OCHOLT 14

1E sola e ak ulemes, e milsa Ngelekel a Sib el dechor er a Rois Sion; te mlar ngii a re 144,000 el chad el ulebengkel el mle llechukl a ngklel ma ngklel a Demal er a medal a bderrir. 2E ak rirengesii a ngor el mlar a eanged el mei el ua rrekel a klou el omaoch el ralm e ua ngerel a derumk. Ng mle ua ngerel a harp el louharp a re chad er a chelitakl. 3Tirkel 144,000 el chad a dilechor er medal a kingall, ma mederir tirkel teual kerubim ma re mechuodel e milengitakl er a beches el chelitakl el di tir el tang a sebechir el suubii. Ng di tirkaikid er a beluulchad el rokir itirkel silobel. 4Tirka itirkel sechal el klikiid el dimlak a tal bo lobengterir a redil. Te mle klikiid er a deleboes. Toltirakl er a Ngelekel a Sib el mor a ikel le bor ngii. Te mla mengubet e tuobed er a chelsir a rokui el chad er a beluulchad e tir ia kot el mo modars el mor a Dios ma Ngelekel a Sib. 5Ng dirkak a tal lomulak; ng diak a tal telemellir. 6Ak dirrek el milsa kuk tar a anghel el silebek er bab er a melidiul, el oba diak a ulebengelel klumech er a Ungil Chais el mo ouchais er ngii el mor tirkel kiei er a beluulchad, el mor a bek el bedengir a re chad, ma kebliil, ma omelekoi, ma beluu. 7Ng mle klou a ngerel el dmu el kmo, “Mkebkellii a Dios e modengesii, ele ng merma belsechel el bo loukerrekeriil er a rokuil chad. Mongull el meluluuch er ngii el ulemeob er a eanged, ma chutem, ma daob, ma madedok el ralm!” 8A ongerul anghel a uleak ullel ngkel kot el kmo, “Ng mla ruebet, ng mla ruebet a Mesisiich el Babilon! Ng rirelleterir a re chad er a bek el beluu el mo melim er a imelel el bilong, sel mesisiich el ilumel er a deleboes el le ngar ngii.” 9A ongedel anghel a uleak ullir tirkel terung, el melekoi el klou a ngerel el kmo, “Ngikel mengull el meluluuch er a charm ma bleob el okesiul, e mo nguu olangch el mor a medal a bdelul ma lechub e ng chimal 10ia mo melim er a bilong er a Dios, el bilong er a ngesechel a rengul, el bla loitelii er a kob er a ngesechel a rengul el kmal mesisiich el diak lurrechomel, e mo chuarm er a ringel er a meringel a kerdel el ngau ma sulfur er mederir a re chedaol anghel ma Ngelekel a Sib. 11A chetul ngiil ngau el omekcharm er tir a di mengchat el mo cherechar. Ng diak a ulengellir er a llomes ma klebesei tirkal mengull er a charm ma bleob el okesiul, me ngikel oba olengchelel a ngklel.” 12Tia ia uchul e a re chedal a Dios a kirir el mo meduch a rengrir el outekangel, tirkel rokui el oltirakl a llechul a Dios e oumera er a Jesus. 13Ak dirrek el rirengesii a ngor el mlar a eanged el mei el kmo, “Mlechesii tiang el kmo: Chelechal mong e te ngeltengat tirkel mad er omesiou er a Rubak!” A Reng a dilu el kmo, “Choi, ng ua isei! Te ngeltengat el mo olengull er a urerir, ele olechotel a urerir a obengterir el merael.” 14E sola e ak ulemes e milsa becheleleu el eabed, e mlar ngii a tal kor a teletelel a chad el dilengchokl er ngii el mlar ngii a krone el kolt er a bdelul ma kedorm el kamang er a chimal. 15E a kuk tar a anghel a mle tuobed er a templo e uleldiu el mor ngikel dilengchokl er a eabed el kmo, “Mnguu a kamelengem el mo meridm a rodech er a sim, ele ng mocha belsechel; a beluulchad a merekang a rodech er ngii!” 16Me ngikel dilengchokl er a eabed a ngiluu a kamelengel el omir er ngii el mer a chutem, me ng di merridm a rodech er a sim. 17E sola e ak milsa tar a anghel el mle tuobed er a templo er a eanged, el dirrek el uleba kedorm el kamang. 18E a tar a anghel, el oungerachel er a ngau, a mlei el mlar a olengetongel. Ng uleldiu el klou a ngerel el mor ngikel anghel el uleba kedorm el kamang el kmo, “Mnguu a kamelengem el kuimd a redechel a dellomel el bilong er a sers er a beluulchad, ele ng mla mo mark!” 19Ma anghel a ulemir er a kamelengel er a beluulchad, el kuimd a redechel a dellomel el bilong, e midokl er a chelsel omeseokl er a bilong er a ngesechel a rengul a Dios. 20A ikal redechel a dellomel el bilong a le bilseos er a omeseokl er a bilong el ngar a ikrel a beluu, e a rasech a tilobed er ngiil omeseokl er a bilong el ulemaoch el mlo 200 el mael a klemengetel e eim el fit a delechel.

will be added

X\