OCHOLT 12

1E sola e ng tiloech er a eanged a klou el kdekudel el olangch. Ng tal redil el uluubail er a sils, e serrochel er a buil, e telechull er a krone el ngar ngii a tacher ma teblol btuch er ngii. 2Ng sochera er a cheroll ma ngeuil ma rengelel a cheroll a ulerkedii me ng mlo klou a ngerel el oldiu. 3A kuk tar a kdekudel el olangch a tiloech er a eanged. Ng mlar ngii a imis el klou e bekerkard el drakon el kleuid a bdelul e truich a orsul, e mlar ngii a krone er a derta er a ikel bdelul. 4Ng ngiluu a kemril el orekorek a tar edeitiud er a btuch er a eanged el orebet er a beluulchad. Ng dilechor er medal ngikel redil el di kldmokl el mo menga er a ngelekel, sel lochellii. 5Me ngiil redil a milechellii a ngalek el sechal, el mo mengedereder er a beluulchad el rokir el oba skors el deel. Ngdi ngikal ngalek a di mlengai el mor a Dios e mor a kingellel. 6Ngikel redil a chiliis el mor a medideriik el ked, el le kildmeklii a Dios el kirel, el le ngar ngii e te mengedmokl er ngii el 1,260 el sils. 7E sola e ng mlor ngii a mekemad er a eanged. A Mikael ma re anghel er ngii a uluumekemad er a drakon, e ngii el drakon ma re anghel er ngii a uleldechelakl er tir; 8ngdi drakon ma re anghel er ngii a mlo mechitechut, me te mlodik el diak el sebechir el lmuut el mor a eanged. 9Ngikal kmal klou el drakon a mlodik, ngikel bersoech er a rechuodel, el ngklel a Diabelong, ma lechub e ng Satan, el mengeblad er a beluulchad el rokir. Ng mlechoit el mer a beluulchad ngii ma rokui el anghel er ngii. 10E sola e ak rirengesii a klou el ngor el ngar a eanged el kmo, “A Osobel er a Dios a mla mei! A Dios a mla ochotii er a klisichel el kmo ng King! A Mesias er ngii a chemota klisichel er omerreder! Ele ngikel dilechor er medal a Dios er kid e uleltutakl er a re bebil er kid er a llomes ma klebesei a mla modik er a eanged. 11A re bebil er kid a mlo mesisiich er ngii el oeak a rsechel a Ngelekel a Sib ma klemerang el lulemerk er ngii; e mle mimokl a rengrir el chemoit a klengar er tir e mad. 12Me bo ledeu a rengmiu, kemiu el eanged me kemiu el rokui el kiei er ngii! Ngdi ng kmal chebuul a beluulchad ma daob! Ele Diabelong a mla metengel el ekor kemiu e blekall er a klsiberreng, ele ng medengei el kmo ng di kedeb ku temel.” 13Ser a bocha lodengei a drakon el kmo ng mla dmik el mer a beluulchad, e ng mlo oldellai er ngikel redil el milechellii a ngalek el sechal. 14Ngikal redil a le bilsa erul osebekel a klou el uasi me bo le sebechel el suebek el mor a medideriik el ked el le ngar ngii e te mengedmokl er ngii el edel rak ma tedobech, el diak bo le mekesakl er a drakon. 15E a drakon a ultebedii a imui er a ngerel el mo omerius er ngikel redil. 16Ngdi chutem a ullengeseu er ngikel redil; ng tilengii a ngerel e mirrekakl a ikel ralm el tilobed er a ngerel a drakon. 17Ngiil drakon a ngilasech a rengul er ngikel redil me ng mirrael el mo oldechelakl er tirkel medechel el ngelekir a re ngelekel, el tirkel rokui el orrenges e oltaut a llechul a Dios e kerekikl el oltirakl er a klemerang el lulechotii a Jesus. Ngikel drakon a di dilechor er a rriil.

will be added

X\