OCHOLT 13

1E sola e ak milsa charm el mle tuobed er a daob. Ng mle truich a orsul e kleuid a bdelul. A ikel orsul a mle chemur a krone, e a ikel bdelul a mle llechukl er ngii a ngakl el oltuub er a Dios. 2Ngikel charm a mle ua leopard, e a ochil a ua ochil a kuma e a ngerel a ua ngerel a laion. A drakon a ulidii a klisichel, ma kingellel, ma oberberk el omerrederel el mor ngiil charm. 3A chimo er a ikel bdelul ngkel charm a di ua blo le meringel el metemall, e ngdi mla mo mechubs. A beluulchad el rokir a mlo mechas a rengul me ng mlo oltirakl er ngiil charm. 4A rokui el chad a milengull el meluluuch er a drakon, ele ng ngiluu a klisichel omerrederel el msa ngkel charm. Te dirrek el milengull el meluluuch er a charm el kmo, “Ng techa ua ia charm? Ng techa sebechel el okoad el omtok er ngii?” 5Ngkel charm a le bilecherei me ng melekoi a ngarbab el tekoi el oltuub er a Dios, e oba klisiich el mengedereder el 42 el buil. 6Me ng mlo tmaut el melebeakl er a Dios, ma ngklel, me sel le kiei er ngii, me tirkel rokui el ngar a eanged. 7Ng mlo oldechelakl er a re chedal a Dios e mo mesisiich er tir, e ngiluu a klisiich el mo mengedereder a rokui el kebliil ma beluu, ma omelekoi, ma bek el bedengir a re chad. 8A rokui el chad el kiei er a beluulchad a mo mengull er ngii, el tirkel dimlak le meluches a ngklir er a babier er a re di ngar er uchei er a lobeob a beluulchad, el ngii a babier er a Ngelekel a Sib el lulekodir. 9“Ngikel ngar ngii a dingal, lorrenges. 10Ngikel mle kirel mudechem a ulterekokl el mo mudechem; me ngikel mle kirel mo mad er a saider a ulterekokl el mo mad er a saider. Ma le ua isei e a re chedal a Dios a kirir el mo meduch a rengrir e mesisiich el oumerang “ 11E ngak a liluut el mesa kuk tar a charm el mle tuobed er a chutem. Ng mlar ngii a erul orsul el ua orsul a ngelekel a sib, e millekoi el ua ngerel a drakon. 12Ng ousbech er a klisichel omerrederel ngikel kot el charm sel le ngar medal, e rullii a beluulchad me tirkel rokui el kiei er ngii el mo mengull el meluluuch er ngikel kot el charm, el mla mo mechubs a telemall er ngii. 13Ng dirrek el meruul a meklou el mengasireng el tekoi; ng oltengel a ngau er a eanged el mer a chutem er mederir a rokui el chad. 14Me ng mengeuid er a re chad el kiei er a beluulchad, el olab a ikel mengasireng el tekoi el le kilengei er ngii me ng meruul er medal a kot el charm, me ng rulleterir el mo meruul er a bleob el okesiul ngikel kot el charm el meltemall er a saider e ngdi ng silobel. 15Ngkel ongerul charm a le kilengei er ngii me ng mo dokouii a klengar el loia er a bleob el okesiul ngkel kot el charm, me ng mlo sebechel el mengedecheduch, e mekodeterir tirkel rokui el diak longull er ngii. 16Ngkel kot el charm a urremelterir a rokuil chad, a re mekekerei, ma re meklou, ma re merau ma re mechebuul, ma re sibai ma re mimokl, me ng mo melecha olangch er a kadekmel a chimorir ma lechub e ng medal a bderrir. 17Ng diak a chad el sebechel el omechar ma lechub e ng olterau a lak tial olangch er ngii, el ngii el olangch a ngklel ngkel kot el charm ma lechub e ng ochur el olengchelel. 18Ng di mellomes a rengul a sebechel el mtebengii tiang. Ngikel sekutab a metik er a belkul sel ochur el olengchelel a charm, ele sel ochur a melutk er a chad. Isel ochur a 666.

will be added

X\