MATEUS 17

1Uriul er elolem el klebesei e a Jesus a chilteklii a Petrus ma re terul udam el Jakobus ma Johanes el mo ngmasech er a kedidai el rois me te mlar sei el di tir el tang. 2Te milsa Jesus er a le mengodech; a medal a mlo medidiich el ua sils ma bilel a mlo medidiich a chellelengel. 3Tiaikid e tirkal tedei el obengkel a Jesus a milsa Moses ma Elias el mengedecheduch er ngii. 4Ma Petrus a dilu er a Jesus el kmo, “Rubak, ng meral ungil ele kede ngar tiang! Chomko ng soam, e ak mo remuul a kldei el tento er tiang, el tang a tento er kau, ma tang a tento er a Moses ma tang a tento er a Elias.” 5Ng dirk mengedecheduch e a tal medidiich el eabed a mlor bebrir e a ngor a mlar ngii el eabed e melekoi el kmo, “Ngika betik er a renguk el Ngelekek el odeuir a renguk me morrenges er ngii!” 6A rubengkel a Jesus er a le rengesii ngiil ngor e te kmal mlo medakt me te di miltilech el mo chebecheb er a chutem. 7Ma Jesus a mlong e orekedeterir e dmu el kmo, “Bekiis, e lak kom medakt!” 8Me tulekiis a mederir e dimlak a ngodech el chad el lesang, ngdi mle tal Jesus. 9Ser a bocha le metengel er a rois, e a Jesus a dilu er tir el kmo, “Sel cho milsa er a rois a diak mouchais er ngii el mor a ngii di le chad el dimerkmo le bekiis er a kodall a Ngelekel a Chad.” 10Itia e a rubengkel a Jesus a uleker er ngii el kmo, “Ngera uchul ma re sensei er a Llach a kmo a Elias a kirel el di ma mei?” 11Ma Jesus a dilu el kmo, “Ng meral kirel a Elias el di ma mei, ele ng mo mengedmokl a bek el tekoi. 12Ngdi kuuchais er kemiu el kmo a Elias a mla mei e a re chad a dimlak bo lodengelii, me te di mirruul a ikel sorir er ngii. Ng dirrek el mo ua isei omerellir el mor a Ngelekel a Chad.” 13Tiaikid e a rubengkel a mocha medengei el kmo ng millekoi er tir el kirel a Johanes el Chad er a Techolb. 14Tia er a lluut el mor a delongelir a re betok el chad, e a tal chad a mlor a Jesus, e mlo outubuach er medal 15e kmo, “Rubak, bo mchebur a ngelekek! Ng mla ngmasech er ngii a bellek me ng kmal chorma er ngii ele ng betekngal le tuu er a ngau e ruebet er a chelsel a ralm. 16Ak ngiluu el mor a rubengkem, ngdi dimlak el sebechir el omekungil er ngii.” 17Ma Jesus a dilu el kmo, “Kom meral cheleuid el chad e diak moumerang! Ak di obengkemiu el mo oingerang? Ak di outekangel el mechikemiu el ua isei el mo oingerang? Ka mnguu ngiil buik el mei!” 18A Jesus a dilu er ngii el mekngit el chelid me ng tuobed er ngiil buik, me ng di mle seikid e ng mo ungil. 19Itia e a rubengkel a Jesus a mlor ngii me ng di mlo tir e toker er ngii el kmo, “Ngera uchul me ng dimlak el sebecham el otebedii ngiil mekngit el chelid?” 20Ma Jesus a dilu el kmo, “A uchul e ng dimlak msal oumerang. Ak meral melekoi er kemiu el kmo chomko kom di telkib el oumerang el ua klungel a tane er a meringel, e ng sebechiu el dmu er tial bukl el kmo, ‘Mengukl er tial mor sei!’ e ng mong. Ng mo sebechiu el meruul a ngii di le tekoi!” 21A di tal rolel e ng mo sebeched el odikii choua ingikal mekngit el chelid a bo dolsengerenger e doluluuch. 22Ser a bo le kldibel a rokui el obengkel a Jesus er a Galilea, e ng dilu er tir el kmo, “A Ngelekel a Chad a di kmedu e te mo nguu el mesterir a re chad 23me te mo mekodir; e ngdi uriul er edel klebesei e ng mo mekiis er a kodall.” A rubengkel a kmal mlo mekngit a rengrir. 24A Jesus ma rubengkel er ser a le bor a Kapernaum, e a re mela tax er a Templo a mlo oker er a Petrus el kmo, “A sensei er kemiu ng melecha tax er a Templo?” 25Ma Petrus a dilu el kmo, “Adang.” Ma bo le siseb er a blai a Petrus, e a Jesus a ulemuchel el mengedecheduch el kmo, “Simon, ngera komdasu? Ng techa kirel el melecha tax el mor a king er tial beluulchad? Te chad er sel beluu ma lechub e te chad er a tar a beluu el kiei er ngii?” 26Ma Petrus a dilu el kmo, “Ng tirkel chad er a tar a beluu.” Me ng dula Jesus el kmo, “Mada le ua isei, e a re chad er a beluu a diak lolecha tax. 27Ngdi becherei e kid a diak el soad el tordeterir tirkal chad, me morael el mo mengereel. Ngikel kot el ngikel el mkerelii cho bo betik er a udoud er a chelsel a ngerel, el mo sebechel el locha tax er kau me ngak er a Templo. Ke mo nguu el mo locha tax er kid.”

will be added

X\