MATEUS 10

1A Jesus a ulemekedo er a re truich ma terul obengkel el mo kldibel e milsterir a klisiich el oltobed a mekngit el chelid e omekungil a bek el bedengel a rakt. 2A ikakid a ngklir a re truich ma terul apostol, ng omuchel er a Simon el Petrus ma tar ngii er a Andreas; ma re ngelekel a Sebedeus, el Jakobus ma tar ngii er a Johanes; 3ma Filip ma Bartholomeus; ma Thomas, ma Mateus, el chad er omelai el tax; ma Jakobus el ngelekel a Alfeus, ma Thadeus; 4ma Simon el chad er a Ngarablakerreng, ma Judas Iskariot el ngikel ulterur a Jesus. 5A Jesus a uldercheterir tirkel truich ma terul chad e dilu er tir a ikal tekoi el kmo, “Ng diak bor a belurir a re Chisentael ma lechub e bor a belurir a re chad er a Samaria. 6Ko bai mor tirkel chad er a Israel el ririid el sib. 7Bong e mouchais el kmo, A Rengedel a eanged a kmedang!’ 8Momekungil er a re smecher, e molekiis er a re chad er a kodall, e momekungil er a re chebedes, e moltobed a mekngit el chelid. Ng dimlak momechar a ikel ilekor kemiu, me lak bo locheraol a cho momesterir a re chad. 9Ng diak molab a udoud a cho morael; 10ng diak molab a detmiu er omerael ma lechub oidelliu ma lechub oeacher ma lechub a skors. A chad el oureor a udesuall er a ikel lousbech. 11“Sel cho bor a beluu, e kom mo soiseb e osiik er a chad el ungilbesul er ngii el ngoikemiu, e mo kiei el obengkel el dimerkmo cho morael. 12Sel bo mtuu er a blai e kom dmu el kmo, A budech lekor kemiu. 13Ma lsekum a re chad er ngii el blai a ngoikemiu, e a budech a mo medechel er ngii; ngdi lsekum ng diak le ngikemiu, e kom lmuut el nguu sel budech el mulebal mong. 14E a lsekum ng ngar ngii a blai ma lechub e ng beluu el chetirir cho bong, ma lechub e ng chetirir el orrenges er kemiu, e kom smars a chebechab er ochemiu e merael. 15Ak meral dmu er kemiu el kmo, sel Sils er a Kerrekeriil e a Dios a mo beot el oukerrekeriil er a re chad er a Sodom ma Gomora e mo meringel el oukerrekeriil er a re chad er isel beluu! 16“Ka morrenges! Ak uldurech er kemiu el ua sib el mor a delongelel a lbolb. Me ng kiriu el mo kerekikl el ua bersoech e medemedemek el ua belochel. 17Kom mo klekar, ele te mor ngii a re chad el mo omdechem er kemiu e obekemiu el mor a kerrekeriil, e mo mengelebed er kemiu er a blil ongdibel. 18Ng ngak a uchul e kom mo mengai el mo mukerrekeriil er mederir a re merreder ma re king, me kom mo ouchais er a Ebangkelio er tir ma re Chisentael. 19Sel bo mengai el mor a kerrekeriil e lak bo le sebek a rengmiu er a ikel bo molekoi ma lechub e le sebek a rengmiu el kmo ng mekera cho bo mongedecheduch; ele sel bo le belsechel, e ng ekor kemiu a ikel bo molekoi. 20A tekoi el bo molekoi a diak le tekingiu; a Reng er a Demmiu a mo melekoi el okiu kemiu. 21“A re chad a mo oltutakl er a re bebil er tir el kirel a kodall, ma ruungalek me te mo ua isei er a re ngelekir; e a re ngalek a mo omtok er a re demerir ma re derrir e mo otuteklterir el kirel a kodall. 22A re bek el chad a mo ouketui er kemiu el ngak a uchul. E ngdi ngikel outekangel el mor a ulebongel a mo suobel. 23Sel loldechelakl er kemiu er a tar a beluu, e mchiis el mor a tang. Ak meral subedemiu el kmo ng diak bo mrekui a ureriu er a beluu er a Israel el rokui er uchei er a le mei a Ngelekel a Chad. 24“Ng diak a ngalek er a skuul el ngarbab er a sensei er ngii; ma diak a sibai el ngarbab er a mastang er ngii. 25Ma ngalek er a skuul a kirel el ungil a rengul a bocha le ua sensei er ngii, ma sibai a ungil a rengul a bocha le ua mastang er ngii. Ma lsekum a bdelul a blai a lomekedong er ngii el Beelsebul, e a re chad er a blai a bo lomekedong er tir er a lmuut el mekngit el ngakl! 26“Me lak kom medakt er a re chad. A ikel delekedokel er chelechang a mo mocholt, ma rokui el berrotel a di bo dodengei. 27A kulekoi er kemiu er a milkolk a kiriu el mo omelekl el melekoi a le sueleb a sils, ma cho ble mileakl el orrenges el tekoi a kiriu el mo ouchais el ngar a chetebtel a blai. 28Lak kom medakt er tirkel omekoad er kemiu e diak el sebechir el mekodir a reng; bai bo medakt er a Dios el ngikel sebechel el okngemedemiu kemiu ma reng er kemiu er a beluu er a ngau. 29A di chimol sens a sebechiu el nguu el mechar a teblol chesisebangiau, e ngdi diak a tal chesisebangiau el ruebet er a chutem a lak le kengei a Demmiu. 30E kemiu a mo lmuut er a chui er a bdelmiu me ng medengei a ildisel a Dios. 31Ma le ua isei e lak kom medakt; kemiu a lmuut el ngar uchei er a rengul a Dios er a betok el chesisebangiau! 32“A le ngar ngii a chad el ouchais er a re chad el kmo ng chedak, e ak dirrek el mo ochotii er medal a Demak el ngar a eanged. 33Ngdi ngikel diak lolecholt er ngak er a re chad, a diak bo kulecholt er ngii er medal a Demak el ngar a eanged. 34“Lak momdasu el kmo ak uleba budech el mer a beluulchad. Ng dimlak kmei el oba budech, e ak bai mlei el oba saider. 35Ak mlei ma re ngalek el sechal bo lomtok er a re demerir, ma re ngalek el redil bo lomtok er a re derrir, ma re buchelsechal bo lomtok er a re derrir a re becherir; 36a re mo kot el mekngit el cherrouel a tal chad a re chad er a blil. 37“Ngikel betik a rengul er a demal ma lechub e ng delal el kuk ngar uchei er ngak a diak lungil el mo obengkek; me ngikel betik a rengul er a ngelekel el sechal ma lechub e ng ngelekel el redil el kuk ngar uchei er ngak a diak lungil el mo obengkek. 38Ngikel diak le nguu a kerus er ngii el oltirakl a blekeklek a diak lungil el obengkek. 39Ngikel melasem el olsobel er a klengar er ngii a mo metom er ngii; ngdi ngikel choitii a klengar er ngii el ngak a uchul a mo osebelii. 40“Ngikel ungil er a rengul el ngoikemiu a ngoikak; e ngikel ungil er a rengul el ngoikak a nguu ngikel ulderchak. 41Ngikel ungil er a rengul el nguu a mesiungel a Dios, ele ngii el mesiungel a Dios a mo nguu a ruklel er omeksullel a mesiungel a Dios. Me ngikel ungil er a rengul el nguu a ungil chad ele ngii el ungil chad, a mo nguu a ruklel er omeksullel a ungil chad. 42Bo modengei el kmo a ngii di le chad el msa tar a kot el ngar iou er tirkal obengkek a di tal kob el mekelekolt el ralm ele uchul e ngii el tar a rubengkek, a ulterekokl el mo nguu omeksullel.”

will be added

X\