OCHOLT 15

1E sola e ak milsa kuk tar a kdekudel el olangch er a eanged, el klou e mengasireng. Ng mlar ngii a re teuid el anghel el olab a euid el kerior, el ingii a ulebongel ringel ele ng olecholt el kmo ng mereko ngesechel a rengul a Dios. 2E sola e ak milsa kor a daob el ua dirk el urrechomel er a ngau. Ak dirrek el milseterir tirkel mlo mesisiich er ngikel charm ma bleob el okesiul me sel ochur el olengchelel a ngklel. Te dilechor er bitar sel kor a daob el ua dirk, el olab a harp el le bilsterir a Dios, 3e mengitakl er a cheliteklel a Moses, el mesiungel a Dios, ma cheliteklel a Ngelekel a Sib el kmo: “Rubak el Dios el Olab a Bek el Klisiich, a urerem a meklou e mengasireng! King er a ikel beluu er a beluulchad, a rolem a melemalt e merang. 4Ng techa diak bo le mechas a rengul er kau e Rubang? Ng techa diak bo lomerk a chetengem? Ng di kau el tang a chedaol. A bek el beluu er a beluulchad a me kldibel e mengull el meluluuch er kau, ele melemalt el omerellem a di lomes a re chad el rokui.” 5Uriul er itiang e ak milsa templo er a eanged el menga chesmerel e a Chedaol Tento a mlar a chelsel. 6Tirkel teuid el anghel el ullab a euid el ringel a mle tuobed er a templo, el bliull er a beches e mengchecheldoech el mamed el bellebel a ulurir er a kolt. 7E a tar tirkel teual kerubim a milsterir a re teuid el anghel a kleuid el kolt el delluchel belatong el mui er a ngesechel a rengul a Dios, el ngii a di ngar el mo cherechar el diak a ulebengelel. 8A templo a di mlo mui er a chetul a klebkellel ma klisichel a Dios, e dimlak a chad el sebechel el mo soiseb er a chelsel a templo el dimerkmo bo le merek a ikel euid el kerior el lullab el mei a re teuid el anghel.

will be added

X\