OCHOLT 19

1Uriul er itiang, e ak rirengesii a kor a ngerel a klou el seked er a re chad el ngar a eanged el dmu el kmo, “Le modanges a Dios! Osobel, ma klebkall, ma klisiich a kloklel a Dios er kid! 2Ng merang e melemalt a loukerrekeriil! Ng mla melsii ngikel prostitute el uluudengerenger el mengikiongel er a beluulchad er a deleboes er ngii. A Dios a milelsii ele ng milekodeterir a re mesiungel.” 3Te liluut el oldiu el kmo, “Doldanges er a Dios! A chat er a ngau el olekngemed er sel meraelchisel el beluu a di merael el mor bab el diak a ulebengelel!” 4A re 24 el mechuodel ma re teual ngar el bleob a mlo terrob e milengull el meluluuch er a Dios, el dilengchokl er a kingall. Te dilu el kmo, “Amen! Doldanges er a Dios!” 5Ng mlar ngii a ngor el mlar a kingall el mei el dilu el kmo, “Moldanges er a Dios er kid, kemiu el rokui el mesiungel me kemiu el rokui el chad, el meklou ma re mekekerei el mengull er ngii!” 6E sola e ak rirengesii a kor a ngerel a seked, el ua rrekel a taki, el ua meklou el ngerel a derumk. Ak rirengesterir el kmo, “Doldanges er a Dios! Ele Rubak, el Dios er kid el Olab a Bek el Klisiich a King! 7Doldeu a rengud e bo lungil a rengud; dodengesii ele ng mocha belsechel a merengel a chebechielel a Ngelekel a Sib, e a mo bechil a mla kudmeklii el kirel. 8Ng mla nguu a beches el mengeldoech el linen el bo loubail er ngii.” (Ngii el bail a ikel ungil el omerellir a re chedal a Dios.) 9E sola e a anghel a dilu er ngak el kmo, “Mlechesii tiang: Te ngeltengat tirkel mlor tir a okedong el mer a merengel a chebechielel a Ngelekel a Sib.” E ngiil anghel a millemolem el dmu el kmo, “A ika meral tekingel a Dios.” 10Ak mlo terrob er ochil el mengull el meluluuch er ngii, e ngdi ngii a dilu er ngak el kmo, “Lak mua isei! Ngak a di ua ikau ma re bebil er kau, el tar a re mesiou, el olecholt er a Jesus. Ng Dios a kirem el mengull er ngii!” Ele klemerang el lulechotii a Jesus a melluchel er a re profet. 11E sola e ak milsa eanged el menga chesmerel, e ng me chemolt er ngii a becheleleu el uos. Ngikel mlar bebul a lomekedo er ngii el Blak a Rengul e Merang; ng melemalt a loukerrekeriil ma loumekemad a mekemedil. 12A chelsul a medal a mle ua kerdel a ngau, e mle telechull a betok el krone. Ng mlar ngii a ngklel el mle llechukl er ngii, el dimlak a ngodech el chad el medengelii, ng di ngii el tang. 13A kemanget el ikrel a bail el luluubail er ngii a di mle delidiim er a rasech. A ngklel a “Tekingel a Dios.” 14A re soldau er a eanged a uleak ullel, el ngar a becheleleu el uos e oubail a kmal becheleleu el ungil linen. 15Ng tilobed a kedorm el saider er a ngerel, el loba el mo oumekemad e mo mesisiich a beluu. Ng mo mengedereder el oba skors el deel, e mo merderd el di ua loltobed osechel a bilong er a omeseokl er a ngesechel a rengul a Dios el Olab a Bek el Klisiich. 16A ngakl el, “King er a re king e Rubak er a re rubak,” a mle llechukl er a ikrel a bilel ma bab er a bkul ochil. 17E sola e ak milsa anghel el dechor er bebul a sils. Ng uleldiu el klou a ngerel el mor a rokui el charm el silebek er a melidiul el kmo, “Be mkldibel er a klou el mur er a Dios! 18Mei me monga techel a bedengir a re king, ma re mengeteklir a re soldau ma re soldau, ma techel a uos ma re chad el ngar a uos, ma techel a bedengir a rokuil chad, el sibai ma re mimokl, ma re ngarbab ma re ngariou el chad!” 19E sola e ak milsa ngikel charm ma re king er a beluulchad ma re soldau er tir el cheldull el mo oumekemad er ngikel ngar a uos ma re soldau er ngii. 20Ngkel charm a milengai el mo kelebus, ngii ma diak le meral profet el mirruul ongasireng el tekoi er medal. (Ng ikeikid el ongasireng el tekoi a luluusbech el mengeuid er tirkel mlar ngii olengchelel ngiil charm er tir me tirkel milengull er a bleob el okesiul ngiil charm.) Me ngikel charm ma diak le meral profet a di mle chad e obidokl er a chelsel a diosech el ngau el ngar ngii a sulfur er ngii. 21E a saider el tuobed er a ngerel ngikel ngar a uos a milekodeterir a re soldau er tir; e a rokuil suebek el charm a mlor a ikel sebechir el menga techel a bedengir.

will be added

X\