OCHOLT 22

1Ngkel anghel a dirrek el ulechotii er ngak a omoachel er a ralm er a klengar, el mechellings el ua mellomes el karas e ngar a kingellel a Dios ma Ngelekel a Sib el mei, 2e omaoch el oldengelengel er a belngel a rael er a beluu. E a bita ma bita er ngii el omoachel a dellomel er ngii a kerrekar er a klengar, el ourodech el truich ma erullourodech er a chelsel a tal rak, el tar a tal buil; e a llel a kar el lousbech a re chad er a bek el beluu. 3Ng diak a di tal ngerang el mla medebeakl er a Dios el mo moues er ngii el beluu. A kingellel a Dios ma Ngelekel a Sib a mor a chelsel ngiil beluu, e a re mesiungel a mo mengull el meluluuch er ngii. 4Te mo mesa medal, e a ngklel a mo lluches er a medal a bderrir. 5Ng mo diak a klebesei, e diak bo lousbech olbidel ma lechub e ng dichel a sils, ele Rubak el Dios a mo llemesir, e tir a mo mengedereder el ua king el mo cherechar. 6E sola e ngiil anghel a dilu er ngak el kmo, “A ikal tekoi a merang e ulterekokl el mo tmaut. Ma Rubak el Dios, el omesterir a re profet a Reng er ngii, a ulderchii a anghel er ngii el mo olecholt er a re mesiungel a ikel kmedu el mor ngii.” 7A Jesus a kmo, “Morrenges! Ak di kmedul mei! Te ngeltengat tirkel orrenges a ulaoch er tial babier e oltirakl!” 8Ngak, el Johanes, a rirenges e mes a ikal rokui el tekoi. E ser a bo kmerek el orrenges e omes, e ak mlo terrob er medal ngiil anghel el ulecholt er ngak a ikal tekoi, e leko kmochu mengull el meluluuch er ngii. 9E ngdi ng dilu er ngak el kmo, “Lak mua isei! Ngak a di tar a re mesiou el ua ikau ma re bebil er kau el profet me tirkel rokui el oltirakl a ikel tekoi el ngar tial babier. Ng Dios a kirem el mengull er Ngii!” 10E sola e dilu er ngak el kmo, “Lak momart a ulaoch el ngar tial babier, ele ng di kmeda e ng mo er ngii a ikal rokuil tekoi. 11Ngikel mekngit lolemolem el meruul a mekngit, me ngikel mengelengalek di le mengelengalek; ngikel ungil lolemolem el meruul a ungil, me ngikel chedaol di le chedaol.” 12A Jesus a kmo, “Morrenges! Ak di kmedul mei! Ak mo olab a nguked sel kmei, el mo merous el mor a ta ma tal chad el okesiul a ikel lurruul. 13Ngak a kot e uriul, e uchul e ulebongel.” 14Te ngeltengat tirkel mesilek a mekemanget el ikrel a bilir el mo beches me ng sebechir el mo mengang a redechel sel kerrekar er a klengar e mo soiseb er a siseball el mor a chelsel isel beluu. 15E ngdi tirkel ngar a ikrel isel beluu itirkel kor a blekerdelel a bilis, ma ruuelai, ma re ngar a deleboes, ma rumekoad er a re chad, me tirkel mengull el meluluuch a bleob el chelid, me tirkel bulak er a tekingir ma omerellir. 16“Ngak el Jesus, a mla oderchii a anghel er ngak el eko ouchais a ikal tekoi er kemiu el ngar a bek el ikelesia. Ngak a uldidellel a rasech er a David; ak medidiich el btuch er a tutau.” 17A Reng ma Redil el kldmokl el kirel mo bechiil a kmo, “Mei!” Tirkel rongesii tiang a dirrek el kirir el kmo, “Mei!” Le mei, ngikel meched a rengul; ngikel soal, le nguu a ralm er a klengar el diak locheraol. 18Ngak, el Johanes, a kmal mengelechel er ngikel remenges a ikal tekoi er a ulaoch er tial babier el kmo, a le ngar ngii a ngii di le chad el dochel er a sesei, e a Dios a mo dochel a belsel ma ringelel el kloadel er tial babier. 19Ma lsekum ng ngar ngii a ngii di le chad el kosadel a tekoi er a ulaoch er tial babier, e a Dios a mo ngmai er ngii a blingelel er a rodech er sel kerrekar er a klengar ma dikesel er sel Chedaol Beluu, el mla medung er tial babier. 20Ngikel ullecholt a ikal rokui el tekoi a kmo, “Choi ng ua isei! Ak di kmedul mei!” Bo le ua isei! Mei, e Rubak el Jesus! 21A krasia ma bltikerreng er a Rubak el Jesus le bor a re bek el chad.

will be added

X\