MATEUS 23

1Seikid e a Jesus a millekoi er a seked ma rubengkel el kmo, 2“A re sensei er a Llach ma re Farisi a tirkel kirir el mesaod a Llach er a Moses. 3Me ng kiriu el oltirakl e meruul a ikel bek el ledu er kemiu; e ngdi diak mosuub omerellir, ele omerellir a kakerous ngii ma ikel lolisechakl. 4Tomatk er a re chad oberaod el telechull, el diak le mechol, e tir a ka lodars a chimorir kung el ngosuterir. 5Te di meruul a rokui el tekoi el leko leseterir a re chad. Ka mues a ikel le llechukl er ngii a bades er a Chedaol Llechukl el ngar a medal a bderrir ma chimorir, ng imis el meklou! Ka dirrek el mues a meklemengetel a ikel mekebekabes el besichel a bilir. 6Ng sorir a ikel kot el ungil kingall er a mur ma ikel kingellir a re kuoll er a blil ongdibel; 7ng kmal sorir a longull er tir a re chad me losus er tir er a blil a makit, e sorir a lomekedong er tir el kmo ‘Sensei.’ 8Ng diak le kiriu el mokedong el kmo ‘Sensei’ ele kemiu el rokui a di odam, e ngar ngii a di tal Sensei er kemiu. 9E dirrek el diak le kiriu el omekedong er a ngii di le chad er tial beluulchad el kmo ‘Chedam’, ele ng ngar ngii er kemiu ngikel di tal Chedam el ngar a eanged. 10E dirrek el ka bo lomekedong er kemiu a re chad el kmo ‘Merreder’, ele ng di tal Mesias a merreder er kemiu. 11Ngikel kot el ngarbab er a delongeliu a kirel el mo mesiungiu. 12Ngikel di ngii el olengesechekl er ngii a mo monganget, e ngikel di ngii el olenganget er ngii, a mo mongesechekl. 13“Kom kmal mo chebuul kemiu el sensei er a Llach ma re Farisi! Kom cheblad! Kom mengesimer er a Rengedel a eanged er a re chad, e kemiu a diak bo msiseb er ngii, e diak ko bechititerir tirkel melasem el mong me bo le siseb! 14Kom kmal mo chebuul kemiu el sensei er a Llach ma re Farisi! Kom cheblad! Kom mengebuul er a re melakl dil el merechorech a klalo er a blirir, e sola e ousulecholt er kemiu el meluluuch a mekemanget el nglunguuch! Tiaikid a uchul me ng kmal mo meringel a belsiu! 15“Kom kmal mo chebuul kemiu el sensei er a Llach ma re Farisi! Kom cheblad! Kom melebechakl a daob ma beluu el mor a bek el beluu el mo omult er a di tal chad; e sel cho beltii, e kom rullii el di mo ua ikemiu el erul chachisois a techellel el mor a beluu er a ngau! 16“Kom kmal mo chebuul, kemiu el meiko el mengeteklir a re chad! Kom olisechakl el kmo, ‘A le ngar ngii olsiich a tekoi el ousbech er a Templo, e ng diak le rrengodel er ngii el tekoi; ngdi lsekum ng olsiich a tekoi el ousbech er a kolt el ngar a chelsel a Templo, e ng kirel el oltaut er ngii el tekoi.’ 17Kom meiko el mekebelung el chad! Ng ngera bai klou a belkul, ng kolt, ma lechub e ng Templo el rullii a kolt me ng mo chedaol? 18Kom dirrek el olisechakl el kmo, A le ngar ngii olsiich a tekoi el ousbech er a olengetongel, e ng diak bo le rrengodel er ngii el tekoi; e ngdi le ngar ngii olsiich a tekoi el ousbech er a uldars el ngar bebul a olengetongel, e ng kirel el mo oltaut er ngii el tekoi.’ 19Kom meral meiko! Ng ngera bai klou a belkul, a uldars, ma lechub a olengetongel el rullii a uldars el mo chedaol? 20Mesang, a chad sel lolsiich a tekoi el ousbech er a olengetongel, e ng olsiich a tekoi el ousbech er ngii, ngii ma ikel rokui el uldars el ngar bebul; 21me sel lolsiich a tekoi el ousbech er a Templo, e ng olsiich a tekoi el ousbech er ngii e ousbech er a Dios, el ngikel kiei er a chelsel; 22ma chad sel lolsiich a tekoi el ousbech er a eanged, e ng olsiich a tekoi el ousbech er a kingellel a Dios, e dirrek el ousbech er ngikel dengchokl er ngii el kingall. 23“Kom kmal mo chebuul kemiu el sensei er a Llach ma re Farisi! Kom cheblad! Kom omsa Dios ongeltacher el mo lmuut er a ongeltacher er a dellomel el meruul a bul a kall el mint, ma dill, ma cumin, e sola e mengoit er sel meral klou a belkul el osisechakl er a Llach, el llemalt ma klechubechub ma blakerreng. A ika kiriu el meruul el rokui el diak cho mchoit er ngii. 24Kom meiko el mengeteklir a re chad! Kom omiich er a chimol eaes a le ngar a imeliu, e bai omerekakl er a kiamo. 25“Kom kmal mo chebuul kemiu el sensei er a Llach ma re Farisi! Kom cheblad! Kom melatech a ikrel a kebengiu ma belatingiu, e a chelsel a mui er a ikel cho mngilai el okiu a uldikel ma blechelechelingaol el reng. 26Meiko el Farisi! A kot e mngetechii a chelsel a kob, e a ikrel a di mochu beches! 27“Kom kmal mo chebuul kemiu el sensei er a Llach ma re Farisi! Kom cheblad! Kom kor a ikel chelsbereber el debull, el di ungil er a ues a ikrel e a chelsel a mui er a chiuis ma bediong el cheklechir a re chad. 28Kom ua isei, el di ikriu a ungil er a osengir a re chad, e a chelsiu a mui er a cheleblad ma klengit. 29“Kom kmal mo chebuul kemiu el sensei er a Llach ma re Farisi! Kom cheblad! Kom meruul a ungil debellir a re profet e omesiich a olengchelir a re mle ungil a klengar er tir; 30e melekoi el kmo chomko kom mle chad er ser a le chad a rucheliu, e ng dimlak moruul a ikel lurruul el omekoad er a re profet. 31Ma le ua isei e kom meral kongei el kmo kom ngelekir tirkel ulemekoad er a re profet! 32Mada bo mrekui a ikel lulemuchel a rucheliu! 33Kom kor a charm e kor a ngelekel a charm! Ng mekera e diak mobals el mor a beluu er a ngau? 34Ak uuchais er kemiu el kmo ak mo oldurech er a re profet ma re mellomes a rengrir el chad ma re sensei el ekor kemiu, e kemiu a mo mekodeterir a re bebil er tir, e mo meleel er a re bebil er tir er a kerus, e mo mengelebed er a re bebil er a blil ongdibel e mo oltoir er a re bebil el ngar a tar a beluu el mor a tang. 35Ma le ua isei, e a blals el kirel okodellir a rokui el diak a telemellir el chad a ekor kemiu, el ngar okodellel a diak a telemellel el Abel el mor okodellel a Sekaria el ngelekel a Berekia, el ngii cho mulekodir er a delongelel a Templo ma olengetongel. 36Mak meral melekoi er kemiu el kmo, a re chad er chelechang a mo obals el kirel a kodellir tirkaikid el rokui el chad! 37“Jerusalem, Jerusalem! Komkoad er a re profet e ometech er a re chad er a bad el luleldurech er tir a Dios el olab a klumech el ekor kau! Ng mle telal leko kumechull er a rokui el chedam el ua dechuu el malk el mengudel er a re ngelekel er eungel osebekel, e kemiu a dimlak el somiu! 38Mada Templo er kemiu a mo cheloit e di mo bechachau. 39Ak uuchais er kemiu el kmo chelechal mong, e ng dikea mluut el mo mesekak el mo lmuut er sel bo mdu el kmo, ‘A Dios bo lomekngeltengat er ngikal mermang el oba ngklel a Rubak.’”

will be added

X\