MATEUS 26

1A Jesus er a bo le merek el olisechakl a ikal tekoi e ng dilu er a rubengkel el kmo, 2“Kom medengei el kmo ng di medechel erul klebesei kung e ng mor ngii a Chedaol Sils er a Baskua, e seikid e a Ngelekel a Chad a bo le besterir a re chad me bo le medeel er a kerus.” 3E sola ma re bderrir a re prist ma re mechuodel a mlo kldibel er a blil a Kaifas el Ngarbab el Prist, 4e melib er a mo berrotel el melai er a Jesus el mo omekoad er ngii. 5Te dilu el kmo, “Ng diak doruul er ngiil tekoi er sel belsechel a Chedaol Sils er a Diak Omkukel Blauang, ele ng mol mor ngii a uldikel er a delongelir a re chad.” 6A Jesus a mlar a Bethania er a blil a Simon, ngikel silecher el chebedes. 7Ma Jesus er a lomengur, e a tal redil a mlor ngii el oba chimol alabaster el butiliang el mui er a meringel a cheral el chilt, e ulechebelii er a bdelul. 8A rubengkel a milsa ngiil tekoi me ng mlo kesib a rengrir. Tuleker el kmo, “Ngera uchul me ng mengeleberochel er tiang? 9Tial chilt a mle sebechel el moterau el kirel a betok el udoud e kede ngma cheral el mesterir a re mechebuul!” 10A Jesus a mle medengei a lolekoi me ng dilu er tir el kmo, “Ngera me kom mengesang er ngikal redil? Ng mla rullii a kot el ungil tekoi el kirek. 11A re mechebuul a di blechoel el obengkemiu, e ngdi ngak a diak di kblechoel el obengkemiu. 12Sel le rirellii el olechubel er tial chilt er a bedengek, a mengedmokl er ngak el kirel omelakl. 13Ak meral subedemiu el kmo, A ikel beluu er a beluulchad el mo oberk er ngii tial ebangkelio, a dirrek el mo mechedecheduch er ngii tial bla le rellii ngikal redil me te mo melatk er ngii a re chad.” 14E sola e a tar a re truich ma terul obengkel a Jesus, el Judas Iskariot a ngklel, a mlor a re bderrir a re prist 15e oker el kmo, “Ngera kom mo meskak a lsekum ak uterur a Jesus er kemiu?” Me te milechur 30 el silber el udoud e ngmai el msang. 16Me seikid el mong e a Judas a ulsiik er a mo ungil techall e ng nguu a Jesus el mesterir. 17Sel kot el sils er a Chedaol Sils er a Diak Omkukel Blauang, e a rubengkel a Jesus a mlo oker er ngii el kmo, “Ngar ker a soam aki bo mkedmeklii a blengur er a Baskua er ngii el kirem?” 18Me ng dilu er tir el kmo, “Bor a tal chad el ngar a chelsel a beluu e mdu er ngii el kmo, ‘A Sensei a kmo a belsechel a mla mei, me ngii ma rubengkel a mo meruul er a Baskua er a blim.’” 19A rubengkel a Jesus a mlor a ikel le dilu er tir a Jesus me te kildmeklii a blengur er a Baskua. 20Me ser a bo le kebesengei, e a Jesus ma re truich ma terul obengkel a mlo dengchokl e omengur. 21Me tomengur e a Jesus a kmo, “Ak uuchais er kemiu el kmo a tar kemiu a mo olterau er ngak.” 22Ma rubengkel a kmal mlo chetirir e mocha kauderta er tir el melekoi er ngii el kmo, “Ng ngak, e Rubang?” 23Ma Jesus a dilu el kmo, “Ngikel kimdak el omarech a kelam el blauang er osisiu el belatong a mo olterau er ngak. 24A Ngelekel a Chad a mo mad el ua ikel lolekoi a Chedaol Llechukl, e ngdi kmal mo chebuul ngikel chad el mo olterau er a Ngelekel a Chad! Ng bai ungil er ngii a lemlak le mechell!” 25Ma Judas, el ngikel ulelterau er ngii a dilu el kmo, “Ng ngak, e Sensei?” Ma Jesus a dilu el kmo, “Ng di kau el mla dulii.” 26Ser a lomengur e a Jesus a ngiluu a telkib er a blauang, e milluluuch el mereng a sulel a Dios, e milechedii, e nguu el mesterir a rubengkel. Ng dilu el kmo, “Mnguu me monga er ngii e tia ia bedengek.” 27E sola e ngiluu a kob, e mirreng a sulel a Dios, e nguu el mesterir, e dilu el kmo, “Molim er ngii kemiu el rokui; 28e tia ia rsechek el melisiich er a telbilel a Dios. Ngiil rsechek a mo metenget el kirir a re betok el chad el kirel el melubet a klengit. 29Ak uuchais er kemiu el kmo ng dikea kluut el mo melim er tial bilong el dimerkmo le mei sel sils el bo kulim er a beches el bilong el obengkemiu er a Rengedel a Demak.” 30Itia e te chilteklii a tar a chelitakl er odanges e tilobed el merael el mor a Rois er Olib. 31Itia e a Jesus a dula er tir el kmo, “Chelechal kesus e kemiu el rokui a mo chemiis e choitak, ele Chedaol Llechukl a kmo, A Dios a mo mekodir a mengkerengel a sib, ma delebechel el sib a mo meterakl.’ 32E ngdi sel bo kbekiis er a kodall, e ak mo oeak uchei er kemiu el mor a Galilea.” 33Ma Petrus a dmu er a Jesus el kmo, “A lsekum a rokui el chad a mo choitau e ngdi ngak a kmal diak bo kchitau.” 34Ma Jesus a dmu er a Petrus el kmo, “Ak uuchais er kau el kmo a uchei er a lorros a malk er chelechal kesus, e kau a mo edei el moumededenger er ngak.” 35Me ng dmu Petrus el kmo, “A bo le kirek el mo mad el obengkem, me ngak a kmal diak bo kuumededenger er kau.” Tirkel rokui el obengkel a Jesus a di mle osisiu a tekingir. 36E sola e a Jesus a dilak ngii ma rubengkel el merael el mor a Gethsemane, e dilu er tir el kmo, “Bo mdengchokl er tiang e ngak kbor sei e kululuuch.” 37E ngiluu a Petrus ma re terul ngelekel a Sebedeus me tobengkel. A Jesus a kmal mlo imis el chuarm er a kngtil a rengul, 38me ng dilu er tir el kmo, “A kngtil a renguk a soal el mekodkak. Di mngar tiang el di mekar el mengelim er ngak.” 39Ng mirrael el telkib el mo cheroid, e di mlo blengkangk el terrob er a chutem e meluluuch el kmo, “Chedam, a bo le sebechel, e mnguu tial kob er a ringel el choridii er ngak! E ngdi diak el sel soak, di le bor sel soam.” 40E sola e liluut el mor tirkel tedei er a rubengkel e metik er tir el mechiuaiu, me ng dmu er a Petrus el kmo, “Ngera me ng diak el sebechiu el obengkek el mengkar el di tal sikang? 41Mongkar e moluluuch me lak mrebet er ongetikaik el mor a klengit. A rengul a chad a soal, e ngdi klechad er ngii a mechitechut.” 42E liluut a Jesus el merael el mo meluluuch el kmo, “Chedam, a lsekum tial kob er a ringel a kirel kulim er ngii me ng diak el sebechel el mo cheroid er ngak, e bo letaut a soam.” 43Ng liluut el mor a rubengkel e a le bong, e te mechiuaiu. Ng dimlak el sebechir el di mekar. 44Me ng liluut a Jesus el mechititerir e merael el mo meluluuch el ongedei kung el di lomelekl osisiu el tekoi. 45E sola e liluut el mor a rubengkel e kmo, “Kom dirk mechiuaiu e olengull? Mesang, a belsechel el bo le mengai a Ngelekel a Chad el mor a klisichir a re mekngit el chad a mla mei. 46Bekiis e dorael. Ka mesang, ngkakid ngikel chad el olterau er ngak!” 47A Jesus a dirk milengedecheduch er a le mei a Judas, el tar a re truich ma terul obengkel. A kloul seked el olab a saider ma chelebed el luleldurech er tir a re bderrir a re prist ma re mechuodel a ulebengkel. 48Ngikal mlo olterau er a Jesus a ulechotii olangch el mor a seked el kmo, “Ngikel chad el bo kterengur a medal ngkeikid ngikel mosiik er ngii. Bo mnguu!” 49Ma Judas a di mle melemalt el mor a Jesus e dmu el kmo, “A budech lekor kau e Sensei,” e tirrengur a medal. 50Ma Jesus a dilu el kmo, “Morechedii, e rrang!” Ma re chad a mlong el mdechemii a Jesus el orekedii. 51E a tar tirkel ulebengkel a Jesus a ultebedii a saider er ngii el melauch er a mesiungel a Ngarbab el Prist me ng dilebesii a dingal. 52Ma Jesus a dilu er ngii el kmo, “Mnguu a saider er kau el lmuut el loia er a blil. A rokui el chad el ousbech er a saider a mo mad er a saider. 53Ng diak modengei el kmo ng sebechek el olengit er a Demak me ng di mereched el odercheterir a re betok el telael el anghel el me ngosukak? 54E a bo le ua isei, e ng mekera e sebechel el motaut a Chedaol Llechukl a lolekoi el kmo tia kirel el mo ua isei?” 55Itia e a Jesus a melekinga er a seked el kmo, “Ng mle kiriu el me melai er ngak el olab a saider ma chelebed el ua kdengerenger el chad? Ng mle bek el sils el kdengchokl er a Templo e olisechakl, e dimlak molai er ngak. 56E ngdi ikal rokui el tekoi a mocha ua isei el oltaut a ikel lulluches a re profet er a Chedaol Llechukl.” Tiaikid e a rokui el obengkel a chilitii e chemiis. 57Tirkel mlo melai er a Jesus a ngiluu el mor a blil a Kaifas el Ngarbab el Prist el ble le kldibel er ngii a re sensei er a Llach ma re mechuodel. 58A Petrus a uleltirakl er ngii el mor a mekesekesel a blil a Ngarbab el Prist, e ngdi di mlar cheroid. Ng mlor a mekesong e mo dengchokl el obengterir a re mengkar e omes el kmo ng mo ua ngera tekoi. 59E a re bderrir a re prist ma Olbiil el rokir a millasem el osiik a bebil er a tekoi el mo uchul e lotuteklii a Jesus me bo le mad, 60e mle betok el chad a mo tuobed el melekoi a blulak el kirel, e ngdi dimlak el sebechir el metik a telemellel. E sola e a re terul chad a mochang, 61e melekoi el kmo, “Ngikal chad a dilu el kmo, ‘Ngak a sebechek el ongkengkii a Templo er a Dios e lmuut el mekedecherur er uriul er edel klebesei.’” 62Ma Ngarbab el Prist a mlo dechor e dmu er a Jesus el kmo, “Ng ngar ngii omesodem er tial ultutakl el kirem?” 63E a Jesus a di liluk. Ma Ngarbab el Prist a liluut el melekoi er ngii el kmo, “Chelechang e a kuba ngklel a di ngar el Dios me ke mo melekoi a klemerang. Mouchais er kemam a lsekum ke Mesias el Ngelekel a Dios.” 64Ma Jesus a dilu er ngii el kmo, “Ng ua isei a ikel bla mdung. E ngdi kuuchais er kemiu el rokui el kmo chelechal mong e kom mo omes er a Ngelekel a Chad el dengchokl er a mo bedul a kadekmel ngikel olab a bek el Klisiich e ngii a mei el ngar a eabed!” 65Tiaikid e a Ngarbab el Prist a silodel a bilel e kmo, “Tia otuub er a Dios! Ng dikea dousbech er a lmuut el bebil er a re sioning! Kom dirk rirengesii otubel a Dios. 66Ngera kom omdasu?” Me te dilu el kmo, “Ng ngar ngii a telemellel me ng kirel el mo mad.” 67Me te millub er a medal e mengelebed er ngii; e tirkel milengesuar er ngii 68a dilu el kmo, “Momlaoch e Mesias, e molangch el kmo ng techa chillebedau!” 69A Petrus a mlar rikl el dilengchokl er a mekesong. E a tar a redil el mesiungel a Ngarbab el Prist a mler ngii e dmu el kmo, “Kau a dirrek el ulebengkel a Jesus el chad er a Galilea.” 70E ngdi ngii a di mlar mederir el rokui e oumededenger er ngii el tekoi. Ng dilu el kmo, “Ng diak kudengei a ikal molekoi,” 71e mirrael el mor sel siseball el mo tmuu er a mekesong. Ma kuk tar a mesiou el dil a milsang me ng millekoi er a re sechal el mlar isei el kmo, “Ngika ulebengkel a Jesus er a Nasareth.” 72Ma Petrus a liluut el oumededenger er ngii el tekoi e dmu el kmo, “Ak meral melekoi el kmo ng diak kudengelii ngikel chad!” 73Ng dimlak bo le meketeket e tirkel sechal el mle dechor er isei a mlor a Petrus e dmu el kmo, “Kau a ulterekokl el tar tir. A omelekingem a ochotau!” 74Itia e a Petrus a dula el kmo, “Ak meral melekoi a klemerang. E a Dios bo le belsak a lsekum ng diak kulekoi a klemerang! Ng diak kudengelii ngikel chad!” E seikid e a malk a merros; 75ma Petrus a mocha lmatk a lullekoi er ngii a Jesus el kmo, “Uchei er a lorros a malk, e kau a mo edei el moumededenger er ngak.” Me tia e ng tilobed e kmal lilangel.

will be added

X\