MATEUS 8

1A Jesus er a le ngar a rois el me metengel e a re betok el chad a ulebengkel. 2Ma tal chad el mle chebedes a mlor ngii el mo outubuach er medal e dmu el kmo, “Rubak, chomko ng soam, e ng sebechem el rullak el mo klikiid.” 3Ma Jesus a mlo rutechii e dmu el kmo, “Ng soak. Bo mklikiid!” Me ngiil chad a di mlo ungil er a rektel. 4Mitia e a Jesus a dilu er ngii el kmo, “Morrenges! Alii kele mouchais kung er a ngii di le chad, e bai di melemalt el mor a re prist me lesekau; e sola e bo mtengetengii a lolekoi er ngii a Moses el tenget, el olecholt el mor a re bek el chad el kmo ke mla mo ungil er a rektem.” 5A Jesus er a le bor a Kapernaum, e a tal ofiser er a Rom a ulsiueklii e olengit er ngii el kmo: 6“Rubak, a mesiungek a smecher el ngar a blai el di mechiuaiu, e diak el sebechel el mengitengtik e kmal chuarm er a ringel.” 7Ma Jesus a dilu el kmo, “Ak mong e omekungil er ngii.” 8Me ngiil merreder er a re soldau a dilu el kmo, “Rubak, ng diak. Ng kor a metacherbesul cho mer a blik. Bai di mdu tekingem, e bo lungil a mesiungek. 9Ngak a dirrek el ngar eungir a re ngarbab el merreder er a re soldau, e ngar ngii a re soldau el ngar eungek, ma kdu er a tang el kmo, ‘Bong!’ e ng mong; ma kdu er a tang el kmo, ‘Mei!’ e ng mei; ma kdu er a sibik el kmo, ‘Mrellii tiang!’ e ng rullii.” 10A Jesus er a le renges a ikal tekoi e ng kmal mlo mechas a rengul me ng dilu er a re chad el le dilak el kmo, “Ak uuchais er kemiu el kmo ng kmal dirkak kbetik er a tal chad er a beluu er a Israel el oumerang el ua isei. 11Mak meral subedemiu el kmo te betok el chad a ngar ongos ma ngebard el mei el mo dengchokl el obengkel a Abraham, ma Isak, ma Jakob el ngar sel klou el mur er a Rengedel a eanged. 12E ngdi tirkel meral mle kirir el ngar a chelsel ngiil Renged a mo obidokl el mor a chelsel a ilkolk, me te mo lmangel e olengchongch a ungelir.” 13Tiaikid e a Jesus a dula er ngii el merreder er a re soldau el kmo, “Morael el mor a blim, e sel moumera er ngii a mo meruul el ekor kau.” Ng di mle seikid el longedecheduch a Jesus e a mesiungel ngiil merreder er a re soldau a mlo ungil. 14A Jesus a mlor a blil a Petrus e mesa delal a bechil a Petrus el mechiuaiu er a dusall el smecher el kmal mlar bab a kleldelel. 15Me ng urrekedii a chimal me ng di silebek a kleldelel, me ng milekiis el mocha meruul er a blengur er a Jesus. 16E a bocha le kebesengei, e a re chad a ngilititerir a re betok el blekall er a mekngit el chelid el mor a Jesus. Ma Jesus a uleba di tal tekoi e oltobed ngii el mekngit el chelid e ulemekungil er tirkel rokui el silecher. 17Tial le rirellii a ultutii sel lullekoi er ngii a Profet Isaia el kmo, “Ngii a ngilai a sechered ma rekted el choroid.” 18A Jesus er a lesa klou el seked el mocha meliuekl er ngii, e ng dilu er a rubengkel me te mo imuul er a daob el mor a bitang. 19E a tal sensei er a Llach a mlor a Jesus e dmu el kmo, “Sensei, ngak a kldmokl el obengkem el mor sel bor ngii.” 20Ma Jesus a dilu er ngii el kmo, “A fox a ngar ngii a kliokl el le bor ngii, ma suebek el charm a ngar ngii a lukel, e ngdi Ngelekel a Chad a diak a bo le mechiuaiu er ngii e olengull.” 21E a kuk tar a chad el uleltirakl er a Jesus a dilu el kmo, “Rubak, bechikak me kumuchel el mo doklii a demak, e bochu kubengkem.” 22Ma Jesus a dilu el kmo, “Me mobengkek, e bechititerir a rulekoad me lolakl er a re mla mad.” 23A Jesus a mlo ngmasech er a bos ma rubengkel a uleltirakl er ngii. 24E di mle mereched el mor ngii a mesisiich el eolt er ngiil daob ma bos a kilong mesecheseb. E a Jesus a milechiuaiu. 25Ma rubengkel a mlor ngii e olekiis er ngii el kmo, “Rubak, mosebelid! Kede medkung!” 26Ma Jesus a dilu el kmo, “Ng ngera me kom kmal medakt? Kemiu a meral diak moumerang er ngak!” E sola e milekiis el dmu er a eolt ma daob me ng mo chelellakl, me ng kmal mlo meiusech. 27Ma re bek el chad a mlo mechas a rengrir. Te dilu el kmo, “Ngika ng kuk ua ngeral chad ma eolt ma daob orrenges a tekingel?” 28A Jesus er a bo le iuul er a daob el mor a bitang el mor a beluu er a Gadara, e a re terul chad a mlar olekull el mo olsiuekl er ngii. Tirkal chad a mle telechull er a mekngit el chelid me te kmal mle kdekudel, ma re chad a mle medakt el oeak isel rael. 29Tirka di uleldiu e kmo, “Ng ngera soam er kemam, kau el Ngelekel a Dios? Ke mle omals er kemam er uchei er sel telutk el belsechel?” 30E mlar ngii a klou el delebechel el babii el menga er bitar isei. 31Me ngiil mekngit el chelid a ullengit er a Jesus el kmo, “A lsekum koltobed er kemam, e moderchemam el mo soiseb er a ikel babii.” 32Ma Jesus a dilu er tir el kmo, “Bong”; me te tilobed el mo soiseb er ngiil babii. Me ngiil babii el rokui a rirurt el mo metengel er a kiuesall el mo ruebet er a daob el remos. 33Ma re chad el milengkar ngiil babii a chiliis el mor a chelsel a beluu, e uluuchais a ikel tekoi el dilubech, ma chisir tirkel chad el mle telechull a mekngit el chelid. 34Ma re bek el chad er ngii el beluu a tilobed el mo olsiuekl er a Jesus; me ser a lesang, e te kmal ullengit er ngii me lorael el mo cheroid er a belurir.

will be added

X\