MATEUS 13

1Seikid el osisiu el sils e a Jesus a tilobed er a blai e merael el mor a tkul a daob me ng mlo dengchokl e olisechakl. 2Ng kmal mle betok a re chad el kldibel el meliuekl er ngii me ng mlo ngmasech er a bos el mo dengchokl, e a seked er a re chad a dechor er a rriil. 3Ng uluusbech okesiu el mengedecheduch er tir a betok el tekoi. Ng dilu el kmo, “Ng mlar ngii a tal chad el tilobed el mo omriid a tane. 4Me ser a lomriid ngiil tane er a sers e a bebil a rirebet er a rael, ma suebek el charm a mlei el kmang. 5E a bebil a rirebet er a bedbeduul el chutem me ng di meliliut a chetemel. Ng di mle mereched el duubech ele ng dimlak el dolech a chetemel. 6Ngdi ser a bo le meringel a sils, e ng meldul ngiil dellomel ele ng diak el dolech a risel er a chutem me ng di mle mereched el mo moalech. 7E a kuk bebil a rirebet er a deliul a tochedulik, ma tochedulik a dilubech el chuucheb ngiil dellomel. 8Ngdi bebil a rirebet er a ungil chutem, me ng mlo ourodech, el bebil a derdart a redechel, ma bebil a dersokolem, ma kuk bebil a dersokedei.” 9Ma Jesus er a lorekui er tial okesiu e ng dilu el kmo, “Bo mungil el orrenges a lsekum ng ngar ngii a dingemiu!” 10Itia e a rubengkel a Jesus a mocha er ngii e oker er ngii el kmo, “Ngera uchul me kousbech okesiu el mengedecheduch er a re chad?” 11Ma Jesus a dilu el kmo, “A klemedengei el kirel a bertelel a Rengedel a eanged a le bilskemiu, e ngdi dimlak le besterir. 12Ele chad el ngar ngii a ngera er ngii a lluut el msa bebil me ng mo chachisois a lolab; e ngdi chad el diak a ngera er ngii a mo mengai er ngii a ikel kesai el lolab. 13A uchul ma kuusbech okesiu el mengedecheduch er tir, tomes, e diak a ngeral lesang, e orrenges e diak a ngeral le rengesii ma lechub e bo lodengelii. 14Me ng mo tmaut er tir a ulochel a Isaia el kmo, ‘Tirkal chad a mo betok el lorrenges e diak bo lodengei; e mo betok el lomes, e diak a ngeral lesang, 15ele ng mekebelung a uldesuir, me ng mla tminget a dingerir e mla mutek a mederir. A Dios a dmu el kmo, chomko ng diak le ua isei, e a mederir omes, ma dingerir orrenges, ma uldesuir omtab a tekoi, me tobult el mer ngak, ma kmo omekungil er tir.’ 16“Ngdi kemiu a kmal ngeltengat! A medemiu omes ma dingemiu orrenges! 17Ak uuchais er kemiu el kmo te betok el profet ma re betok el chedal a Dios a kmal uluureng el mo omes a ikal momes, e orrenges a ikal morrenges, e ngdi dimlak el sebechir. 18“Mada morrenges me bo modengelii a belkul ngii el okesiu. 19Tirkel orrenges osisecheklek el kirel a Rengedel a Dios e diak bo lodengelii a ua ikel tane el rirebet er a rael. A Diabelong a mei el merober er tir a ikel le ngilai. 20E a tane el rirebet er a bedbeduul el chutem a melekoi er tirkel chad el sel le rengesii ngii el osisechakl e ng di mereched el mo dmeu a rengrir. 21Ngdi diak lungil el medalem er a rengrir me ng diak le meketeket el medechel. Me sel le me ringel ma lechub e ng odechelakl el kirel ngii el osisechakl, e te di mereched el touchakl. 22E a ikel tane el rirebet er a deliul a tochedulik a melutk er tirkel rongesii ngii el osisechakl, e a sebekreng er tial klengar ma ngibes er a kerruul a chuucheb me ng diak bo lourodech. 23Ma tane el rirebet er a ungil chutem a tirkel orrenges ngii el osisechakl e mo omtab er ngii, me te mo ua bekerredechel el dellomel el ourodech el derdart, ma dersokolem, ma dersokedei a redechel.” 24A Jesus a uluuchais er tir er a tar a okesiu el kmo, “Ng ua tiakid a Rengedel a eanged. A tal chad a ulemriid a ungil tane er a sersel. 25A tar a klsus er a bla bo le bad a re bek el chad e a cherarou a mlei el mriid a tane er a mekngit el dellomel er a delongelel ngiil tane er a ungil dellomel e merael. 26Me tia er a bo le meklou ngiil dellomel el mocha oltobed a bngal, e ng mocha bleketakl a ikal mekngit el dellomel. 27Ma re mesiungel ngiil chad a mocha er ngii e dmu el kmo, ‘Rubak, kau ke kor a ulemriid a tane er a ungil dellomel er a sersem; e a ikel mekngit el dellomel ng mlar ker el mei?’ 28Me ng dilu el kmo, ‘Ng cherarou a rirellii tiang.’ Me toker er ngii el kmo, ‘Ng soam aki bo badel a ikel mekngit el dellomel?’ 29Me ng dilu el kmo, ‘Ng diak. Ele cho bo momadel a ikel mekngit el dellomel e kom mol odak el madel a bebil er a ikel ungil dellomel. 30Bechei me di le dak el merael el mo meklou el mor sel belsechel ngiuul. Isei e ak mo dmu er tirkel chad er a ureor me te mo madel e ngmai a ikel mekngit el remenged e dmul er a ngau, e sola e mochu melai a ikel ungil dellomel el mo melecha er a blil a dellomel.’” 31Ma Jesus a uluuchais er a tar a okesiu er tir el kmo, “Ng ua tiakid a Rengedel a eanged. A tal chad a nguu a tane er a meringel el dolemii er a sersel. 32Ng kot el kekerei er a bek el tane er a dellomel, e ngdi sel le dubech, e ng kot el mo klou er a bek el dellomel. Ng mo kerrekar ma suebek el charm a mo meruul a lukel er a rechelel.” 33Ng dirrek a Jesus el liluut el ouchais er a kuk tar a okesiu el kmo, “Ng ua tiakid a Rengedel a eanged. A tal redil a ngma bebil er a omkukel a blauang el mrechemii er a chimol bek el merikengko me ng di obkuuk el rokir.” 34A Jesus a uluusbech okesiu el ouchais a ikal rokui el tekoi el mor a klou el seked er a re chad; ng dimlak a ngeral lolekoi er tir el dimlak lousbech okesiu. 35Tiaikid a ultaut a tekingel a profet er a ledu el kmo, “Ak mo ousbech okesiu sel kungedecheduch er tir; e mo ouchais er tir er a tekoi el mle berrotel er a lomuchel a beluulchad el mer chelechang.” 36A Jesus a milechititerir a re chad e mo soiseb er a blai ma rubengkel a mlor ngii e dmu el kmo, “Ka msbedemam er a belkul sel okesiu er a mekngit el dellomel er a sers.” 37Ma Jesus a dilu el kmo, “Ngikel ulemriid a ungil tane er a dellomel a Ngelekel a Chad; 38ma sers a beluulchad; ma ungil tane er a dellomel a tirkel chad el mo chad er a Rengedel a Dios; e a ikel mekngit el dellomel a tirkel chad el chedal a Diabelong; 39me ngikel cherarou el ulemriid a mekngit el dellomel a Diabelong. A belsechel omelai el dellomel a sel ulebongel er a beluulchad, me tirkel mo melai a dellomel a re anghel. 40A ikel mekngit el dellomel a mechudel e medul er a ngau, me ng mo ua isei er a ulebongel er a beluulchad, 41a Ngelekel a Chad a mo odercheterir a re anghel er ngii el mo mengudel er tirkel ngar a Rengedel el mle uchul ma re chad a mlor a klengit me tirkel rokui el mirruul a mekngit, 42me te mo choititerir er a kmard a ngau er ngii el ollaol, me te mo lmangel e olengchongch a ungelir. 43Isei e a re chedal a Dios a mo ngar a Rengedel a Demerir e mo medidiich el ua sils. Seikid a uchul me bo mungil el orrenges a lsekum ng ngar ngii a dingemiu! 44“Ng ua tiakid a Rengedel a eanged. A tal chad a miltik er a berrotel el mekreos el klalo el ngar a sers. Me ng lmuut el mertii, e kmal ungil a rengul me ng merael el mo oterau a rokui el kloklel e lmuut el mei el me mecherar ngiil sers. 45“Ng dirrek el ua tiakid a Rengedel a eanged. A tal chad el osiik a ungil el ngisel a chesiuch, 46sel le betik er a chimong el kmal meringelchad, e ng mo oterau a bek el kloklel, e ngii a mo mecherar seikid el ngisel a chesiuch. 47“Ng dirrek el ua tiakid a Rengedel a eanged. A re chad er omenged sel lomuked e ng bek el bedengel a ngikel a soiseb er a ukedir. 48Me sel bo le mui, e te kursii el ongesechii er a rriil e mo dengchokl e meleakl, me te ngma ungil ngikel el locha er a sualo, e a mekngit a le choit. 49Sel le me ulebongel er a beluulchad e ng mo ua isei, a re anghel a mo meleakl er a re mekngit el chad er a re ungil chad 50e ngoititerir a re mekngit el choititerir er a kmard a ngau er ngii el ollaol me te mo lmangel e olengchongch a ungelir.” 51A Jesus a uleker er tir el kmo, “Kom mla mo medengei a ikal tekoi?” Me te dilu el kmo, “Ochoi.” 52Me ng dilu el kmo, “A le ua isei e tiakid a belkul el kmo, a re bek el sensei er a Llach el mla mo oltirakl osisechakl er a Rengedel a eanged a ua oublai el chad el oltobed a beches ma mechut el klalo er a blil a kloklel.” 53Ser a bo le merek a Jesus el mengedecheduch el ousbech a ikal okesiu, e ng tilobed er sei 54e merael el mor a belual. Ng ullisechakl er a blil ongdibel me tirkel rirengesii a mlo mechas a rengrir. Tuleker el kmo, “A ikal tekoi ng siluub er ker? E ngila klisichel er ker el meruul ongasireng el tekoi? 55Ngika ng diak le ngelekel ngikel daiksang? Ng diak le ngelekel a Maria, e a Jakobus, ma Josef, ma Simon, ma Judas a tar ngii? 56A rokui el ochedal te kor a kiei er tiang? A ika ng ngilai er ker?” 57Me ng mlo chetirir ngii. Ma Jesus a dilu er tir el kmo, “A profet a longull er ngii er a bek el beluu, ngdi re chad er a belual ma blil a diak longull er ngii.” 58A re chad a dimlak loumerang a uchul ma Jesus a dimlak le betok el ongasireng el tekoi a le riruul er isei.

will be added

X\