el jasper ma carnelian, e mlar ngii a orrekim el kor a bedengel a emerald el meliuekl er a kingellel. 4Ng mle blechobech el meliuekl er itial chimol kingall a 24 el kingall el le dilengchokl er ngii a re 24 el mechuodel el mle bliull a becheleleu el bail e telechull a krone el kolt. 5Tial kingall a tilobed er ngii a bisebusech, ma cherrodech ma ngerel a derumk. E a kleuid el okal a kilard er a medal a kingall, el ngii a euid el reng er a Dios. 6Ng dirrek el mlar ngii a kor a oberberk el daob er medal itial kingall el mechellings el ua karas. Ng mlar ngii a kleual di ngar el kor a charm el mlar a bita ma bitang er a kingall el di mui el chelsul a mad a medal ma ulkel. 7Ngikel kot a mle ua teletelel a laion; e a ongerung a mle ua sechal kerbou; e a ongedei a mle ua klidm er a chad; e a ongeuang a mle ua teletelel a uasi el suebek. 8E a derta ma tar a ikal kor a charm a mlar ngii a derselolem el osebekel e mle berberriid er ngii a chelsul a mad er a chelsel ma ikrel. Ng llomes ma klebesei el diak bo lolengull el mengitakl el kmo: “Ng chedaol, ng chedaol, ng chedaol, a Rubak el Dios el Olab a Bek el Klisiich, el ngikel mlar ngii, e ngikel ngar ngii, e ngikel mei.” 9A ikel kleuang el kor a charm a mengitakl a cheliteklel a klebkall ma odanges ma omereng el saul el mor ngikel di ngar el mo cherechar el dengchokl er a kingall. E sel le ua isei, 10e tirkel 24 el mechuodel a terrob er medal ngikel dengchokl er a kingall, e mengull el meluluuch er ngii el di ngar el mo cherechar, e omidokl a krone er tir er medal a kingall e kmo, 11“Rubak el Dios er kemam! Kau a kirem a klebkall, ma odanges, ma klisiich. Ele kau a mileob a rokui el tekoi, e uleltirakl a tekingem e ng dilubech el mlor ngii a klengar er ngii.”

will be added

X\