MATEUS 19

1A Jesus er a bo le merek el mengedecheduch e ng mlar a Galilea e merael el mor a beluu er a Judea el ngar a bitar Omoachel Jordan. 2Te kmal betok el chad a uleltirakl er ngii me ng ulemekungil er tir er isei. 3A re bebil Farisi a mlor a Jesus e millasem el omedikl er ngii me tuleker er ngii el kmo, “A Llach er kid ng kongei er a sechal me ng mengoit er a bechil a lsekum ng ngar ngii a uchul er ngii?” 4Ma Jesus a dilu el kmo, “Ng dirkak mchieuii er a Chedaol Llechukl el kmo ser a kot el uchul e a Dios a ulemeob er a re chad el sechal ma redil? 5A Dios a dilu el kmo, ‘Tiaikid a uchul ma sechal a mo cheroid er a demal ma delal e mo obengkel a bechil, me tir el terung a mocha tal chad.’ 6Ng dikea le terung, e te bai mla mo tal chelechad. Ma le ua isei, e a chad a diak le kirel el mesaod er sel bla lodekiar a Dios.” 7Ma re Farisi a uleker er ngii el kmo, “A le ua isei, e ngera uchul ma Moses a rirellii a llach el mo sebechel a sechal el mo msa bechil a babier er a dertel a chebechiil e dmu er ngii me ng merael?” 8Ma Jesus a dilu el kmo, “A Moses a kilengei er kemiu el mo mengoit er a re bechemiu ele kemiu el medecherecher a rengmiu. E ngdi tia dimlak le ua isei er ser a lobeob a chad. 9Ak melekoi er kemiu el kmo, a sechal el mengoit er a bechil el diak le laokreng a uchul, a mor a laokreng a lsekum ng mo bechil a tar a redil.” 10Ma rubengkel a dilu er ngii el kmo, “A lsekum ng ua ise deleuill er a sechal ma bechil, e ng bai ungil a lak bo de bechiil.” 11Ma Jesus a dilu el kmo, “Tial osisechakl a diak le bor a re bek el chad, ng bai di mor tirkel lomesterir a Dios. 12Ele ng ngar ngii a kakerous el uchul ma re sechal a diak el sebechir el mo bechiil. A re bebil a mlechell el kuk diak el sebechir el bechiil, ma re bebil a merruul el diak bo le bechiil, e a re kuk bebil a diak bo le bechiil el Rengedel a eanged a uchul. Me ngikel sebechel el nguu tial osisechakl bo le nguu.” 13A re bebil chad a ulebeteterir a re ngalek el mor a Jesus el bo lomor a chimal er tir e meluluuch el kirir, e ngdi rubengkel a Jesus a uluungeroel er tir. 14Ma Jesus a dilu el kmo, “Lak molekebai er a re ngalek e bechititerir me le mer ngak, ele Rengedel a eanged a kirir a re ua itirkang.” 15Ng ulemor a chimal er tir e sola e mirrael. 16Ng mlar ngii a tal chad el mlor a Jesus e oker el kmo, “Sensei, ng ngeral ungil tekoi a bo krellii e ak mo nguu a diak a ulebengelel klengar?” 17Ma Jesus a dilu el kmo, “Ngera me koker er ngak a ungil tekoi? Ngikel ungil a di tang. Bo moltirakl a llach a lsekum ng soam el mo soiseb er a klengar.” 18Me ng uleker el kmo, “Ng ngeral Llach?” Ma Jesus a dilu el kmo, “Lak momekoad; lak le melaok a rengum; lak morechorech; lak momulak el oltutakl er a tar a chad; 19mongull er a demam ma delam, e bo le betik a rengum er a ngar bita er kau el ua le betik a rengum er kau.” 20Me ngiil chad a dilu el kmo, “A ikal rokui el llach a kultirakl. Ngera ngodech el dirk kirek el mo meruul er ngii?” 21Ma Jesus a dilu er ngii el kmo, “A le soam el mo cherrungel el ungil, e bo moterau a ikel rokui el ngar ngii er kau e mnga udoud el mesterir a re mechebuul, me le bor ngii a klungiaol el kirem er a eanged; e sola e mei me moltirakl er ngak.” 22Me ngiil kekerel chad er a le renges a ikang, e ng mlo mekngit a rengul e merael, ele ng kmal mle merau. 23Tiaikid e a Jesus a dmu er a rubengkel el kmo, “Ak meral melekoi er kemiu el kmo, ng kmal meringel er a re merau el chad el mo soiseb er a Rengedel a eanged. 24Ak umelekl a tekingek el kmo, ng bai meringel er a merau el chad el mo soiseb er a Rengedel a Dios er a chimol charm el kiamo a bo le siseb er a belsebselel a rasm.” 25A rubengkel er a le renges a ikang, e ng kmal mlo mechas a rengrir. Me tuleker el kmo, “A le ua isei, e ng techa sebechel el mo suobel?” 26Ma Jesus a mle ngellomel er tir e dmu el kmo, “Tia diak el sebechel a chad, e ngdi Dios a di sebechel a rokui el tekoi.” 27Itia e a Petrus a dula el kmo, “Mesang, aki mla chemoit a rokui el tekoi e oltirakl er kau. Ng ngera bo kimngai?” 28Ma Jesus a dilu er tir el kmo, “Bo modengei el kmo a Ngelekel a Chad sel bo le dengchokl er a kingellel er a klebkall er omerreder er sel beches el beluulchad, e seikid e kemiu el truich ma terung el uleltirakl er ngak a dirrek el mo dengchokl a kingall er omerreder, e mo mengedereder a ikel tacher ma teblol klebliil er a Israel. 29E ngikel chiloit a blai ma lechub a re bebil er ngii el sechal ma redil ma lechub a ng demal ma delal, ma lechub e te ngelekel ma chetemel el ngak a uchul, a mo ngmai el 100 el chachisois er a ikel le chiloit e dirrek el mo nguu a diak a ulebengelel klengar. 30Ngdi te betok el ngar uchei er chelechang a mor uriul, ma re betok el ngar uriul er chelechang a mor uchei.

will be added

X\