FILIPI 3

1A mo orekil a tekingek e rudam er ngak, a kmo moldeu a rengmiu er a Rubak. Ng diak le metacherbesul er a renguk a kumelekl a ikel di bla kluches, ng bai mo klungioliu a kumelekl. 2Me mongkar er kemiu er tirkel chad el meruul a mekngit el tekoi, el tirkel kor a charm, el olsibes a tekingir el omotk olangch er a bedengir. 3Ng kid, el diak el tir, a meral mla obotk, ele kede mengull el meluluuch er a Dios el okiu a Reng er ngii e oldeu a rengud er a klengar er kid el oltirakl er a Kristus Jesus. Ng diak dultuil a tekoi er a ikrel a bedenged. 4Ngak a ulterekokl el sebechek el mo oumeral ultuil a ua isei el tekoi. A le ngar ngii a chad el omdasu el kmo ng sebechel el oumera el ultuil er a tekoi el meruul er a ikrel a bedengel, e ngak a lmuut el klou a mo uchul e ng kirek el omdasu el ua isei. 5Ak ulebotk er a tal sandei er uriul er a kmechell. Ak mlechell el chad er a Israel, el chad er a kleblillel a Benjamin, el bliochel a rsechek el Hebru. E a de nguu er a otutel a Llach er a re chad er a Judea, e ngak a mle Farisi, 6el kmal mle blak a renguk ma kuleldechelakl er a ikelesia. A de nguu er a rolel a mo ungil er a rengul a Dios el okiu otireklel a Llach, e ng dimlak a tal telemellek. 7Ngdi ikel rokui el tekoi el kulemasech el klungiolek a kchoit el di mo diak a belkul er ngak er chelechang el Kristus a uchul. 8Ng diak di likeikid el tekoi e le merekong; a rokui el tekoi a diak a belkul er ngak a kulatk er sel lmuut el kmal klou a belkul el tekoi el kmo, ak mo medengelii a Kristus Jesus el Rubak er ngak. Ng ngii a uchul mak mla chemoit a rokui el tekoi; ak umes el di ua le besbas kung, ma meral klungiolek a di mo Kristus, 9e ngak a mo cherrungel el chedal. Me ng dikea rolek el mo ungil er a rengul a Dios el okiu otireklel a Llach. Chelechang e ak mla mo ungil er a rengul a Dios el okiu a kmo ak uumera er a Kristus, el okiu sel roled el mo ungil er a rengul a Dios el ngii a uchul, ele kedoumerang. 10Sel di tal tekoi el soak a kmo, bo kudengelii a Kristus e bo kchermii a klisichel okisel er a kodall el oureor er a klengar er ngak, e bo kcharm a ringelel el obengkel, e bo kua ingii er a kodellel, 11me ng mo sebechel, e ngak me kdirrek el mo mokiis er a kodall. 12Ng diak kumasech er ngak el kmo ak mla kudmeklii tial tekoi er a klengar er ngak ma ka bla kmecherrungel er a ungial a blekerdelek. Ak melemolem el meduch a renguk el mo melai er sel nguked el ngii a uchul ma Kristus Jesus a mla ngoikak el mo chedal. 13Kemiu el odam er ngak, ng diak kumdasu el kmo ak mla nguu; a di tal tekoi el kuruul er ngii a kmo, ak ubes a ikel mla mo merek el tekoi e mor a ikel tkul er bab el sebechek el kirel a ikel ngar medad. 14Misei e ak remurt el melemalt el mo bedul sel ulterekokl el tekoi el kirek el mor ngii el kirel me bo knguu a nguked, el ingii a okedongel a Dios el okiu a Kristus Jesus el mor sel meral klengar. 15Kid el rokui el mla mo ultebechel er a tekoi er a reng a kirel a uldesued el mo ua isei. Ngdi lsekum a re bebil er kemiu a ngodech a uldesuir, e a Dios a mo meketeklii er kemiu. 16Ngii di bo le blak a rengud el oltirakl a ikel bla bo dodengei. 17Molemolem el mesuub a blekerdelek, kemiu el odam er ngak. Bo le beiusech a osengiu er tirkel oltirakl er a melemalt el omeruul el bla ki beketeklii el kiriu. 18Ng mla mo betok el kulekoi er kemiu er tial tekoi, e chelechang e ak lmangel e lmuut el meleklii el kmo, te betok tirkel blekerdelir a ua isei, el rullii el mo diak a ultutelel a kodellel a Kristus er a kerus. 19Uriul e te mor a beluu er a ngau, ele touchelid a ikel di soal a bedengir ma rengrir. Tousimang a ikel tekoi el kirir el merur er ngii, e di omdasu a di tekoi er tial beluulchad. 20Ngdi meral beluad a ngar a eanged, me kede semeriar el mengiil er a Osebeled, el Rubak el Jesus Kristus, el ngar a eanged el mei. 21Ng mo ngmodech a ikal bedenged el mechitechut e di mo nguemed, e remuul el mo ua bedengel el ungil e diak le metemall, el ousbech er sel klisiich el ngar ngii er ngii me ng sebechel el odak a rokui el tekoi e mo mengedereder.

will be added

X\