FILEMON 1

1Ngak el Paulus, el kelebus el kirel a Kristus Jesus, ma Timothy el odam er kid a meluches el ekor kau e Filemon, el betik er a rengmam el de chad er a tal ureor, 2ma ruumerang el me kldibel er a blim, ma ochedad er a Afia, ma Arkipus el de dul soldau. 3A Dios el Demad ma Rubak el Jesus Kristus le beskemiu a krasia ma budech. 4Betik er a renguk el Filemon, ak di blechoel el melatk er kau e meluluuch el kirem el mereng a sulel a Dios er ngak. 5Ele kurrenges a chisel a bltkil a rengum el mor a re bek el chedal a Dios ma chisel cho moumerang er a Rubak el Jesus. 6Ma nglunguchek a kmo sel klauchad er a delongeled a ruumerang bo le rellid el mo ungil el medengei a rokui el klungiaol er a klengar er kid el ulak a delongeled kid ma Kristus. 7Betik er a renguk el odam er ngak, a bltkil a rengum a rirellak el kmal mo dmeu a renguk e silisichii a renguk! Ke mla odeu a rengrir a re bek el chedal a Dios. 8Tiakid a uchul me ng sebechek el bekeu, ele ak odam er kau el chedal a Kristus, el mesisiich el melekoi er kau me mruul a ikel kirem el meruul. 9Ngdi ngak a betik a renguk er kau, me ng diak kurrimel e bai olengit, e ngak a Paulus el omtechei er a Kristus Jesus, e chelechang e ak dirrek el kelebus el kirel. 10Mak ulengit er kau el kirel a Onesimus, el ngii a ngelekek el oltirakl er a Kristus; ele ak ngar a kelebus e mlo demal er a klengar er ngii el oumerang. 11Ser a ngar a mong e ng dimlak a belkul er kau, e ngdi chelechang e ng mocha er ngii a belkul er kau me ngak. 12Me chelechal kulluut er ngii el ekor kau, e a renguk me ng obengkel el ekong. 13Ng bai soak el orekedii er tiei, me lobengkek er chelechal kngar a kelebus el kirel a Ebangkelio, me bo le sebechel el omtechei er kau el olengeseu er ngak. 14Ngdi diak el soak el orrimel er kau me molengeseu er ngak; ng bai soak cho moruul er sel soam. Me ng diak a ngeral bo kuruul er ngii el diak lungilbesul er a rengum. 15A lta e a Onesimus a mlo cheroid er kau el di mle tedeb, me ng mo uchul e bo le sebechel el lmuut el ekong el mo obengkem el dikea ulebengelel. 16Chelechang e ng dikea di le sibai e ng bai kuk ngarbab er a sibai. Ng betik er a rengud el odam er kid el oltirakl er a Kristus. Ngika kmal klou a ultutelel er ngak, e ngdi bai lmuut el klou a ultutelel er kau ele ng sibai e dirrek el odam er kau el oltirakl er a Rubak! 17Ma lsekum ke melatk el kmo kede kaukledem, e mluut el nguu el di ua cho mngikak. 18E a lsekum ng ngar ngii a mekngit el le rirellii el kirem ma lechub e ng ngar ngii a belsel er kau, e mruul el mo belsek. 19Ngak tiang el beldoel er a oluches e meluches el kmo: Ngak el Paulus a mo mengkad er kau. (Ng diak a ultutelel el kumeklatk er kau, e ngdi mera er ngii, kau a belsek er a beches el klengar er kau el oltirakl er a Kristus.) 20Ma le ua isei e kau el odam er ngak, ak ulengit me mrellii tial ongtik el omeltkem er a Rubak a uchul; ke odam er ngak el oltirakl er a Kristus me modeuir a renguk! 21Chelechal kuluches er tial babier, e ak kmal medengei el kmo ke mo rullii tial kulengit er ngii, e medengei el kmo ng mo engelakl a omerellem er a kulengit er ngii. 22E sola e mkedmeklii a tar a delemerab el kirek, ele kmelatk el kmo a Dios a mo remenges a nglunguchiu el rokui mak lmuut el ekong. 23A Epafras, el obengkek el ngar a kelebus el kirel a Kristus Jesus a melekoi a yorosku er ngii el ekor kemiu, 24me tirkel kimdak el oureor el Markus, ma Aristarkus, ma Demas, ma Lukas me te dirrek el melekoi a yorosku el ekor kemiu. 25A krasia er a Rubak el Jesus Kristus bo lobengkemiu el rokui.

will be added

X\