MATEUS 3

1Uriul er a betok el rak e a Johanes el Chad er a Techolb a mlor a ked er a Judea e omuchel el olisechakl. 2Ng dilu el kmo, “Mobult el mo cheroid er a kngtmiu, ele Rengedel a eanged a kmedang!” 3A Johanes a ngii el chad el lullekoi er ngii a Profet Isaia er ser a ledu el kmo, “Ng ngar ngii oldiu er a ked el kmo, ‘Mkedmeklii a rolel a Rubak; mlemeltii a rael el bo loeak ngii!’” 4A Johanes a uluubail er a bail el rruul er a bsechel a charm el kiamo, e uluulekesongel er a budel a charm, e di milenga chebud ma honey er a ked. 5A re chad er a Jerusalem, ma renged er a Judea el rokir, me sel beluu el rokir el ngar bita er a Omoachel Jordan a mlor a Johanes. 6Tullecholt a kngterir, me ngii a millecholb er tir er a Jordan. 7A Johanes er a leseterir a re betok el Farisi ma re Sadusi el mlor ngii el mo metecholb, e ng dilu er tir el kmo, “Kom kor a chelebeldil a bersoech. Ng techa dilu er kemiu el kmo ng sebechiu el chemiis er a blals el mereku el ngar a Dios el mei? 8Moruul a ikel tekoi el olecholt el kmo kom mla obult er a kngtmiu. 9E lak momdasu el kmo ng sebechiu el chemiis er a blals cho molekoi el kmo kom ngelekel a Abraham. Ak subedemiu el kmo a Dios a sebechel el ngma ikal bad e remuul el mo ngelekel a Abraham! 10A otilech a mla mekedmokl el mo melebes a risel a kerrekar el omukel; ma bek el kerrekar el diak lourodech a ungil rodech a mo muukel e obidokl er a ngau. 11Ak melecholb er kemiu el olab a ralm el olechotel a kmo kom mla ouuchel a rengmiu er a kngtmiu, e ngdi ngar ngii oeak uriul er ngak el mei el mo melecholb er kemiu er a Chedaol Reng ma ngau. Ng kuk kmal ngarbab er ngak; me ngak a diak kungil el mo olab oecherel. 12Ng oba sebelel el mo meleakl a rokui el grain er a budel. Ng mo chemudel a dellemelel el wheat el locha er a blil, e a budel a bo le dul er a diak le mad el ngau.” 13Seikid e a Jesus a mlar a Galilea el mor a Johanes er a Jordan el bo lolecholb er ngii. 14Ngdi Johanes a millasem el merrob er ngii e dilu el kmo, “Ng kirel kau a melecholb er ngak, e a lechub e ke bai merma er ngak!” 15Ma Jesus a dilu er ngii el kmo, “Becherei me bo le ua isei er chelechang. Ele tiaikid a rolel e kede remuul a ikel rokui el soal a Dios.” Me ng kilengei a Johanes. 16Me ng di meltecholb a Jesus e mo tokerekl, e sola e a eanged a ulebok me ng milsa Reng er a Dios el ua teletelel a belochel el mer bebul. 17E a ngor a mlar a eanged e melekoi el kmo, “Ngkaikid a betik er a renguk el Ngelekek, el ngii odeuir a renguk.”

will be added

X\