MATEUS 20

1“A Rengedel a eanged a ua tiakid. Ng mlar ngii a tal chad el ulemkokl el mo osiik er a re chad el mo oureor er a sersel er a bilong. 2Ng kilengei el mo omdoud er tir er sel kirel el ududir, el chimol silber el udoud er a tal sils, e uldercheterir el mo oureor er a sersel er a bilong. 3E a etiu el klok e ng mlor a makit e meseterir a re bebil er a re chad el di dechor el diak a ngeral loruul, 4me ng dilu er tir el kmo, ‘Kemiu mdirrek el mo oureor er a sersek, e ak mo ungil el omdoud er kemiu.’ 5Me te mirrael. E a sueleb ma edel klok me ng dirrek el mle ua isei. 6E a mochu eim el klok e ng liluut el mor a makit e meseterir a re bebil er a re chad el dirk mededechor er isei. Me ng uleker er tir el kmo, ‘Ngera me ng tal sils kung el mngar tiang el di diak a ngeral moruul er ngii?’ 7Me te dilu el kmo, ‘Ng diak a ureram.’ Me ng dilu er tir el kmo, ‘Mada bo moureor er a sersek.’ 8“E a bocha le kebesengei, e ngiil chad el ousers a dilu er a merreder er a ureor el kmo, ‘Momekedong er a re chad er a ureor el mei e momdoud er tir, el omuchel el omdoud er tirkel dirk mle oureor e merael el mor tirkel mle kot el me oureor.’ 9Me tirkel mlo oureor er eim el klok a lulemdoud er tir el mle chimol silber a ududel a tal chad. 10Me tirkel mle kot el mo oureor, ser a le mei e tulemdasu el kmo ng mo betok a ududir; e a lechub e a derta er tir a dirrek el di ngiluu a chimol silber. 11Te ngila ududir e mocha outoketok er ngikal chad er a sers. 12Te dilu el kmo, ‘Tirkel chad el mlo uriul el molai er tir el me oureor a di mle tal sikang el loureor, e kemam a mle tal sils el kim oureor el chuarm er a ringelsils e di osisiu a ududam kemam me tir!’ 13Me ngiil chad a dilu er a tar tir el kmo, ‘Ka morrenges, e rrang. Ngak a dimlak kungeblad er kemiu. Ng kemiu a kilengei el mo mudoud er a chimol silber er a tal sils. 14Mnga ududiu e bo mrei. Ngak a soak el msa ngikal dirk mle oureor el chad a osisiu ngii me sel kbilskau. 15Ngak ng diak a llemeltek el mengedereder a ududek? Ma lechub e kau ke mechechei er ngak a kbekerurau?’“ 16Me ng mirrekui er a cheldechedechal a Jesus el kmo, “Seikid a uchul me tirkel ngar uriul a mor uchei, e tirkel ngar uchei a mor uriul.” 17A Jesus er a lorael el mo ngmasech er a Jerusalem e ng ngilititerir el di mlo tir a re truich ma terul obengkel e milengedecheduch er tir er a rael. 18Ng dilu er tir el kmo, “Mesang, kede mor a Jerusalem, e a Ngelekel a Chad a mor a chimorir a re bderrir a re prist ma re sensei er a Llach, me te mo melsii el kirel el mo mad, 19e sola e nguu el mo mesterir a re Chisentael, me te mo melenguul er ngii, e mo mengelebed er ngii, e mo meleel er ngii er a kerus; e ngdi uriul er edel klebesei e ng lmuut el mo mekiis er a kodall.” 20A bechil a Sebedeus a mlor a Jesus ngii ma re terul ngelekel sechal, me ng ulsus er ngii, e ullengit er ngii er a tar a tekoi. 21Ma Jesus a uleker er ngii el kmo, “Ng ngera soam?” Me ng dilu el kmo, “De rellii a telbiil me sel cho bo mKing e tirkal terul ngelekek bo le dengchokl el obengkem el tar tir a ngar a kadekmem ma tang le ngar a katerum.” 22Ma Jesus a ulenger el kmo, “Kemiu a diak modengelii a cho molengit er ngii el tekoi. Ng sebechiu el mo melim er a kob el bo kulim er ngii?” Me te dilu el kmo, “Ng sebecham.” 23Ma Jesus a dilu er tir el kmo, “Ng ulterekokl el bo molim er a kebengek, e ngdi ngak a diak a klisichek el melilt er a mo dengchokl er a kadekmek ma mo dengchokl er a kateruk. A ikei a mor tirkel bla le kedmokl a Demak el mo kirir.” 24Tirkel truich er a rubengkel a Jesus er a le rengesii tial tekoi, e ng mlo kesib a rengrir er tirkal terul udam. 25Itia e a Jesus a ulleker er tir el rokui el mo kldibel e kmo, “Kemiu a medengei el kmo a re merreder er a re chad el diak loumera er a Dios a mengedereder er tir el olecholt a klisichir, ma re mengeteklir a re chad a di oumerreder er tir. 26Ngdi tia diak bo le ua isei er a delongeliu. A le ngar ngii er kemiu a soal el mo ngarbab, e ng kirel mo mesiou er a rokui el chad; 27ma le ngar ngii a soal mo kot, e ng mo sibmiu, 28el ua Ngelekel a Chad, el dimlak le mei el me siungel, e ng bai mlei el me mesiou e odersii a klengar er ngii el olsobel er a re betok el chad.” 29A Jesus ma rubengkel er a le tobed er a Jeriko, e a re kmal betok el chad a uleltirakl er tir. 30E a re terul meiko el chad a dilengchokl er a tkul a rael e remenges el kmo a Jesus a mocha engelakl, me tuleldiu el kmo, “Ngelekel a David! Bo mchebkemam, e Rubang!” 31Me tirkel betok el chad a uluungeroel er tir e dmu er tir me bo lluk. Ngdi tir a mengal mlo klou a ngerir el oldiu el kmo, “Ngelekel a David! Bo mchebkemam, e Rubang!” 32Ma Jesus a mlo dechor e omekedong er tir el mong. Ng uleker er tir el kmo, “Ng ngera somiu ak rellii el kiriu?” 33Me te dilu el kmo, “Rubak, ng somam cho mrellemam el mo omes!” 34A Jesus a mlo chubteterir me ng rirutech a mederir; me te di mle mereched el mo sebechir el omes, e mocha oltirakl er ngii.

will be added

X\