MATEUS 9

1A Jesus a mlo doiderekl er a bos e mo imuul er a bital daob el mor a belual. 2Ma le bong e a re bebil chad a ngiluu el mor ngii a tal chitechut el chad el mechiuaiu er a dusall. Ma Jesus er a lesa el kmo te kmal uluumerang, e ng dilu er ngii el chitechut el kmo, “Rungalek, lak medakt! A kngtim a mla musubes.” 3Itia e a re bebil sensei er a Llach a katekinga el kmo, “Ngikal chad a melekoi a otubel a Dios!” 4A Jesus a mle medengei a ngar a uldesuir me ng dilu el kmo, “Ng ngera me kom melebedebek a ua isel mekngit el tekoi? 5Ng bai beot a de dul kmo, A kngtim a mla musubes’, ma lechub e de dul kmo, ‘Bekiis e morael’? 6A le ua isei e ak mo ochotii er kemiu el kmo a Ngelekel a Chad a ngar ngii a klisichel er a beluulchad el ousubes a klengit.” Tiaikid e ng dula er ngii el chitechut el chad el kmo, “Bekiis el nguu a dukllem, e morael el mor a blim!” 7Me ng milekiis ngiil chad el merael el mor a blil. 8Ma re chad er a lesa ngiil tekoi, e te mlo medakt, e uleldanges er a Dios el ngiluu a ua isel klisiich el mesterir a re chad. 9Ma Jesus a tilobed er isei el merael, ma le ngar a rael e ng milsa chad er omelai el tax el Mateus a ngklel el ngar obis er ngii. Me ng dilu er ngii el kmo, “Me moltirakl er ngak.” Ma Mateus a milekiis el merael el obengkel. 10A Jesus er a lomengur er a blil a Mateus, e te betok el chad er omelai el tax ma re kuk bebil er a re mekngit a chisir el chad a mlong, me tulebengkel a Jesus ngii ma rubengkel el omengur. 11E a re bebil Farisi a milsa tial tekoi me tuleker er a rubengkel a Jesus el kmo, “Ng ngera uchul ma sensei er kemiu a omengur el obengterir a re ua isel chad?” 12A Jesus a rirengesterir me ng dilu el kmo, “A re diak el secher el chad a diak lousbech er a toktang; ng bai tirkel smecher ousbech er ngii. 13Ka bo morriter er a belkul sel Chedaol Llechukl el melekoi el kmo, ‘Ng soak a klechubechub; ng diak el tenget el charm.’ Ngak a dimlak kmei el me omekedong er a re diak a telemellir el chad; ak bai mlei el me omekedong er a re ngar ngii a kngterir.” 14E sola e a rubengkel a Johanes el Chad er a Techolb a mlor a Jesus e oker el kmo, “Ng ngera uchul me kemam ma re Farisi a mekudem el olsengerenger, e a rubengkem a diak?” 15Ma Jesus a dilu el kmo, “Kom omdasu el kmo tirkel chad el ngar a blengur er a merengel a chebechiil a mekngit a rengrir sel le dak tir me ngikel chad el mlo bechiil? Ng ulterekokl el diak le ua isei! E ngdi sel bo le mengai er a delongelir ngikel chad el mlo bechiil, e seikid kung e te mo olsengerenger. 16“Ng diak a melabek er a mechut el bail el oba beches el mamed, ele sel beches el tabek a le mekurs e ng mengal mo kilungii a telat er sel mechut el bail. 17Ma ka chad el oleitel a beches el bilong er a mechut el blil a bilong, ele le mesodel e a bilong a mechubel, ma blil a metemall. Ng bai kirel a beches el bilong el dolecha er a beches el blil a bilong me ng dul ungil kldmokl.” 18Me ng dirk mengedecheduch a Jesus, e a tal mengeteklir a re chad er a Judea a mlor ngii e mlo outubuach er medal e dmu el kmo, “A ngelekek el redil a dirk mlad; ngdi mei me bo mlecha chimam er bebul me lluut el mo chad.” 19Me ng milekiis a Jesus el obengkel el merael, ma rubengkel a Jesus me te dilak el merael. 20E a tal redil el mla mo truich ma erul rak el le secher el merael a rasech er ngii a mlor ullel a Jesus e rirtechii a rsel a bilel. 21Ng millekoi er a rengul el kmo, “Chomko kdi rutechii a bilel, e ak mo ungil.” 22A Jesus er a le beltii e ng milsang me ng dilu el kmo, “Lak medakt e rungalek! Kau oumerang me ke mocha ungil.” Ng di mle seikid e ngii el redil a mlo ungil. 23E sola e a Jesus a mlor a blil ngikal ofiser. Ser a leseterir tirkel outumetum er a kemeldiil ma re bek el chad el di mengerodech, 24e ng dilu el kmo, “Bo mtobed el rokui! Ngikal kekerel redil a dirkak le mad; ng di mechiuaiu!” Tiaikid e tulecherechur el melenguul er ngii. 25Me tia er a lotebedeterir a re chad el mor rikl, e a Jesus a mlor a delemerab er ngii el ngalek e ulerekedii a chimal, me ng milekiis. 26Ma chisel ngiil tekoi a uleberk er isel beluu el rokir. 27Ma Jesus a tilobed er isei el merael, ma le ngar a rael e a re terul meiko a mocha oltirakl er ngii. Tuleldiu el kmo, “Bo mchebkemam, kau el Ngelekel a David!” 28Me ser a bo le siseb er a blai a Jesus, e tir el meiko a mlor ngii me ng uleker er tir el kmo, “Kom oumera el kmo ng sebechek el omekungil er kemiu?” Me te dilu el kmo, “Ochoi, e Rubang!” 29Itia e a Jesus a rirutech a mederir e dmu el kmo, “Mada sel moumera er ngii le meruul el ekor kemiu!” 30Me te mlo omes. Ma Jesus a kmal milengelechel er tir el kmo, “Kele mouchais er tial tekoi er a ngii di le chad!” 31E a lechub e te tilobed el merkii a chisel a Jesus er isel beluu el rokir. 32Ma lorola tir el chad, e a re kuk bebil er a re chad a ngiluu el mor a Jesus a tal chad el diak el sebechel el mengedecheduch ele ng teluchel er a mekngit el chelid. 33Ma Jesus er a lotebedii ngiil mekngit el chelid, e ngiil chad a mocha mengedecheduch, ma re bek el chad a mlo mechas a rengrir. Te millekoi el kmo, “Ng kmal dirkak a tal desa ua tial tekoi er a chelsel a Israel!” 34Ngdi re Farisi a millekoi el kmo, “A merreder a mekngit el chelid omsa klisiich el oltobed a mekngit el chelid.” 35A Jesus a milliuekl el oldingel a bek el meklou ma mekekerel beluu. Ng ullisechakl er a blil ongdibel, e ulemerk er a Ungil Chais el kirel a Rengedel a Dios, e ulemekungil er a re chad el mle smecher er a bek el bedengel a rakt. 36Ser a lesa seked er a re chad, e ng kmal mlo mekngit a rengul er tir, ele ng mle suebek a rengrir e metacherbesrir, el ua sib el diak a mengkerengel. 37Mitia e ng dilu er a rubengkel el kmo, “A sim a klou, e ngdi re chad er a ureor a di mekesai. 38Moluluuch er a Rubak er a sim me lodercheterir a re chad er a ureor el mor omeridm er a sim er ngii.”

will be added

X\