MATEUS 11

1A Jesus er a bo le merek el melekoi a ikal tekoi er a re truich ma terul obengkel, e ng mirrael el mo olsisechakl er a ikel beluu el mle kmeed er sel le mlar ngii. 2A Johanes el Chad er a Techolb a mlar a kelebus e remenges a chisel a ikel tekoi el loruul a Kristus, me ng uldercheterir a re bebil er a rubengkel el mor ngii. 3Tuleker er a Jesus el kmo, “Ka mouchais er kemam el kmo kau ke ngikel lolekoi er ngii a Johanes el kirel el mei, ma lechub e aki dirk mengiil er ngii?” 4Ma Jesus a dilu el kmo, “Mluut el mong e msbedii a Johanes er a ikel morrenges ma cho momes, 5a re meiko a mla mo sebechir el omes, ma re chitechut ocherir a mla mo sebechir el merael, me tirkel chebedes a mla mo klikiid, ma re mechad a mla mo orrenges, ma re mlad a mla lmuut el mo chad, ma Ungil Chais a mla oberk el mor a re mechebuul. 6Te ngeltengat tirkel diak le rrau a rengrir er ngak!” 7Ma lorola rubengkel a Johanes e a Jesus a milengedecheduch er a seked el kirel a Johanes el kmo, “Ser cho mtobed el mor a Johanes er a ked, e ng ngera leko kom mlo omes er ngii? Kom mlo omes a chudel el lolmesim a eolt? 8Kom tilobed el mo omes er a ngerang? Kom mlo omes er a ungil a bilel chad? A re ungil a bilir el chad a kie blirir a re king! 9Mouchais er ngak el kmo ng ngera kom mlo omes er ngii? Kom mlo omes er a profet? Ng ua isei, ngdi kemiu a milsang a kuk ngarbab er a profet. 10Ele Johanes a ngikel lolekoi er ngii a Chedaol Llechukl el kmo, A Dios a kmo, ak mo oderchii oderchelek el oeak uchei er kau el mo mengedmokl er a rolem.’ 11Ak meral subedemiu el kmo a Johanes el Chad er a Techolb a ngarbab er a re bek el chad er uchei er ngii. Ngdi ngikel kot el ngariou er a Rengedel a eanged a kuk ngarbab er a Johanes. 12Ser a lolisechakl a Johanes el me lmuut er chelechang e a Rengedel a eanged a kmal mlo meringel el modechelakl e a re bekeu el chad a melasem el melemall er ngii. 13A rokui el profet ma Llach er a Moses a uluuchais a chisel ngiil Renged el mo lmuut er a le mei a Johanes; 14e a lsekum ng somiu el mo oumerang a klumech el lolekoi, e a Johanes a Elias, el ngikel lulemlaoch er ngii el kmo ng mei. 15A le ngar ngii a dingemiu el orrenges, e bo morrenges! 16“Ng ngera sebechek el obang el omekesiu er ngii er a re chad er chelechang? Te ua re ngalek el dengchokl er a blil a makit, e a re bebil oldiu el mor a re bebil el kmo, 17Aki uluutumetum el kiriu a chelitakl er a merengel a chebechiil, e kemiu a dimlak moloik! Maki milengitakl a chelitakl er a kemeldiil, e dirrek el dimlak mlangel!’ 18A Johanes er a le mei, e ng ulelsengerenger e dimlak lolim a bilong, ma re bek el chad a dilu el kmo, ‘Ng teluchel er a mekngit el chelid!’ 19E a le me Ngelekel a Chad el menga e melim, e a re bek el chad a melekoi el kmo, ‘Mesa ngikal chad! Ng ngemokel e chad er omelim, e ousechelei er a re chad er omelai el tax ma re kuk bebil er a re mekngit el chad!’ Ngdi llomeserreng er a Dios a chemolt el klemerang el oeak a ikel lukdubech el tekoi.” 20A re chad er a ikel beluu el Jesus a mirruul oumesingd er a ikel mengasireng el tekoi er ngii a dimlak lobult el mo cheroid er a kngterir, ma Jesus a millekoi a meringel tekoi el kirel ngiil beluu. 21Ng dilu el kmo, “Ng kmal mo kdekudel el kirem e Korasin! Ng dirrek el kmal mo kdekudel el kirem e Bethsaida! Chomko ikel mengasireng el tekoi el merruul er a chelsiu a merruul er a Tyre ma Sidon, e ng meketeket er a bo loubail a bek a re chad er ngii, e longab er tir er a chab el olechotel a kmo te mla obult el mo cheroid er a kngterir! 22Mak kmal subedemiu el kmo sel Sils er a Kerrekeriil e a Dios a mo beot a loukerrekeriil er a Tyre ma Sidon e bai mo meringel el oukerrekeriil er kemiu! 23E kau el Kapernaum! Ng mle soam el olengesechekl er kau el mor a eanged? Ke mo obidokl el mor a beluu er a ngau! A ikel mengasireng el tekoi el merruul er a chelsem chomko ng merruul er a Sodom e ng dirk medechel el mer chelechang! 24Bo modengei el kmo sel Sils er a Kerrekeriil e a Dios a mo beot el oukerrekeriil er a Sodom e bai mo meringel el oukerrekeriil er kau!” 25Seikid e a Jesus a dilu el kmo, “Chedam, el Rubak er a eanged ma chutem! Ak mereng a sulem ele ke mla ocholt er a re diak a skulir a ikel cho bilart er a re mellomes a rengrir ma re ngar ngii a skulir. 26Ng ua isei e Chedang, tiaikid sel mle soam. 27“A Demak a mla meskak a rokui el tekoi. Ng diak a chad el medengelii a Ngalek; ng di tal Chedam a medengelii, ma diak a medengelii a Chedam, ng di tal Ngalek me tirkel lolilt er tir a Ngalek el olecholt er ngii er tir. 28“Mer ngak, kemiu el rokui el chorma er oberaod el chelungel, e ak mo meskemiu a ulengull. 29Mnguu ongelungel er ngak el cholngii, e mosuub er ngak, ele ngak a medemedemek e ngariou a renguk; me kom mo metik er a ulengelliu. 30Sel ongelungel el bo kumeskemiu a beot, me sel chelungel el bo kumatk er ngii er kemiu a kebekakl.”

will be added

X\