MATEUS 4

1Itia e a Chedaol Reng a milekrolii a Jesus el mor a ked el bo longarm er ngii a Diabelong. 2A Jesus a mlo songerenger ele ng mle 40 el klebesei el di diak lomengur. 3Ma Diabelong a mlor ngii e dmu el kmo, “Chom Ngelekel a Dios, e mdu er a ikal bad me lobult el mo blauang.” 4Ma Jesus a dilu el kmo, “A Chedaol Llechukl a kmo, A klengar er a chad a diak di lultuil er a kall e le merekong; ng dirrek el ultuil er a bek el tekoi el tuobed er a ngerel a Dios.’” 5Mitia e a Diabelong a ngiluu a Jesus el mor a Jerusalem el chedaol beluu, e milekedecherur er a chetebtel a Templo, 6e dmu er ngii el kmo, “Cho mNgelekel a Dios, e msechesokl el mor iou, e a Chedaol Llechukl a kmo, A Dios a mo odercheterir a re anghel er ngii me te mo tikeuau; me ng mo lmuut er ochim me ng diak bo le metemall er a bad.’” 7Ma Jesus a dilu el kmo, “A Chedaol Llechukl a dirrek el melekoi el kmo, ‘Lak mongarm er a Rubak el Dios er kau.’” 8Ma Diabelong a ngiluu a Jesus el mor a kmal kedidai el rois e ulecholt er ngii a rokui el rengedel a beluulchad ma bek el klebkellel, 9e dilu el kmo, “A ikal rokui a bo kbeskau a lsekum ke mo outubuach el mengull el meluluuch er ngak.” 10Mitia e a Jesus a dmu er ngii el kmo, “Mcheridau e Satan! A Chedaol Llechukl a kmo, ‘Mongull el meluluuch er a Rubak el Dios er kau, e di le ngii el tang cho mosiou er ngii!’” 11Ma Diabelong a mlo cheroid er a Jesus, e a re anghel a mlong me tolengeseu er a Jesus. 12A Jesus er a le renges el kmo a Johanes a mla mekelebus, e ng mirrael el mor a Galilea. 13Ng dimlak bo le kiei er a Nasareth, e bai mlo kiei er a Kapernaum el beluu er bita er a Daob er a Galilea, el ngar a rengedel a Sebulun ma Naftali. 14Tiaikid otutii sel lullekoi er ngii a Profet Isaia el kmo, 15“Beluu er a Sebulun ma beluu er a Naftali el ngar a rael el mor a daob er sel bital Jordan, Galilea, el belurir a re Chisentael! 16A re chad el kiei er a chelsel a ilkolk a mo mesa klou el llomes. Tirkel kiei er a milkolk el beluu er a kodall a bo le diich er tir a llomes.” 17Seikid e a Jesus a ulemuchel el olisechakl el kmo, “Mobult el mo cheroid er a kngtmiu, ele Rengedel a eanged a kmedang!” 18A Jesus er a lorerorael er bita er a Daob er a Galilea e ng milseterir a re terul udam el Simon (el dirrek el Petrus a ngklel) ma tar ngii er a Andreas el ngar a daob el mengesokes. Tirka mle chad er omenged. 19Ma Jesus a dilu er tir el kmo, “Me mobengkek, e ak mo rullemiu el mo mengesokes er a re chad.” 20Me te di mileche ukedir e mo obengkel el merael. 21Ma lorolang e ng dirrek el milseterir a re terul udam el Jakobus ma Johanes el ngelekel a Sebedeus. Tir ma demerir er a Sebedeus a mlar a bos er tir el melabek a ukedir. Ma Jesus a ulemekedong er tir 22me te di chilitii a bos ma demerir, e mo obengkel el merael. 23A Jesus a ulemais er a Galilea el rokir el olisechakl er a blil ongdibel, e mengedecheduch a Ungil Chais el kirel a Rengedel a Dios, e omekungil er a re chad el mle smecher er a bek el bedengel a rakt. 24A chisel a uleberk er a beluu er a Siria el rokir, me te ngilititerir a rokui el smecher el mor ngii el bek el bedengel a rektir, a re blekall er a mekngit el chelid, ma re bellek, ma re chitechut, me ng ulemekungil er tir el rokui. 25Ma meklou el seked a mlar a Galilea, ma Truich el Beluu, ma Jerusalem, ma Judea, ma beluu er a bital Jordan el mo oltirakl er a Jesus.

will be added

X\