OCHOLT 10

1E sola e ngak a milsa lmuut el tar a mesisiich el anghel el mlar a eanged el me metengel. Ng mle bliull er a eabed e a orrekim a milliuekl er a bdelul; e a klidm er ngii a mle ua sils, e a ochil a mle ua chelsakl el ngau. 2Ng uleba kekerei el iluil babier el mla oboket er a chimal. Ng lilia kadekmel ochil er a daob e loia katerul ochil er a beluu, 3e ulemekedong el klou a ngerel el ua ngerel ongumk el laion. Uriul er a lomekedong, e a ikel euid el derumk a mlerrumk. 4Iser a lolekoi a ikel euid el derumk me ngak a leko kmochu meluches. E ngdi krirengesii a ngor el mlar a eanged el kmo, “Di bechei me le berrotel a ikel lullekoi a ikel euid el derumk; lak moluches!” 5E ngikel anghel el kilsang el dechor er a daob ma beluu a uldersii a kadekmel a chimal el bedul a eanged 6e rirellii a telbilel el oba ngklel a Dios, el di ngar el mo cherechar, el ulmeob er a eanged, ma chutem, ma daob, ma rokui el tekoi el ngar a chelsel, el dilu el kmo, “Ng dikea dongeteket er ngii! 7Ng di sel loutrombetang ngikel ongeuid el anghel, e a Dios a mo otutii sel berrotel el uldesuel el luluuchais er ngii er a re mesiungel el profet.” 8E sel ngor el krirengesii er a eanged a liluut el mengedecheduch er ngak el kmo, “Bo mnguu sel bloket el mle iluil babier el loba ngikel anghel el dechor er a daob ma beluu.” 9Ak mlor ngikel anghel e olengit er sel kekerei el mle iluil babier er ngii. Ng dilu er ngak el kmo, “Mnguu e mkelii; ng mo mekemim er a delem, e ngdi ng mo merekos el ua honey er a ngerem.” 10Ak ngiluu sel kekerei el mle iluil babier er a chimal e killii; ng mle merekos el ua honey er a ngerek. Ngdi uriul er ak berkeklii e ng mlo mekemim er a delek. 11E sola e ng mler ngak a tekoi el kmo, “Ng kirem el lmuut el ouchais er a klmechel a Dios el kirel a betok el beluu, ma bek el bedengir a re chad, ma omelekoi, ma re king.”

will be added

X\