OCHOLT 16

1E sola e ak rirengesii a klou el ngor el mlar a templo e millekoi el mor a re teuid el anghel el kmo, “Bo mochubel er a beluulchad a ikel kleuid el delluchel belatong er a ngesechel a rengul a Dios!” 2Ma kot el anghel a mlong e ochebelii er a beluulchad a delluchel belatong er a ngesechel a rengul a Dios el lulebang. Ma mekngit e meringel el kltkat a dilubech er a bedengir tirkel mlar ngii a olangch er a charm er tir me tirkel milengull er a bleob el okesiul. 3E a ongerul anghel a ulechebelii a delluchel belatong er a ngesechel a rengul a Dios el lulebang er a daob. Ma daob a di mlo ua rsechel a mla mad el chad, ma rokui el outeliil el ngar a daob a di mlad. 4E ongedel anghel a ulechebelii er a omoachel ma madedok a delluchel belatong er a ngesechel a rengul a Dios el lulebang me ng di ulebult el mo rasech. 5Ak rirengesii a anghel el oungerachel a ralm el kmo, “A blals el bla motengel a melemalt, kau el di Tal Chedaol, kau el ngikel ngar ngii e ngikel mlar ngii. 6Tulechubel a rsechir a re chedal a Dios ma re profet, me ke mla mesterir a rasech el bo lolim. Te melai a medal a omerellir!” 7E sola e ak rirengesii a ngor el tilobed er a olengetongel el kmo, “Rubak el Dios el Olab a Bek el Klisiich! Ng merang e melemalt a cho momals!” 8E a ongeual anghel a ulechebelii er a sils a delluchel belatong er a ngesechel a rengul a Dios el lulebang, me ng mlo melul er a re chad el oba kleldelel a ngeuil el kmal meringel. 9Ma re chad a meldul er tial meringel kleald, e millius er a ngklel a Dios, el ngar ngii a klisichel el chodereder a ikal ringel. Ngdi tir a di dimlak lobult a rengrir er a kngterir e loldanges er ngii. 10E a ongeim el anghel a ulechebelii er a kingellel ngikel charm a delluchel belatong er a ngesechel a rengul a Dios el lulebang. Ma ilkolk a milechelchebii a rengedel ngikel charm, ma re chad a mlo mengerkor a ungelir er a ringel el mlor tir, 11me te millius er a Dios er a eanged el kirel a ikel ringelir ma telemall er a bedengir. E ngdi dimlak lechoit a ikel mekngit el omerellir. 12Me ngikel ongelolem el anghel a ulechebelii er a klou el Omoachel Eufrates a delluchel belatong er a ngesechel a rengul a Dios el lulebang. Tial omoachel a di mlo medirt me ng mlor ngii a rolir tirkel king el ngar ongos el mei. 13E sola e ak milesterir a re tedei el mekngit el chelid el mle ua teletelel a dechedech. Ng mle tuobed er a ngerel a drakon, ma ngerel ngikel charm, ma ngerel a diak le meral profet. 14A ikei ia mekngit el chelid el meruul a mengasireng el tekoi, e tuobed el mor a re king er a beluulchad el rokir e mengideb er tir el kirel sel mekemad el mor ngii er sel klou el Sils er a Dios el Olab a Bek el Klisiich. 15“Morrenges! Ngak a mei el ua merechorech! Ng ngeltengat ngikel chad el di mekar e kerekikl a bilel me ng diak lomais el di meau me bo le merur er a buai.” 16Ma ikel mekngit el chelid a mlo kidebeterir a re king er sel lomekedo er ngii er a Hebru el kmo Armakedon. 17E ngikel ongeuid el anghel a chilebelii er a melidiul a delluchel belatong er a ngesechel a rengul a Dios el lulebang. Ma kloul ngor a mlar a kingall er a chelsel a templo el mei el kmo, “Ng mla momerek!” 18Ng mlor ngii a bisebusech, ma cherrodech, ma ngerel a derumk, ma klou el desiu. Ng dirkak a tal desiu el ua ingii er a le kot el obeob a chad el mer chelechang; tia sel delal a desiu! 19Sel meraelchisel beluu a meltiud el mo edei el bliongel, e a ikel ulekedmokl el beluu er a bek el beluu er a beluulchad a melteruud. A Dios a liltkii a chetengakl el Babilon me ng rirellii el ngilmii lochisir a kob er a ngesechel a rengul. 20A iungs el rokui a di ririid ma rois a di mlo dibus. 21A kerior a mlei, el meklou el chull el kor a bad, el mor a derdart el bond a berredel, a mirreberebet er a eanged el subechii er a re chad el millius er a Dios, el ringel er a ikal kori el chull a uchul, ele ng kmal mle kdekudel ngiil kerior.

will be added

X\