FILIPI 1

1Ngak el Paulus ma Timothy, el mesiungel a Kristus Jesus, a meluches el— Mor a rokui el chedal a Dios el ngar a Filipi el oltirakl er a Kristus Jesus er a klengar er tir, me tirkel mengeteklel a ikelesia me tirkel olengeseu er tir el kmo: 2A Dios el Demad ma Rubak el Jesus Kristus le beskemiu a krasia ma budech. 3Ak mereng a sulel a Dios er ngak, sel bek el kulebedebek er kemiu; 4e sel tal bo kululuuch el kiriu e ak meluluuch el dmeu a renguk, 5ele ng ungil a renguk er kemiu el ullengeseu er ngak el omerk er a Ebangkelio er a uchelel el mer chele-chang. 6Mak ungil el medengei el kmo a Dios el ngii a ulemuchel er tial ungil el ureor er a chelsiu a mo lomelemii el mo rokir er sel Sils er a Kristus Jesus. 7Ng ungilbesul a le ua isei a renguk el kiriu ele kdi blechoel el omdasu er kemiu! Ele kemiu el rokui a mlo kldemek er tial ureor el le bilskak a Dios, er chelechal kkelebus me ser a dirk kmededaes el mesaod er a Ebangkelio e melalem er ngii el mo mesisiich. 8A Dios a medengel kmo ak melekoi a meral tekoi sel kdu el kmo ng betik a renguk er kemiu el ua bltkil a rengul a Kristus Jesus er kemiu. 9A nglunguchek a kmo a bltikerreng er kemiu le mengal mo klou, e bo mungil medengei a klemerang e meduch el melilt a ungil ma mekngit, 10me bo le sebechiu el ngmilt a ikel kot el ungil. Seikid e kom mo klikiid e diak a ultelechakl el ekor kemiu er sel Sils er a Kristus. 11A klengar er kemiu a mo meruul el kmal mo ungil er a rengul a Dios el okiu a Jesus Kristus, el kirel a klebkellel ma odengesel a Dios. 12Ng soak cho bo modengei kemiu el odam er ngak el kmo, a ikel meringel tekoi el blo kcharm er ngii a bai mla ngosuir el merekii a Ebangkelio, 13me te di mla mo medengei a rokui el chad el mengkar er a blil a king, ma rokui el chad el ngar tiei el kmo ak kelebus ele ng ngak el mesiungel a Kristus. 14Me toumesingd er a re bebil er kid er tiei a mla mo bekeu a rengrir el Rubak a uchul ele ng ngak el kelebus, me te kmal bekengang el ouchais a tekingel a Dios el diak le medakt. 15Ng ua isei el bebil er tir a ouchais a chisel a Kristus ele te mechechei e sorir el mengaiuechit er a tar a chad, e ngdi re bebil a meral oba ungilreng. 16Tirkaikid a meral oba bltikerreng el oureor ele te medengei el kmo a Dios a milskak a ureor el kirek el mesaod er a Ebangkelio. 17Tirkel bebil a diak le mera er a rengrir el olisechakl a chisel a Kristus e ngdi tolisechakl ele ng sorir el mengaiuechit er a re chad. Tomdasu el kmo a le ua isei e te mengal omekringel er ngak ak kelebus. 18Ng diak a ultutelel a le ua isei! Ngii di loberk a chisel a Kristus, a le mera er a rengrir a re chad ma lak. Seikid el loberk el oeak a ngii di le rael a dmeu a renguk er ngii. Ak di melemolem el dmeu a renguk, 19ele kmedengei el kmo a nglunguchiu ma ngelsuil a Chedaol Reng er a Jesus Kristus a mo osebelak. 20Ak kmal omdasu e oureng el kmo, ng diak bo kmerur e ktemellii a urerek, e bai mo mesisiich a renguk er chelechang el di ua bek el sils mak mo olecholt er a klebkellel a Kristus er a bedengek, a di kchad ma kmad. 21Ele ng ngera ultutelel a klengar? A le ngak, e a klengar a Kristus. E a kmad e ng lmuut el ungil. 22Ngdi lsekum a kulemolem el dirk chad e ng sebechek el remuul a betok el meklou a ultutelel el ureor, e ng dikea kudengei el kmo ng ngera er ngii a bai ungil. 23Ng mla mo eru renguk. Ng sokok el mo ikrii tial klengar e mo obengkel a Kristus, ele ng kuk bai ungil tekoi; 24ngdi ng kemiu a uchul e ng lmuut el klou a ultutelel a dirk kchad el obengkemiu. 25Ak di ungil el medengei el kmo ng ungil a di kkiei el obengkemiu el rokui, ele ng mo uchul a ulekeruliu ma deuil a rengmiu el oumerang, 26me sel kluut el ekong e lesal mo ungil a rengmiu er ngak er a klengar er kemiu el oltirakl er a Kristus Jesus. 27Chelechang e a klou a belkul a kmo, a klengar er kemiu a kirel el mo rredemelel a Ebangkelio er a Kristus, ma bo le sebechek el eko mesekemiu ma lak, e ngii di bo krenges a chisiu el kmo kom outekangel el diak mtuchakl e ta rengmiu, e ta uldesuiu el dmak el merengmiu el mesebechakl er a Ebangkelio. 28Lak bo medakt er a re cherrouiu; di blechoel el mesisiich a rengmiu, e tia mo ochotii er tir el kmo te mo mechitechut e kemiu a mo mesisiich, ele ng Dios a meruul er kemiu el mo mesisiich. 29Ele kom rruul el kiriu el mesiou er a Kristus, el diak di moumerang er ngii e le merekong, e ko bai dirrek el chuarm el kirel. 30Kom ngar osisiu el mekemad el ua ingak. Ng sel osisiu el mekemad el kmlar ngii er a ngar a mong e chelechang e kom orrenges el kmo ak dirk ultaut er ngii.

will be added

X\