FILIPI 4

1Ma le ua isei, kemiu el odam er ngak, el kmal betik er a renguk el kmal leko di kisekemiu kung, kemiu el rullak me ng dmeu a renguk, e kmal smiich a renguk er kemiu! Ng kmal kiriu el mo mesisiich el mtebechel a klengar er kemiu el oltirakl er a Rubak. 2Ak ulengit er kau el Euodia ma Sintikei, me molasem el mo ta rengmiu el ua cho modos el chedal a Rubak. 3Me kau el blak a rengum el kldemek, ak dirrek el olengit er kau me molengeseu er tirkal redil; ele te kmal mle meringel el oureor el obengkek el omerk er a Ebangkelio, tir ma Clement me tirkel rokui el kimdak el oureor, el ngklir a llechukl er a babier er a Dios el blil a ngklir tirkel oba diak a ulbengelel klengar. 4Moldeu a rengmiu el di blechoel el ngar a Rubak. Ak lmuut el dmu el kmo, moldeu a rengmiu! 5Mochotii a delemedemekerreng er kemiu el mor a rokuil chad. A Rubak a kmedu el mei. 6Lak el sebek a rengmiu er a ngii di le ngerang, e bai molengit er a Rubak er a bek el nglunguchiu, a ikel mousbech, el di blechoel el mereng a sulel. 7E a budech er a Dios, el diak el sebechel a chad el mo cherrungel el medengelii, a mo mtebechel a rengmiu ma uldesuiu el oltirakl er a Kristus Jesus. 8E a mo orekil a tekingek e rudam er ngak a kmo, bo mungil el melebedebek a ikel tekoi el ungil e rredemelel odanges; tekoi el merang, e chetengakl, e melemalt, e klikiid, e olechau a bltikerreng, e kuoll. 9Bo moruul a ikel bla msuub e ngmai er ngak, er a tekoi er a ngerek ma omerellek. E a Dios el omeskid a budech a mo obengkemiu. 10Ngar a klengar er ngak el obengkel a Rubak e ng kmal dmeu a renguk ele ng kmal meketeketang e kuk luuta el me chemolt a ulekerreuiu er ngak. Ng diak kdu el kmo ng mlo diak momekerreu er ngak, e ngdi dimlak a techelliu el ochotii. 11E diak kulekoi el ua isei ele ngak el kor a di cheloit, ele kmla mo meduch el di ungil er a renguk a ikel ngar ngii er ngak. 12Ak medengei el kmo ng ua ngera le ngar ngii a ngeral dousbech e lak er kid, e ua ngera le medeel a ikel ngar ngii er kid. Ak silubii tial bertelel a tekoi, misei e a kngar ker me ker, engdi blechoel el di ungilbesuk, a kmedinges, ma ksengerenger, ma lesal betok a ngera er ngak ma lechub e lak. 13Ng ngar ngii a klisichek el remuul a ikel rokui el mer ngak el okiu a klisiich el lomeskak a Kristus. 14Ngdi kom kmal mlo mesaul el ngilsukak er a techerelbesuk. 15Kemiu el chad er a Filipi a ungil el medengei el kmo ser a ktobed er a Masedonia er a uchelel a urerek el omerk er a Ungil Chais, e kemiu a di mle tal ikelesia el ullengeseu er ngak; ng di mle kemiu el tang a de dilak er a le ungilbesuk ma le metacherbesuk. 16Ng mlo betok er a tang el muldurokl el mer ngak er a Thesalonika a ngelsumiu er a bo le metacherbesuk. 17Ng diak di le soak el melai a ngera er kemiu; ng bai soak el mes a klungioliu el mo betok el dechelel a ungil tekoi el bla mruul. 18Me tiakid a olechotel a ikel bek el muldurokl el mer ngak, el kmal mlo oumeder! Ng ngar ngii a rokui el kuusbech er chelechal bla lengai a rokui el uldurekliu el mei a Epafroditus. Ng ua ungil a bul el tenget el mor a Dios, el uldars el odeuir a rengul. 19A Dios er ngak a mo meskemiu a ikel rokui el mousbech, el oltirakl er a iltetel er a klebkall el oeak a Kristus Jesus. 20A klebkall le bor a Dios er kid el Demad el mo cherechar. Amen. 21Yorosku el mor a re bek el chedal a Dios ma Kristus Jesus. A rudam er kid er tiei el kimdak a dirrek el melekoi a yorosku er tir. 22A rokui el chedal a Dios a melekoi a yorosku er tir el ekor kemiu, e a ngar uchei e a ngar tirkel ngar a blil a merreder er a Rom. 23A krasia er a Rubak el Jesus Kristus bo lobengkemiu el rokui.

will be added

X\