OCHOLT 17

1E sola e a tar tirkel teuid el anghel el ullab a delluchel belatong er a ngesechel a rengul a Dios a mlei er ngak e dilu el kmo, “Mei, e bo kuchotii er kau a belsel ngikel meraelchisel el prostitute, ng sel beluu el dechor er bitar a betok el omoachel. 2A re king er a beluulchad a mirruul a deleboes el obengkel, e a re chad er a beluulchad a milechetelaol er a lolim er a bilong er a delengerengerel.” 3Ak meltuchel er a Reng, ma anghel a kilderak el mor a medi-deriik el ked. Ng mlar ngii er ngii a redil el dilengchokl er bebul a bekerkard el charm el di mle llechukl el tal chad er a ngakl el otubel a Dios. E ngikal charm a mlar ngii a kleuid el bdelul ma truich el orsul. 4Ngikel redil a mle bliull er a purple ma tatirou, e ouberberingel er a besiich el kolt, ma mekreos el bad, ma ngisel a chesiuch. Ng uleba er a chimal a kob el mui er a mengelengalek e kikiongel el tekoi, el olechotel a delengerengerel er a deleboes. 5Ng mle llechukl er a medal a bdelul a berrotel a belkul el ngakl el kmo, “Chetengakl el Babilon, el derrir a rokui el prostitute ma re chad el meruul a kikiongel er a beluulchad.” 6E sola e ak milsa ngiil redil el cheltelaol er a rsechir a re chedal a Dios ma rsechir tirkel lulemekoad er tir ele te mle blak a rengrir el oltirakl er a Jesus. Ser a kisang, e ng kmal mlo mechas a renguk. 7Ma anghel a uleker er ngak el kmo, “Ngera me ng mechas a rengum? Ak mo subedau er a berrotel el belkul ngikel redil ma charm el le ngar bebul, ngkel charm el ngar ngii a kleuid el bdelul ma truich el orsul. 8Ngkel charm a di mle chad, e mla mad, e ngosechu el me tuobed er a datk e merael el mo metemall. Tirkel chad el kiei er a beluulchad el dimlak le meluches a ngklir er a babier er a re di ngar er uchei er a lobeob a beluulchad, a rokui el di mo mechas a rengrir sel lomes er ngkel charm. Ele ng mlar ngii, e mo diak, e dirk lmuut el mor ngii. 9“Ng di chad el mellomes a rengul e sekutab a sebechel el mo medengelii tiang. A ikel kleuid el bdelul a euid el bukl el le dengchokl er ngii ngikel redil. Ng dirrek el teuid el king, 10el re teim er tir a mla ruebet, e a tang a dirk mengedereder, e a tang a dirkak le mei; e sel le mei e ng kirel mo mengedereder el di telkib. 11E ngikel charm el mle chad e mla mad, a mong me ng ongeai el king el tar tirkel teuid el merael el mo metemall. 12“A ikel truich el orsul a charm el mules a re truich el king el dirkak lomuchel el mo mengedereder, e ngdi ng mor tir a klisiich me te mo mengedereder el ua le king el tal sikang tir me ngkel charm. 13Tirkal truich a di ta uldesuir, e ngma klisichir ma klisichel omengedereder er tir el msa ngkel charm. 14Te mo oldechelakl el omtok er a Ngelekel a Sib; e ngdi Ngelekel a Sib, ngii ma re chedal, el blak a rengrir el oltirakl er ngii, a mo mesisiich er tir, ele ngii a Rubak er a re rubak e King er a re king” 15A anghel a dirrek el dilu er ngak el kmo, “A ikel ralm el mules el le dengchokl er bebul ngkel prostitute, a beluu, ma re chad, ma kakerous el bedengir a re chad, ma omelekoi. 16A truich el orsul a charm el mules me ngikel charm a mo ouketui er a prostitute; te mo medobed el ngmai a ikel rokui el ngar ngii er ngii me ng di mo meau; te mo kma techel a bedengel e durur el tomellii. 17Ele Dios a mla rullii el mor ngii er a rengrir a mo oltaut a ngar a uldesuel sel bo leta uldesuir e lenga klisichir el msa ngkel charm el mo mengedereder el dimerkmo bo letaut a tekingel a Dios.” 18“Ngkel redil el mulsang a sel klou el beluu el mengedereder er a re king er a beluulchad.”

will be added

X\