MATEUS 14

1Seikid e a Herodes el merreder er a Galilea a rirenges a chisel a Jesus. 2Ng dilu er a re chedal el kmo, “Ngike ulterekokl el Johanes el Chad er a Techolb el mla lmuut el me chad. Seikid a uchul me ng mesisiich el meruul a mengasireng el tekoi.” 3Ele uchei er itiang e a Herodes a ultebedii a tekingel me ng mengai a Johanes e merenged e mor a kelebus, el Herodias el bechil a tar ngii er a Filip a uchul. 4Ele Johanes el Chad er a Techolb a di millekoi er a Herodes el kmo, “Ng diak le melemalt cho bechil a Herodias!” 5A Herodes a mlo soal el omekoad er a Johanes, e ngdi mle medakt er a re chad er a Judea ele tulemdasu el kmo a Johanes a profet. 6Ng mlar ngii a mur er a Herodes ma ngelekel a Herodias el redil a milloik er mederir a rokui el chad. A Herodes a kmal mlo ungil a rengul 7me ng dilu er ngii el kmo, “Ak ulsiich a tekingek el kmo ak mo meskau a ngii di le ngerang el bo molengit er ngii!” 8Ng uleltirakl a tekingel a delal e ullengit er a Herodes el kmo, “Mlia bdelul a Johanes el Chad er a Techolb er tial belatong e beskak er chelechang!” 9A king a mlo mekngit a rengul e ngdi sel telbilel el le rirellii er mederir a re chad a uchul me ng dilu me te msa ngii el redil sel lullengit er ngii. 10Misei e ng dilu me te mo nguu a bdelul a Johanes er a kelebus. 11Te ngiluu a bdelul el ngar a belatong el mo msa ngii el redil, me ng ngiluu el mo msa delal. 12A rubengkel a Johanes a mlo nguu a cheklechel el mo doklii, e sola e mlo subedii a Jesus. 13A Jesus er a le renges a chisel a Johanes, e ng mlar a bos el merael e di mle ngii el tang el mor a diak a re chad er ngii. E a re chad a rirenges a chisel, me te tilobed er a re kebelurir e uleltirakl er ngii el di uleak a beluu. 14Ma Jesus er a lekerd er a bos e lesa klou el seked, e ng kmal mlo chubteterir, me ng ulemekungil er tirkel silecher. 15E a bocha le kebesengei e a rubengkel a mlor ngii e dmu el kmo, “Ng mla mo kebesengei e tial de ngar ngii a diak a ngera er ngii. Mdu er a re chad me le bor a beluu me lomechar a kelir.” 16Ma Jesus a dilu el kmo, “Ng diak le kirir el merael. Kemiu bo besterir a kelir me lomengur!” 17Me te dilu el kmo, “A kim olab el kall a di kleim el blauang ma erul ngikel.” 18Ma Jesus a dilu el kmo, “Mada mngai el me meskak.” 19Ng dilu er a re chad me te mo dengchokl er a chudel; e sola e ngii a ngilai a ikal kleim el blauang ma erul ngikel e mlo dmangesbab el bedul a eanged, e mereng a sulel a Dios. Ng milached ngii el blauang e ngmai el mesterir a rubengkel me te mo omesterir a re chad. 20A rokui el chad a ulemengur el mo medinges. E a rubengkel a Jesus a chiludel a der el milekeek a tacher ma teblol sualo. 21A ildisir tirkel ulemengur a mle bekord el 5,000 el sechal, el diak domechur er a redil ma re ngalek. 22E sola e a Jesus a dmu er a rubengkel me te mo ngmasech er a bos e ma mo imuul er a bitang, e ngii a kiei el merader er a re chad. 23Ma uriul er a le ngederterir, e ng di mle ngii el tang el mo ngmasech er a rois el mo meluluuch. Me ser a bocha le kebesengei, e a Jesus a di mle ngii el tang; 24e a bos a cherida er a beluu ma daob a uleldechelakl er ngii ele ng ulemtok er a eolt. 25Ngar a delongelel edei ma elolem el klok er a mochu tutau e a Jesus a merael er bebul a daob el mor a rubengkel. 26Ser a lesang el merael er bebul a daob, e te kmal mlo medakt. Te dilu el kmo, “Ng deleb!” e mlo medakt me tuleldiu. 27Ma Jesus a di mle mereched el dmu er tir el kmo, “Bo le kie rengmiu e ng ngak, me lak kom medakt!” 28Mitia e a Petrus a dula el kmo, “Rubak, a lsekum ng meral kau, e mdu er ngak me kurael er bebul a daob el ekor kau.” 29Ma Jesus a dilu el kmo, “Mei!” Ma Petrus a mlo metengel er a bos e mocha merael er bebul a daob el mor a Jesus. 30Ngdi ser a lesa klisichel a eolt, e ng mlo medakt e mocha orresors me ng oldiu el kmo, “Rubak, mosebelak!” 31Ma Jesus a di mle mereched el odersii a chimal el mo orekedii e dmu er ngii el kmo, “Kau a diak msal oumerang! Ngera uchul me ng mlo suebek a rengum?” 32Te mlo ngmasech er a bos el terung e ng mo diak a eolt. 33Itia e a rubengkel el mlar a bos a milengull el meluluuch er a Jesus e dmu el kmo, “Kau a meral Ngelekel a Dios!” 34Te mlo imuul el mor a beluu er a Genesaret, 35ma re chad er ngii a dilengchii a Jesus. Me tuleldurech el mo melai er a re smecher er a ikel rokui el beluu el iliuekl er tir e ulebeteterir el mor a Jesus. 36Tullengit er ngii ma re smecher di bo le retechii a rsel a bilel; me tirkel rokui el rirtechii a mlo ungil er a rektir.

will be added

X\