MATEUS 2

1A Jesus a mlechell er a beluu er a Bethlehem er a Judea er ser a le king a Herodes. A re bebil chad er a Ongos el milsuub a btuch a mlor a Jerusalem 2e oker el kmo, “Ngar ker ngikel tolechoi el mlechell el mo king er a re chad er a Judea? Aki milsa btechengel er a le ngasech er ongos, maki mermang el me mengull el meluluuch er ngii.” 3Ma King Herodes er a le renges ngiil tekoi, e ng kmal mlo ouedikel a rengul, ma re bek el chad er a Jerusalem me ng dirrek el mlo ouedikel a rengrir. 4Ng ulemekedong er a rokui el bderrir a re prist ma re sensei er a Llach el mo kldibel e oker er tir el kmo, “A Mesias ng mo mechell er ker?” 5Me te dilu el kmo, “Ng beluu er a Bethlehem er a Judea. Ele ikakid a lulluches a profet el kmo: 6‘Bethlehem el ngar a beluu er a Juda, kau a diak mkot er iou er a ikel ngarbab el beluu er a Juda; ele ng ngar kau el me duubech a tal merreder el mo mengedereder er a re chedak el chad er a Israel.’” 7Itia e a Herodes a di mle berrotel el omekedo er tirkel chad er Ongos e uleker er tir el kmo ng oingerang e ng mle chemolt ngii el btuch. 8E sola e uldercheterir el mor a Bethlehem e dilu er tir el kmo, “Bong me bo mungil el tirterii ngiil ngalek; e sel cho betik er ngii, e kom me subedak mak dirrek el mong e mengull el meluluuch er ngii.” 9- 10Me te tilobed el merael ma le ngar a rael e te milsa ngii el osisiu el btuch el lilsang er a le ngar Ongos. Ng kmal mlo ungil a rengrir er ser a lesang! Ng uleak mederir el merael, e mlo chelellakl er bebul sel le mlar ngii ngiil ngalek. 11Te mlo soiseb er a blai, e ser a lesa ngii el tolechoi ma delal er a Maria, e te mlo outubuach e milengull el meluluuch er ngii. Tultobed a blebelir el kolt, ma ochod, ma mir e ngilai el msang. 12E sola e liluut el mo remei er a belurir el uleak a ngodech el rael, ele Dios a milengelechel er tir el okiu a berrous el kmo ng diak lluut el mor a Herodes. 13Uriul er a lorael, e a tal anghel er a Rubak a uleak a berrous el mo duum er a Josef e dmu er ngii el kmo, “A Herodes a mo osiik er a ngalek el omekoad er ngii. Me bekiis el nguu ngii el ngalek ma delal e mchiis el mor a Ekipten, e mkiei er isei el dimerkmo bo kdu er kau me morael.” 14Ma Josef a milekiis e nguu a ngalek ma delal e mirrael er a klebesei el mor a Ekipten, 15me te kiliei er isei el mor ser a le mad a Herodes. Tial tekoi a mlo ua isei el oltaut er sel le dillii a Rubak el oeak a profet el kmo, “Ak milekedongii a Ngelekek el sechal el otebedii er a Ekipten.” 16A Herodes er a bo lodengei el kmo a re chad er Ongos a mla chobeldir, e ng kmal ngilasech a rengul. Me ng ultebedii a tekingel el mo omekoad er a re bek el ngalek el sechal er a Bethlehem ma ikel beluu el kmeed er ngii, el ngar eru rekrir el mor iou, el oltirakl a ikel le dilung a re chad er Ongos el kirel sel taem er a bo ledum er tir a btuch. 17Mitia e ng tilaut a lullekoi a profet el Jeremia el kmo: 18“A langel a mlorenges er a Rama, el lengelel a klou el klengiterreng. A Rahel a lmangel er a re ngelekel, e diak bo le mechelaod, ele te mla mad.” 19Ser a le mad a Herodes, e a anghel er a Rubak a uleak a berrous el mo chemolt er a Josef er a Ekipten 20e dmu er ngii el kmo, “Bekiis el nguu a ngalek ma delal e mluut el mor a beluu er a Israel, ele tirkel millasem el omekoad er ngiil ngalek a mla mad.” 21Ma Josef er a le bekiis, e ng ngiluu a ngalek ma delal e liluut el mor a Israel. 22E ngdi Josef er a le renges el kmo a Arkelaus a mlo omtechei er a demal er a Herodes el king er a Judea, e ng mlo medakt el mong. Ng mlor ngii a lmuut el bebil er a tekoi el okiu a berrous, me ng mlor a renged er a Galilea 23e mlo kiei er a beluu el Nasareth a ngklel. Me ng tilaut a tekingir a re profet el kmo, “Te mo omekedong er ngii el kmo Chad er a Nasareth.”

will be added

X\