MATEUS 15

1A re bebil el Farisi ma re sensei er a Llach a mlar a Jerusalem el mor a Jesus e oker er ngii el kmo, 2“Ngera uchul ma rubengkem a diak lolab osisechakl el lullab a rucheled er a rechuodel el mei? Ng diak lolebal a chimorir el oltirakl er a meral rolel er uchei er a lomengur!” 3Ma Jesus a dilu el kmo, “E kemiu ngera me kom kuk oleiit a llechul a Dios e oltirakl a di osisechekliu? 4A Dios a dilu el kmo, ‘Mongull er a demam ma delam.’ e dirrek el dilu el kmo, ‘Ngikel melebeakl er a demal ma lechub e ng delal a mo okodall.’ 5Kemiu olisechakl el kmo a chad a le ngar ngii a ngera er ngii el sebechel el ousbech er ngii el olengeseu er a demal ma lechub e ng delal, e a bo ledu el kmo, ‘Tia kloklel a Dios.’ 6e ng di ungil a lak longull er a demal.’ Ng ua ise blekerdeliu el mengoit a llechul a Dios e oltirakl a di osisechekliu. 7Kom cheblad! Ng meral tekoi a ikel lulemlaoch a Isaia el kiriu el kmo, 8‘Tirkal chad a mengull er ngak el di olab a tekoi er a ngerir, e a rengrir a meral cheroid er ngak. 9Ng diak a ultutelel a longull el meluluuch er ngak, ele tolisechakl a rruul er a re chad el llach el leko ng llechuk!’” 10Itia e a Jesus a ulemekedong er a seked el mor ngii e dmu er tir el kmo, “Morrenges e momtab! 11Ng diak likel mo soiseb er a ngerel a chad a mekidekelii; ng bai ikel me tuobed er ngii a mekidekelii.” 12Ma rubengkel a mlor ngii e kmo, “Ke medengei el kmo a ikel mdilung a mla tomall a rengrir a re Farisi?” 13Ma Jesus a dilu el kmo, “A bek el dellomel el dimlak lolalem a Demak el ngar a eanged a mo obadel. 14Bo bechititerir! Te meiko e leko te mengetakl er a re meiko; ma tal meiko a longetakl er a tar a meiko, e te dul mo ruebet er a delebedeb.” 15Ma Petrus a dula el kmo, “Ka msodii tial tekoi er kemam.” 16Ma Jesus a dilu er tir el kmo, “Kemiu me ng dirrek el rrau a rengmiu el di ua itir? 17Ng diak modengei el kmo a ikel soiseb er a ngerel a chad a mor a delel e sola e mo tuobed er a bedengel? 18A ikel me tuobed er a ngerel a ngar a reng el mei, ma ikeikid a mekidekelii a chad. 19Ele mekngit el uldasu a ngar a reng el mei el choteklii a chad el mo omekoad, e mor a laokreng, e mo meruul a kuk bebil er a mekngit el tekoi; el mo merechorech, e omulak, e melaes er a re chad. 20A ikakid el tekoi a rullii a chad el mo diak le klikiid. Ngdi lak morisu a chimomiu el ua ikel lolekoi e momengur, e tia diak le rellii a chad el mo diak le klikiid.” 21A Jesus a tilobed er isei e merael el mor a renged el kmeed er a beluu er a Tyre ma Sidon. 22A tal redil er a Kanaan el kiei er isei a mlor ngii e lmangel el dmu el kmo, “Ngelekel a David! Bo mchebkak e Rubang! A ngelekek el redil a ngar ngii a mekngit el chelid er ngii me ng kmal chuarm.” 23A Jesus a di liluk er ngii. Ma rubengkel a Jesus a mlor ngii e olengit er ngii el kmo, “Mdu er ngii me lorael! Ng oltirakl er kid e di mengerodech!” 24Itia e a Jesus a dula el kmo, “Ngak a mlodurech el mei el di kirel a ririid el sib er a re chad er a Israel.” 25Ser a le renges a ikang ngiil redil, e ng di mlong el mo obiou er a le dechor er ngii a Jesus e dmu el kmo, “Rubak, mngesukak!” 26Ma Jesus a dilu el kmo, “Ng diak lungil a de nguu a kelir a re ngalek el mideklii er a bilis.” 27Me ngiil redil a kmo, “Ng merang e Rubak, ngdi bilis a sebechel el menga der el ikel ruebet er a tebelel a mastang er ngii.” 28Ma Jesus a dula er ngii el kmo, “Kel dil, ke kmal mesisiich el oumerang. A ikel soam a mo tmaut.” Me ng di mle seikid e ng mo ungil a ngelekel. 29A Jesus a tilobed er sei e mirrael el okiu a tkul a daob er a Galilea. Ng ngilasech el mor a ked e mlo dengchokl. 30Ma re kmal betok el chad a ulebeteterir a re chitechut ocherir, ma re meiko, ma re chelemus, ma re bengong, ma re betok el chad el smecher, el mor bitar ochil a Jesus me ng ulemekungil er tir. 31Me tir el betok el chad er a leseterir a re bengong el mocha mengedecheduch, ma re chelemus el mocha cherrungel a bedengir, ma re chitechut ocherir el mocha merael, ma re meiko el mocha omes, e te chilat er a Dios er a Israel. 32A Jesus a ulemekedong er a rubengkel el mong e kmo, “Ng mekngit a renguk er tirkel chad ele ng mla mo edei el klebesei el lobengkek e diak a kelir. Ng diak el soak el di diak kukelterir e melmesumech er tir, ele te mol mo mechitechut a bedengir e obides er a melengel a rael.” 33Ma rubengkel a uleker er ngii el kmo, “Ng ker er tial ked a bo de betik a kall er ngii el sebechel el mekelii tial klou el seked?” 34Me ng uleker er tir a Jesus el kmo, “Ng telal blauang cho molab?” Me te dilu el kmo, “Ng di kleuid el blauang ma erul mekekerel ngikel.” 35Tiaikid e a Jesus a dula er a re chad me te mo dengchokl er a chutem. 36E sola e ngoio ikal kleuid el blauang ma ikal ngikel, e mereng a sulel a Dios, e mached e ngmai el mesterir a rubengkel me te mo omesterir a re chad. 37Te rokui el ulemengur el mo medinges. E sola e a rubengkel a Jesus a chiludel a der el milekeek a kleuid el sualo. 38A ildisir tirkel ulemengur a mle 4000 el sechal, e diak domechur er a redil ma re ngalek. 39Seikid e a Jesus a dilu er a re chad me te merael, e ngii a ngmasech er a bos el mor a beluu er a Makadan.

will be added

X\