OCHOLT 20

1E sola e ak milsa anghel el mle metengel er a eanged, el oba kiis er a diak a btil deliobech ma mesisiich el bombatel. 2Ng mildechemii a drakon, el ngikel bersoech er a rechuodel, el ngii a Diabelong, ma lechub e ng Satan, e lilechetii er a bombatel el 1,000 el rak. 3E a anghel a mildeklii er a diak a btil deliobech, e chilsmerii, e chilsechesii, me bo lak el sebechel el mengeblad a beluu el mor sel bo le merek a 1,000 el rak. Uriul er isei e ng kirel el mekedoked el telkib. 4E sola e ak miles a kingall, e tirkel dilengchokl ngiil kingall a mlor tir a klisiich el oukerrekeriil. Ak dirrek el miles a delebengir tirkel milengai a chiklir ele tulemerk er a klemerang el lullecholt a Jesus ma tekingel a Dios. Ng dimlak a tal longull er ngkel charm ma bleob el okesiul ma ka le ngiluu a olangch er ngkel charm el mor a medal a bderrir ma chimorir. Te liluut el mo chad e dilak el mengedereder el ua king tir ma Kristus el 1,000 el rak. 5(E tirkel mlo medechel er a re mla mad a dimlak le bekiis el mor ser a bocha le merek a 1,000 el rak.) Tia sel kot el okisir a re mla mad. 6Ng dmeu a rengrir e kmal ngeltengat tirkel ngar a belsachel er sel kot el okiis er a re mla mad. Sel ongerul kodall a diak a klisichel er tir; te mo prist er a Dios ma Kristus, e mo mengedereder el obengkel el 1,000 el rak. 7Uriul er a bo le merek a 1,000 el rak, e a Satan a mo mekedoked e tuobed er a kelebsengel, 8e merael el mo mengeuid a bek el beluu el meliuekl er a beluulchad, el Kok ma Makok. A Satan a mo mengideb er tir el rokui el kirel a mekemad, el ildisir a ua chelechol er a rriil. 9Te milekelkelii a beluulchad e mlo iueklii a le cheldull er ngii a re chedal a Dios, ma beluu el betik a rengul er ngii. Ngdi ngau a miltengel er a eanged el okngemedeterir. 10E sola e a Diabelong el milengeuid er tir, a le ngiluu el choitii er a diosech el ngau ma sulfur, el di bla le chitii el mor ngii ngikel charm ma diak le meral profet; me te mo chuarm er ngii er a llomes ma klebesei, el diak a ulebengelel. 11E sola e ak milsa klou el becheleleu el kingall me ngikel dengchokl er ngii. E a chutem ma eanged a di ririid el nguemed er medal e dimlak lluut el moues. 12E sola e ak milseterir a re mla mad el ngarbab ma re ngariou el chad, el di osisiu, el dilechor er medal a kingall. A babier a ulebiis, e ng kuk obiis a tang, el sel babier er a re di ngar. A re mlad a mlukerrekeriil el kirel a ikel lurruul, el llechukl er a ikel babier. 13E a daob a ultebedeterir a re mlad er ngii. Ma kodall ma belurir a re mlad a ultebedeterir a re mlad el lulerreked er tir. Me te rokui el mlo mukerrekeriil er a ikel lurruul. 14E sola e a kodall ma belurir a re mlad a ulebidokl er a diosech el ngau. (Tial diosech el ngau a ongerul kodall) 15A ngii di le chad el dimlak le llechukl a ngklel er a babier er a klengar a ulebidokl er a diosech el ngau.

will be added

X\