OCHOLT 11

1E sola e ng mler a chimak a tetuk el kerrekar el ua olkael, e mler ngak a tekoi el kmo, “Bo moluk er a kllungel a templo er a Dios ma olengetongel, e momechur er tirkel meluluuch er a chelsel a templo. 2Ngdi diak moluk er a kllungel a mekesokes, ele ng mla mor a re Chisentael, me te mo merderd er a Chedaol Beluu el 42 el buil. 3Ak mo mesterir a klisiich tirkel terul ochotek me te mo bliull er a melebleb el bail e omerk er a klmechel a Dios el 1,260 el sils.” 4Tirkal terul ocholt a ikel teblol kerrekar el olib ma teblol blil olbidel el dechor er a medal a Rubak er a chutem. 5A lsekum ng ngar ngii a chad el melasem el omekringel er tir, e a ngau a tuobed er a ngerir e tomelleterir a re cherrouir; me sel le ua isei e ngikel melasem el melemall er tir a mo mad. 6Ng ngar ngii a klisichir el mo chosmerii a eanged me ng diak bo le chull er sel belsechel a louchais er a klmechel a Dios. Ng dirrek el ngar ngii a klisichir el chodereder a ralm e mult el mo rasech; e dirrek el ngar ngii a klisichir el chobulii a beluulchad el olab a bek el bedengel a kerior, a bo le sorir. 7Sel bo le merek el omerk a klmechir, e a charm el ngar a diak a btil deliobech a me tuobed el oldechelakl er tir. Ng mo mesisiich er tir e mekodeterir, 8e a cheklechir a di mo cheloit er a rael er a kloul beluu, el le mlad er a kerus er ngii a Rubak er tir. A ngklel sel beluu el kor okesiu a Sodom ma lechub e ng Ekipten. 9A re chad er a bek el beluu, ma kebliil, ma omelekoi, ma bek el bedengir a re chad a mo omes a ikel cheklechir el edei ma tedobech el sils e diak le kengei me bo le medakl. 10A re chad er a beluulchad a mo dmeu a rengrir er a kodellir tirkal terung. Te mo oldeu a rengrir e kaubresent, ele tirkel terul profet a mle uchul a mekloul ringel el mor a re chad er a beluulchad. 11Uriul er a edei ma tedobech el sils e a telil a klengar a mlar a Dios e metengel el soiseb er tir, me te milekiis el mo dechor; me tirkel rokui el milseterir a tilobed a delebengir. 12E tirkel terul profet a rirengesii a kloul ngor el mlar a eanged el dmu er tir el kmo, “Mngasech el mei!” Mitia er a le ngellomel er tir a re cherrouir, e te ngilasech el mor a eanged el ngar a eabed. 13E iseikid e ng mlor ngii a kmal mesisiich el desiu; a tar a truich el tiud er a beluu a di melteruud, e a re .7,000 el chad a di mlad. E a re mlo medechel el chad a kmal mlo medakt e uleldanges er a klisichel a Dios er a eanged. 14Sel ongerul kdekudel el tekoi a merekong, e ngdi ongedei a di kmedul mei. 15E sola e ngikel ongeuid el anghel a uluutrombetang, e mlar ngii a meklou el ngor el ngar a eanged el kmo, “A omerrederel a beluulchad a mla mo chederdellel a Rubak er kid ma Mesias er ngii, me ng mo mengedereder el mo cherechar!” 16E sola e tirkel 24 el mechuodel el dengchokl er a kingellir er medal a Dios a mlo terrob e mengull el meluluuch er a Dios, 17el kmo: “Rubak el Dios el Olab a Bek el Klisiich, el ngikel ngar ngii, e ngikel mlar ngii! Aki mereng a sulem ele ke mla nguu a klou el klisichem e mocha mengedereder! 18A re diak loumera er a Dios a kmal ouedikel a rengrir ele belsechel a ngesechel a rengum a mla mei, el belsechel el re mla mad a mo mukerrekeriil. Ng mla mo belsechel el moliukes er a re mesiungem, el profet, ma rokui el chedam, el tirkel rokui el mengull er kau, el meklou ma re mekekerei el di osisiu. Ng mla mo belsechel el molemall er tirkel melemall er a beluulchad!” 19Ele templo er a Dios el ngar a eanged a mlenga chesmerel, e sel Blil a Telbiil, a mloues er isei. E sola e mlor ngii a bisebusech, ma cherrodech, ma ngerel a derumk, ma desiu ma meklou el ua kori el chull.

will be added

X\