MATEUS 21

1A Jesus ma rubengkel er a le keda er a Jerusalem e te mlor a beluu er a Bethphage el ngar a Rois er Olib. Te mlar isei e a Jesus a odercheterir a re teru er tir el oeak uchei el ma merael 2e dmu el kmo, “Bor sel beluu el ngar medemiu, e sel cho bong e kom mo metik er a donkey el ulak ma ngelekel a ngar bitar ngii. Mkedoked e mngai el me meskak. 3E a lsekum ng ngar ngii a melekoi a ngerang, e kom dmu er ngii el kmo, ‘Ng ousbech a Mastang’; e seikid e ng mo mechikemiu me kom ngmai.” 4Tia mlo ua isei el oltaut a le dilu a profet el kmo: 5“Msbedii a beluu er a Sion el kmo, Mesang, ng merma king er kau! Ng ngariou a rengul e ngar a donkey ng ngar a colt el ngelekel a donkey.” 6Ma rubengkel a Jesus a mirrael el mo remuul a ikel le dilu er tir; 7te ngiluu a donkey ma ngelekel el mong, e lilecha ikrel a bilir er bebul, e a Jesus a mlo ngmasech er ngii. 8A klou el seked er a re chad a milsumech a ikrel a bilir er a rael ma re kuk bebil a dilobech a rechelel a kerrekar el melecha er a rael. 9A seked el uleak medal a Jesus me tirkel uleak ullel a mocha oldiu el kmo, “Le modanges a Ngelekel a David! A Dios bo lomekngeltengat er ngikal mermang el oba ngklel a Rubak! A odanges le bor a Dios!” 10A Jesus er a bo le siseb er a Jerusalem, e a beluu el rokir a di mlo ouedikel. A re chad a uleker el kmo, “Ngika ng techang?” 11Ma seked a dilu el kmo, “Ngika Jesus el profet, el chad er a Nasareth er a Galilea.” 12A Jesus a mlor a Templo e ultebedeterir tirkel rokui el mirruul oterullir er a chelsel. Ng militech a tebelir a re merukem a udoud e mukel a kingellir a rulterau a belochel, 13e dilu er tir el kmo, “A ngar a Chedaol Llechukl el tekingel a Dios a kmo, A Templo er ngak a mo okedongall el blil a nglunguuch.’ Ngdi kemiu a meruul er ngii el mo omertelir a re merechorech!” 14A re meiko ma re chelemus a mlor ngii er a Templo me ng ulemekungil er tir. 15A re bderrir a re prist ma re sensei er a Llach a mlo kesib a rengrir er ser a le ues a ikel ungil tekoi el le riruul e dirrek el mlo kesib a rengrir er a le rengesterir a re ngalek el uleldiu er a Templo el kmo, “A odanges a mor a Ngelekel a David!” 16Me tuleker er a Jesus el kmo, “Ke remenges a ikel lolekoi?” Ma Jesus a dilu el kmo, “Adang, ak urrenges. Ng dirkak mchieuii tiang er a Chedaol Llechukl el kmo, ‘Ke mla osisecheklterir a re ngalek ma re tolechoi el mo melekoi a meral ungil el odanges?’” 17A Jesus a milechititerir e tilobed er a beluu el mor a Bethania, me ng mlar sei er sel kesus. 18A Jesus er a le ngar omerolel el lmuut el mor a Jerusalem er a bo le kukuk er a dirk tutau, e ng mle songerenger. 19Ng milsa tal kerrekar el fig er a tkul a rael me ng mlong e dimlak le betik a redechel e bai di mlar ngii a llel. Me ng dilu er ngii el kerrekar el kmo, “Ng kmal dikea mluut el mo ourodech!” Me ngiil kerrekar el fig a di mlo moalech. 20A rubengkel a milsang me ng mlo mechas a rengrir. Tuleker el kmo, “Tial kerrekar el fig ng mlekera e di mle mereched el mo moalech?” 21Ma Jesus a dilu el kmo, “Ak meral melekoi er kemiu el kmo chomko kom oumerang el diak louesarech a rengmiu, e ng mo sebechiu el remuul a ikel bla kruul el mor tial kerrekar el fig. E diak di le tiang e le merekong. Ng dirrek el mo sebechiu el melekoi er tial bukl el kmo, ‘Mengukl el mor a daob.’ e ng mong. 22A lsekum kom oumerang, e a ngii di le ngerang el molengit sel moluluuch cho bo mngai.” 23A Jesus a liluut el mor a Templo; e ser a lolisechakl e a re bderrir a re prist ma re mechuodel a mlor ngii e oker el kmo, “Ng ngera llemeltem e meruul a ikal tekoi? Ng techa milskau a ua isel klisiich?” 24Ma Jesus a dilu er tir el kmo, “Ak mo korir er kemiu a di tal ker, e a lsekum kom onger er ngii, e ak mo subedemiu er a llemeltek el meruul a ikal tekoi. 25A llemeltel a Johanes el melecholb er a re chad ng mlar ker el mei, ng mlar a Dios, ma lechub, e ng mlar a re chad?” Me te mocha kaititekangel er a delongelir e kmo, “Ngera kede mo dmung? A lsekum kede mo kmo, ‘Ng mlar a Dios el mei.’ e ng mo kmo, ‘E ngera uchul me ng dimlak moumera er a Johanes?’ 26E kid a medakt el kmo, ‘Ng mlar a re chad el mei.’ ele rokuil chad oumerang el kmo a Johanes a mle profet me te mol tomellid.” 27Tiaikid e te dilu er a Jesus el kmo, “Ng diak kimodengei el kmo ng mlar ker el mei.” Me ng dilu er tir el kmo, “A le ua isei, e ng diak bo kuuchais er kemiu er a llemeltek el meruul a ikal tekoi. 28“Mada ng ngera kom omdasu? Ng mlar ngii a tal chad el mlar ngii a re terul ngelekel el sechal. Ng mlor ngikel klou e dmu er ngii el kmo, ‘Rungalek, bor a sersek er a bilong e moureor er chelechal sils.’ 29E ngii a dmu el kmo, ‘Ng chetik el mong.’ e ngdi uriul e ng ngildechii a uldesuel e mlong. 30E sola e ngiil chad a mlor ngikel kuk tar a re ngelekel e dilu osisiu el tekoi el mor ngii. Me ng dilu el kmo, ‘Choi.’ e a lechub e ng dimlak le bong. 31Ng techa er tirkel terung a riruul a soal a demal?” Me te dilu el kmo, “Ngikel klou.” Itia e a Jesus a dilu el kmo, “Ak subedemiu el kmo a re mela tax ma re prostitute a mo oeak uchei er kemiu el mo soiseb er a Rengedel a Dios. 32Ele Johanes el Chad er a Techolb a mler kemiu el olecholt er a meral rael er kemiu, e dimlak el somiu el oumera er ngii; e a re mela tax ma re prostitute a mlo oumera er ngii. Kom milseterir el mo oumera er ngii, e dirrek el dimlak lobult a rengmiu el mo oumera er ngii.” 33A Jesus a dilu el kmo, “Ka mrengesii a lmuut el tar okesiu. Ng mlar ngii a tal chad el mlar ngii a chetemel me ng dillemii a sers er a bilong er ngii, e sorsii el meliuekl, e kiesii a bo lomet a bilong er ngii, e mekedecherur a blil omengkar er ngii. E sola e ngiluu el mesterir a re chad el mo oungerachel er ngii e ngii a mirrael el mor a tar a beluu. 34Ser a bo le belsechel omengib el rodech, e ngiil chad a uldercheterir a re mesiungel el mo melai a blingelel er a rodech er tirkel oungerachel er a sers. 35E ngdi tirkal oungerachel er a sers a urrekedeterir a re mesiungel, e cholebedii a tang, e mekodir a tang, ma tang a le biltechii er a bad. 36Me ngiil chad a liluut el odercheterir a re kuk bebil er a re mesiungel el mle betok er tirkel di mla mong, ma omerellir a ruungerachel er a sers el mor tir a di ua omerellir el mor tirkel di mla mong. 37E sel kmal mlo ulebongel e ng ulderchii a ngelekel el sechal el mong. Ng millekoi el kmo, ‘Tulterekokl el mo melengmes er a ngelekek.’ 38E a lechub e tirkal oungerachel er a sers er a lesa ngiil chad, e te dilu el kmo, ‘Ngka ngelekel ngikel ousers er tiang. Mei me dokodir e de nguu tia me bo le klokled!’ 39Itia e te urrekedii, e nguu el mdesii er a ikrel a sers e mekodir.” 40A Jesus a uleker el kmo, “A le ua isei, e sel le mei ngikel ouklalo er ngii el sers e ng mo mekera er tirkel chad?” 41Me te dilu el kmo, “Ng ulterekokl el mo mekodeterir tirkel mekngit el chad, e nguu sel sers er a bilong el oterekeklii er a re ngodech el chad el tir a mo omsa blingelel er a rodech sel bo le belsechel omengib el rodech.” 42Ma Jesus a dilu er tir el kmo, “Kemiu ng dirkak mchieuii sel lolekoi er ngii a Chedaol Llechukl el kmo, ‘Sel bad el le chilitii a re meruul a blai el leko ng diak a belkul a mla mo kot el klou a belkul er a rokui el bad. Tia urerel a Rubak. Ng kmal ungil osenged er ngii!’” 43Ma Jesus a dirrek el dilu el kmo, “Ng ua isei ma ksubedemiu el kmo a Rengedel a Dios a bo le nguu er kemiu el mesterir a re bebil er a re chad el tirkel mo ourodech a ungil rodech.” 44A chad el moubuu er bebul tial bad a kmal mo meringel el metemall; e a lsekum ngiil bad a otelechii a tar a re chad, e ng di mekodir. 45A re bderrir a re prist ma re Farisi er a le rengesii tial okesiu el lullekoi er ngii a Jesus, e te mlo medengei el kmo ng melekoi er tir, 46me te millasem el omdechem er ngii, e te di mle medakt er a re betok el chad, ele tulemdasu el kmo a Jesus a profet.

will be added

X\