MATEUS 27

1Ng dirk tutau e a rokui el bderrir a re prist ma re mechuodel a tilib a tekingir el mo omekoad er a Jesus. 2Te rirengedii, e milekrolii el mor a Pilatus el kabernor el chad er a Rom. 3Ma Judas, el ngikel ulelterau er a Jesus er a bo lodengei el kmo a Jesus a mla moterekokl el kmo ng kirel el mo mad, e ng ouechela er a rengul me ng liluut el ngmai a ikel 30 el silber el udoud el mo mesterir a re bderrir a re prist ma re mechuodel. 4“Ak mla mor a klengit el mla oterur a diak a telemellel el chad me ng mor a kodall.” Me te dilu er ngii el kmo, “Ng ngera kiram er ngii? Tilecha di ngerchelem!” 5Ma Judas a milides ngiil udoud er a chelsel a Templo e merael. Tiaikid e ng mirrael el mo kobsii. 6Ma re bderrir a re prist a ngilai ngiil udoud e dmu el kmo, “A ika cheral a rasech me ng mekull er a Llach er kid a dolecha er a blil a udoud er a Templo.” 7Uriul e ng mlo ta tekingir e ngmai ngiil udoud el mecherar a chetemel omeob choua bekai el klalo me ng mlo olekull er a re chad er a ngodech el beluu. 8Seikid a uchul me sel chutem a lomekedong er ngii el mer chelechal sils el kmo “Chutem er a Rasech.” 9Me ng mlo tmaut a ikel lullekoi a Profet Jeremia el kmo, “Te ngilai ngiil 30 el silber el udoud, el ildisel a udoud el le kilengei er ngii a re chad er a Israel el mo cheral, 10e uluusbech ngiil udoud el mecherar a chetemel omeob choua bekai el klalo, el ua ikel bla ledu er ngak a Rubak.” 11A Jesus a dilechor er medal a kabernor el chad er a Rom el uleker er ngii el kmo, “Kau ke king er a re chad er a Judea?” Ma Jesus a dilu el kmo, “Ke dulang.” 12E ngdi dimlak a ngeral ledung el kirel a ultuteklir a re bderrir a re prist ma re mechuodel. 13Mitia e a Pilatus a dula er ngii el kmo, “Kau ng diak mrenges a ikal tekoi el loltutakl er kau er ngii?” 14E ngdi Jesus a di dimlak a tal tekoi el le delii, ma kabernor a kmal mlo mechas a rengul. 15A bek el Chedaol Sils er a Baskua e a kabernor el chad er a Rom a blechoel el oltobed er a tar a re chad er a kelebus el ngikel lolengit er ngii a seked el mlar medal. 16E seikid e ng mlar ngii a kelebus el lesal medengelii a re betok el chad el Jesus Barabas a ngklel. 17Me ser a bo le kldibel a seked er medal, e a Pilatus a uleker er tir el kmo, “Ng techa somiu a bo kutebedii er a kelebus? Ng somiu a Jesus Barabas, ma lechub e ng somiu a Jesus el lomekedo er ngii el Mesias?” 18Ng kmal mle ungil medengei el kmo a re mengeteklir a re chad er a Judea a mle mechechei er a Jesus a uchul me te mlo oltutakl er a Jesus er ngii. 19Me ser a le dengchokl a Pilatus er a blil a kerrekeriil, e a bechil a milsumech el mor ngii el kmo, “Kele mokera er ngilechal diak a telemellel el chad, ele kesus e ak kmal chilarm er a berrusek el kirel.” 20A re bderrir a re prist ma re mechuodel a ulengemek el oldubech er a seked me te mo olengit er a Pilatus me lotebedii a Barabas er a kelebus e a Jesus bo le mad. 21Ma Pilatus a uleker er a re chad el kmo, “Ng techa er tirkal terung a somiu a bo kutebedii er a kelebus el kiriu?” Me te dilu el kmo, “Ng Barabas!” 22Ma Pilatus a uleker er tir el kmo, “A le ua isei, e ak mo mekera er a Jesus el lomekedo er ngii el kmo Mesias?” Me te rokui el dilu el kmo, “Bo mdelii er a kerus!” 23Me ng uleker a Pilatus el kmo, “Ng ngeral tellemall a le blor ngii?” E tiaikid e te mocha meklou a ngerir el oldiu el kmo, “Bo mdelii er a kerus!” 24Ma Pilatus er a bo lomtab el kmo ng diak a belkul a lolemolem er a cheldecheduch ele ng soal el mor ngii a uldikel, e ng ngila bebil er a ralm, e mlar mederir a re chad e lobal a chimal e dmu el kmo, “Ngak a diak a ngerchelek er a kodellel ngikal chad! Tia di ngercheliu!” 25Ma seked el rokir a dilu el kmo, “A kodellel ngikal chad bo le ngerchelam kemam ma re ngelekam!” 26E sola ma Pilatus a ultebedii a Barabas er a kelebus el mesterir; e uriul er a le bechere Jesus me le chelebedii e ng ngiluu el mesterir a re soldau el bo loleel er ngii er a kerus. 27Ma re soldau er a Pilatus a ngiluu a Jesus el mor a blil a kabernor, ma re soldau el rokui a mlo mekideb el meliuekl er ngii. 28Te mildobed a bilel e milii er a smiich el bekerkard el ikrel a bail. 29E sola e rirellii a krone er ngii el tochedulik e loia er a bdelul, e loia skors er a kadekmel a chimal, e sola e mo outubuach er medal el melenguul er ngii e dmu el kmo, “Bo le kemanget a klengar er a King er a re chad er a Judea!” 30Te millub er ngii, e ngiluu sel skors el cholebedii a bdelul. 31Te millenguul er ngii el mo merek, e medebedii sel ikrel a bail e lmuut el milii er a bilel. E sola e mocha oba el mo meleel er ngii er a kerus. 32Ser a lorael el mo tuobed er a beluu, e tulsiueklii a tal chad er a Kirene el Simon a ngklel, ma re soldau a uleremelii el mo mengol er a kerus er a Jesus. 33Me te mlor a lomekedong er ngii el kmo Golgatha, el belkul a kmo, “Blil Omilel a Bedul.” 34Ser a le bong e te milsa Jesus a bilong el urrechomel er a mechuached el kar me ng di mlo choremii, e dimlak lolim er ngii. 35Te dilelii a Jesus er a kerus e sola e mlo kengmors e remous a bilel. 36Ser a bo le merek e te mlo dengchokl e omes er ngii. 37Te lilia er bebul a bdelul sel llechukl el ultutakl el kmo, “Ngika Jesus, el King er a re chad er a Judea.” 38Te dirrek el dilelterir er a kerus a re terul merechorech er bita er a Jesus, el tang a ngar a mo bedul a kadekmel, ma tang a ngar a mo bedul a katerul. 39A re chad el mle engelakl a ulemides a bderrir e melenguul er a Jesus el kmo, 40“Kau el leko ke mo ongkengkii a Templo e lmuut el mekedecherur er a chelsel edel klebesei! Cho mNgelekel a Dios e di le kau el osebelau! Be metengel er a kerus!” 41A re bderrir a re prist ma re sensei er a Llach ma re mechuodel me te dirrek el millenguul er ngii el kmo, 42“Ng ulelsobel er a re ngodech el chad, e diak el sebechel el di ngii el osebelii! Ng diak le ngii a king er a Israel? Chomko chelechang e ng me metengel er a kerus, e kede mo oumerang er ngii! 43Ng oumera el kmo a Dios a mo ngosuir e melekoi el kmo ng Ngelekel a Dios. Ma le ua isei, e a lsekum ng soal a Dios e ka bo desang el mo osebelii er chelechang!” 44Tirkel merechorech el meldeel er a kerus er bita er ngii me te dirrek el millenguul er ngii. 45Ser a bocha le sueleb a sils e a beluu el rokir a di mlo milkolk, e mle milkolk el edel sikang. 46Ma bekord el edel klok e a Jesus a mle klou a ngerel el oldiu el kmo, “Eli, Eli, lema sabakthani?” el belkul a kmo, “Dios er ngak, Dios er ngak, ngera uchul me ke mla choitak?” 47A re bebil er a re chad el dilechor er sei a rirengesii me te dilu el kmo, “Ng omekedong er a Elias!” 48Ma tar tir a di mle mereched el remurt el nguu a sponge el mo dilechii er a di beot a cheral el bilong, e loia er a ulebengelel a kor a lild e millasem el oba el omngim er ngii. 49Ngdi re bebil er a re chad a dilu el kmo, “Ka msall e desa Elias el kmo ng me osebelii!” 50Ma Jesus a liluut el mo klou a ngerel el oldiu e silebek a telil. 51E a mamed el mle orars er a Templo a melsodel el mo erung el mlar bab e mesodel el mor iou. A chutem a mlo melmesim, ma risois a meltiud, 52ma debull a ulebkais, ma re betok el chedal a Dios el di mla mad a milekiis er a kodall. 53Te tilobed er a debull me ser a le bekiis a Jesus er a kodall, e te mlor a Chedaol Beluu el Jerusalem, me te betok el chad a milseterir. 54Ma merreder er a urrurt er a re soldau me tirkel soldau el ulebengkel el mengkar er a Jesus er a lesa desiu ma ikel bek el mlor ngii el tekoi, e te mlo medakt e dmu el kmo, “Ngika meral Ngelekel a Dios.” 55Ng mlar ngii a re betok el redil el tirkel ulebengkel a Jesus er a Galilea el mei el ullengeseu er ngii, el di mlar cheroid e omes. 56A Maria Magdalene, ma Maria el delal a Jakobus ma Josef, ma bechil a Sebedeus a mle teloi er tir. 57Ser a bo le kebesengei, e a tal merau el chad er a Arimathea el Josef a ngklel a mlong, el ngii a dirrek el ulebengkel a Jesus. 58Ng mlor medal a Pilatus e olengit er a bedengel a Jesus. Ma Pilatus a ultebedii a tekingel me le nguu a bedengel a Jesus el msa Josef. 59Ma Josef a ngiluu a bedengel a Jesus, e mililii er a beches el becheleleu el mamed, 60e ngiluu el mo loia er a debellel ngiil Josef el dirk le kilisii er a risois. E sola e tilitiur a klou el bad el mor medal ngiil debull e mirrael. 61A Maria Magdalene me ngikel kuk tar a Maria a mle dengchokl el chemau ngiil debull. 62A bo le kukuk, e ng mle Ulengull el Sils ma re bderrir a re prist ma re Farisi a mlo omes er a Pilatus, 63e dmu el kmo, “Rubak, aki lotka tekingel ngikel bulak el chad er ser a dirk le chad, e ng dilu el kmo, Ak lmuut el mo mekiis er a kodall er uriul er edel klebesei.’ 64Mei me motebedii a tekingem, ma debellel bo lungil el mengkar er ngii el mo lmuut er ongede er a klebesei, ma rubengkel lak le bong el rucherechii a bedengel e sola e louchais er a re chad el kmo ng milekiis er a kodall. Ele lak e tial ulebongel el blulak a bai kuk mo mekngit er sel mle kot.” 65Ma Pilatus a dilu er tir el kmo, “Mngititerir a re mengkar e bong me bor a ikel sebechiu el mengkar er a debull.” 66Me te mlong me te loia olangch el semosem er bebul a bad e mechititerir a re mengkar me te mengkar er ngii.

will be added

X\