OCHOLT 3

1“Moluches el mor a anghel er a ikelesia el ngar a Sardis el kmo: “Tia klumech el mlar ngikel olab a euid el reng er a Dios ma kleuid el btuch. Ak medenge cho moruul; ak medengei el kmo ng meraelchisem el leko ke di chad, e a lechub e kulekoad! 2Bekiis, e msisiich a ikel dirk medechel el sokol el mad. Ele kmla metik el kmo a ikel bla mruul a dirkak bo le cherrungel er medal a Dios er ngak. 3Me molatk a ikel cho mlosisechakl er ngii ma ikel cho mrirenges; motirakl el meruul e mobult er a kngtim. A lak bekiis, e ak di tmoech el ekong el ua merechorech, e diak bo modengelii a belsechel sel kdum. 4Ngdi re bebil er kemiu el ngar a Sardis a dimlak le beche bilir me bo lidokel. Tirkei ia mo merael el obengkek, el bliull er a becheleleu ele te rredemelel. 5Tirkel mo mesisiich a mo ua isei el bliull er a becheleleu, e diak bo kusuld a ngklir er a babier er a klengar. Mak di mo bleketakl el ouchais er medal a Demak ma re anghel er ngii el kmo te chedak. 6“Ngikel ngar ngii a dingal, lorrenges a ikel lolekoi a Reng el mor a ikel ikelesia! 7“Moluches el mor a anghel er a ikelesia el ngar a Filadelfia el kmo: “Tia klumech el mlar ngikel chedaol e klemerang. Ng oba kisel a David, e sel le nguu a chesimer e ng diak a chad el sebechel chosmerii, e sel le chesmerii e ng diak a sebechel el nguu. 8Ak medenge cho moruul; ak medengei el kmo ng diak msal mesisiich e di uleltirakl a osisecheklek el mer chelechang e dimlak mchitak, mak mla nguu a chesimer er medam el diak a sebechel el chosmerii. 9Mosang, tirkel kldibel el chedal a Satan, el tirkel cheblad el di tir el kmo te chad er a Judea e a lechub e ng diak, a bo kdu er tir me te mei e mo terrob er bitar ochim. Te mo medengei el rokui el kmo ng betik a renguk er kau. 10Ke mla otirakl a tekingek el kmo ng mo meduch a rengum el outekangel el mor a ulebongel, mak dirrek el mo sobecheklau er a uldikel el mor ngii er a beluulchad el mo mengarm er tirkel kiei er a chutem. 11Ak di mereched el mei. Motirakl a ikel osisechakl el molab, me lak a chad el merberii a ngkedem. 12Ngikel mo mesisiich a bo krellii el mo chelsakl er a templo er a Dios er ngak, e kmal diak bo le tobed er ngii. Ak mo luchesii er ngii a ngklel a Dios er ngak, ma ngklel a belual a Dios er ngak, el sel beches el Jerusalem el ngar a Dios er ngak er a eanged el mei. Ak dirrek el mo luchesii er ngii a beches el ngklek. 13“Ngikel ngar ngii a dingal, lorrenges a ikel lolekoi a Reng el mor a ikel ikelesia! 14“Moluches el mor a anghel er a ikelesia el ngar a Laodisea el kmo: “Tia klumech el mlar a Amen, el ngikel blak a rengul e meral ocholt, el ngii a uchelel a ikel rokui el lulemeob a Dios. 15Ak medenge cho bla mruul; ak medengei el kmo ng ka mekeald ma ka mekelekolt. Ak uureng el kmo chulekum me ke ulterekokl el mekeald ma lechub e ke mekelekolt! 16Ngdi ngak a mo tubkau ele kau el ouralmsils, ng ka mekeald ma ka mekelekolt! 17Ke kmo, ‘ngak a meteet e ungilbesuk; ng diak a kngesonges er ngii.’ E ngdi diak modengei el kmo ng ua ngeral mekngit a chelebulem me kede chubkau! Ke chebuul, e meau, e meiko. 18Mrenges a tekingek e bai be momechar a kolt er ngak, el bliochel kolt, me bo meteet. Mdirrek el mecherar a bilem el becheleleu, el milau me lobart a terchedem el di meau. E mdirrek el mechar a chiltel a medam me bo le sebechem el omes. 19Ak uungeroel e omals er tirkel rokui el betik a renguk er tir. Bo le blak a rengum e mobult el mo imikr a kngtim. 20Mosang, ak dechor er a tuangel e melngod er a chesimer; a le ngar ngii a rongesii a ngerek e le nguu a chesimer, e ak mo soiseb er a blil maki dmak el omengur. 21Tirkel mo mesisiich a bo kbesterir a llemeltir el mo dengchokl er bita er ngak er a kingellek, el di ua ingak el mlo mesisiich me chelechang e ak dengchokl er bita er a Demak er a kingellel. 22“Ngikel ngar ngii a dingal, lorrenges a ikel lolekoi a Reng el mor a ikel ikelesia!”

will be added

X\