MATEUS 7

1“Lak moukerrekeriil er a re chad, me lak bo loukerrekeriil er kemiu a Dios, 2ele Dios a mo oukerrekeriil er kemiu el di ua iser cho moukerrekeriil er a re chad; ng mo meruul el ekor kemiu a ikel murruul el mor a re chad. 3Ngera uchul me komes er a chieb er a medal a tar a chad e diak mkerekikl er a kerrekar el ngar a medam? 4Ke mekera e di bekeu el dmu er a tar a chad el kmo, ‘Msall e knguu a chieb er a medam.’ a le ngar ngii a kerrekar el ngar a medam? 5Ke cheblad el chad! A kot e mnguu a kerrekar el ngar a medam me bo le bleketakl osengem e molai ku er a chieb er a medal a tar a chad. 6“Lak moba chedaol klalo el omsa bilis, e ng mo lobult el odelecheklemiu. Lak momidokl a ngisel a chesiuch er medal a babii e ng mol roderd. 7“Molengit, e kom mo ngmai; mosiik, e kom mo metik; molngod er a chesimer, e ng mo mengai el kiriu. 8Ele ngikel olengit a mo nguu a lolengit er ngii, me ngikel osiik a mo metik er a losiik er ngii, ma chesimer a mo mengai el kirel ngikel melngod er a chesimer. 9Ngar ngii er kemiu a ruungalek a mo omsa bad a ngelekel a lolengit er a blauang? 10Ma lechub e kom mo omsa bersoech a lolengit er a ngikel? 11A lsekum kom mekngit, e meduch el omesterir a re ngelekiu a ungil, e a Demmiu el ngar a eanged a bai ngar uchei el mesterir a ungil klalo tirkel olengit er ngii! 12“Moruul el mor a re chad a ikel somiu a loruul el ekor kemiu, tiaikid a lolekoi er ngii a Llach er a Moses ma osisecheklir a re profet. 13“Bo msiseb er obutek el siseball, ele siseball el mor a tellemall a meteu e beot a rael el mor ngii, me te betok el chad a merael er ngii. 14Ngdi siseball el mor a klengar a obutek e meringel a rael el mor ngii, me te di kesai el chad a metik er ngii. 15“Mongkar er kemiu er a re diak le meral profet; te mer kemiu el ua teletelel a sib, e ngdi chelsir a ua tebelik el lbolb. 16Kom mo medengelterir el okiu omerellir. A tochedulik a diak lourodech a kreip, ma beritechetoched el dellomel a diak lourodech a redechel a fig. 17A ungil a dbechel el kerrekar ourodech a ungil rodech, ma mekngit a dbechel el kerrekar ourodech a mekngit el rodech. 18A ungil a dbechel el kerrekar a diak el sebechel el ourodech a mekngit el rodech, ma mekngit a dbechel el kerrekar a diak el sebechel el ourodech a ungil rodech. 19Ma ngii di le kerrekar el diak lourodech a ungil rodech a mo medebes e obidokl er a chelsel a ngau. 20Me ng ua isei, kom mo medengelterir a re diak le meral profet el okiu omerellir. 21“Ng diak le tirkel rokui el omekedong er ngak el kmo ‘Rubak, Rubak’ a mo soiseb er a Rengedel a eanged, ele re mo soiseb er a Rengedel a eanged a di tirkel meruul a soal a Demak el ngar a eanged. 22Sel le me Sils er a Kerrekeriil, e te betok a mo dmu er ngak el kmo, ‘Rubak, Rubak! Aki uleba ngklem el mengedecheduch a tekingel a Dios, e uleba ngklem el oltobed a mekngit el chelid e meruul a mengasireng el tekoi!’ 23Isei e ak mo dmu er tir el kmo, ‘Ng kmal dimlak kudengelkemiu. Bo mcheroid er ngak, kemiu el mekngit el chad!’ 24“Isei e ngikel orrenges a tekingek e olab a ua mellomes a rengul chad el omekedechor er a blil er bebul a risois, 25ma le me chull, e le bor ngii a eeleb, e bo le meses a eolt el mo subechii er ngii el blai, e ng diak le muukel, ele ng dechor er a risois. 26“E ngdi ngikel orrenges a ikal tekingek e diak bo lolab a ua kebelung el chad el omekedechor er a blil er a chelechol; 27me sel le me chull, e le bor ngii a eeleb, e bo le mesisiich a eolt el mo subechii er ngii el blai, e ng di muukel el rokir!” 28Ser a bo le merek a Jesus el mengedecheduch a ikal tekoi, e a re chad el mle meseked a mlo mechas a rengrir er ngii a lolisechakl. 29Ng dimlak lolisechakl el ua re sensei er a Llach; e ng bai mlar ngii a klisichel osisecheklel.

will be added

X\