MATEUS 28

1E a bocha le merek a Ulengull el Sils, er a dirk mesesilkolk er a tutau er a Sunday, e a Maria Magdalene me ngikel kuk tar a Maria a mlo omes er a debull. 2E sola e ng mlor ngii a mesisiich el desiu, e a tal anghel er a Rubak el mlar a eanged el me metengel a tilitiur a bad el choridii, e mlo dengchokl er bebul. 3Ng kor a bisebusech a domes er ngii e a bilel a kmal mle imis el becheleleu. 4A re mengkar a kmal mlo medakt me tulemritel e di mlo ua re ulekoad el chad. 5E ngiil anghel a milengedecheduch er tir el redil el kmo, “Ng diak le kiriu el mo medakt. Ak medengei el kmo kemiu osiik er a Jesus el mlad er a kerus. 6Ng diak le ngar tiang; ng mla mekiis er a kodall el ua ikel le dilung. Ka ber tiei e mesa sel le mlar ngii. 7E morechedemiu el merael el mo subedeterir a rubengkel el kmo, ‘Ng mla mekiis er a kodall, e chelechang e ng oeak uchei er kemiu el mor a Galilea me kom mo mesa er isei!’ Lak kom obes a ikal bla kdu er kemiu.” 8Me te mlar a debull e ulerreched el merael, el medakt e kmal ungil a rengrir, me te rirurt el mo ouchais er a rubengkel. 9E a Jesus a di ulsiueklterir e dmu el kmo, “A budech lekor kemiu.” Me te mlor ngii e oreked ochil e mengull el meluluuch er ngii. 10Ma Jesus a dilu er tir el kmo, “Lak kom medakt. Morael el mo subedeterir a re tar ngak me le bor a Galilea, e te mo mesekak er isei.” 11Tia er a lorael tirkal redil, e a re bebil er a re soldau el milengkar er a debull a liluut el mor a beluu e ouchais er a re bderrir a re prist a ikel bek el tekoi el dilubech. 12Ma re bderrir a re prist a mlo dmak tir ma re mechuodel e melib a tekingir. Te ngila betok el udoud el mesterir a re soldau, 13e dmu el kmo, “Kom mo melekoi el kmo a rubengkel a mlei er a klebesei el rucherechii a bedengel er ser a leiit a medemam. 14E a lsekum a kabernor a mo remenges a ikal tekoi, e kemam a mo melekoi er ngii el kmo ng diak le telemelliu, me ng diak a ngeral bo bekikl er ngii.” 15Ma re mengkar a ngilai ngiil udoud e mlor a ikel le dilu er tir. Me ng me lmuut er chelechang e tiaikid el chais a berrokel er a delongelir a re chad er a Judea. 16A re truich ma tal obengkel a Jesus a mlor sel bukl er a Galilea el le dilu er tir a Jesus me te mor ngii. 17Me ser a lesang, e te milluluuch el mengull er ngii, e ngdi re bebil er tir a dirk mle rrau a rengrir. 18Ma Jesus a mlo kmeed e dmu er tir el kmo, “A rokui el klisiich er omerreder er a eanged ma beluulchad a bla le beskak. 19Me chelechang e morael el mor a bek el bedengir a re chad er ker me ker e moruul er tir el mo obengkek, e molecholb er tir el oba ngklel a Chedam, ma Ngalek, ma Chedaol Reng, 20e molisechakl er tir me bo loltirakl a ikel rokui el bla kdu er kemiu. E ngak a mo obengkemiu el di blechoel el mo lmuut er a ulebongel er a beluulchad.”

will be added

X\