MARKUS 8

1Ng dimlak le meketeket e a tar a klou el seked a mlo mekideb, ma bocha lak a kelel ngii el seked e a Jesus a milkedongeterir a rubengkel el mor ngii e dilu er tir el kmo, 2“Ak chubur tial seked ele ng mla mo edei el klebesei er a lobengkek e diak a kelir. 3A di le sengerenger e bo lerei, e ng mekngit a bo le mechitechut a bedengir er a melengel a rael, ele te ngar ngii er tir a mlar a cheroid el beluu el mei.” 4Ma rubengkel a ulenger er ngii el kmo, “Cholebo e kede mekerang e metik a kall el mo sebechir tirkal chad el rokui er tial diak a re chad er ngii el beluu?” 5Ma Jesus a uleker er tir el kmo, “Ng telal blauang cho molab?” Me tulenger er ngii el kmo, “Ng kleuid.” 6Ma Jesus a dilu er a re chad me te mo dengchokl er a chutem. E sola e ng ngilai a ikel kleuid el blauang el mei e mirreng a sulel a Dios e milached, e mesterir a rubengkel me te merous er a re chad. 7E dirrek el mlar ngii erul mekekerel ngikel. Ma Jesus a dirrek el mirreng a sulel a Dios el kirel ngii el ngikel, e dilu er a rubengkel me te remous er a re chad. 8Ma re chad a ulemengur el mo medinges, e mlo oumeder, ma der a le siluk el mo mui a euid el sualo. 9E a ildisir a re chad el ulemengur a mle bekord 4,000. Ma bocha le merek e a Jesus a silmesmecheterir. 10E ngii ma rubengkel a mlo doiderekl er a bos e mlor a beluu er a Dalmanutha. 11A re bebil er a re Farisi a mler a Jesus e outitekangel er ngii. Ng mle sorir el omedikl er ngii me tullengit er ngii me le rellii a tar a klou el ongasireng el tekoi el ochotii el kmo a Dios olab el mor ngii. 12Ma Jesus a ultuu a telil e dilu el kmo, “Ngera ma re chad er chelechang a osiik a mengasireng el tekoi? Ak meral dmu er kemiu el kmo ng diak ongasireng el meruul el mor tir!” 13Me ng mlo doiderekl er a bos e choititerir e merael el mo imuul er a bital daob. 14Ma rubengkel a Jesus, a ulebes el ngmai a ungil a ildisel el blauang er a lorael; ng di mle chimo el blauang a lulebang er a bos. 15Ma Jesus a ulemeklatk er tir el kmo, “Bo mkerekikl el mengkar er kemiu er a omkukel a blauang er a re Farisi ma Herodes.” 16Me te kakerker er a delongelir el kmo, “Kele kid el dimlak de ngai a blauang me ng melekoi el ua isei.” 17Ma Jesus a mle medengei a lulsaod me ng dilu er tir el kmo, “Ngera me kom mesaod a blauang el dimlak mngai? Kemiu ng diak kom modengei e dirkak bo momtab a belkul a ikal tekoi? Ng kmal dirk cheldeng a rengmiu? 18Ngar ngii a medemiu e diak momes? E ngar ngii a dingemiu e diak morrenges? Kom mla obes 19er ser a kumached a ikel kleim el blauang el kirir a re 5,000 el chad? Ng mle telal sualo a mlo mui er a der er ser cho moruu?” Me te dilu el kmo, “Ng truich ma erul sualo.” 20“E ser a kumached a ikel kleuid el blauang el kirir a re 4,000 el chad, e ng mle telal sualo a mlo mui er a der er ser cho moruu?” Me te dilu el kmo, “Ng kleuid.” 21Me ng uleker er tir el kmo, “E dirrek el dirkak bo momtab a belkul a ikal tekoi?” 22Ma le mermang a Jesus ma rubengkel er a Bethsaida, e te mlar ngii a re chad el uleba tal meiko el chad el mer a Jesus e ullengit er ngii me bo le retechii. 23Ma Jesus a chilteklii a chimal ngii el meiko el chad e nguu el mor a ikrel a beluu e tilub a erebita el medal e milor a chimal er bebul e uleker er ngii el kmo, “Ngar ngii a ngeral mesang?” 24Me ng mlo dmangesbab e dilu el kmo, “Ochoi, ak umes er a re chad el ua kumes a kerrekar el merael.” 25Ma Jesus a luuta el remutech a medal. Tiaikid e ngii el chad a omes el omekikrirech el mocha ungil osengel el mocha bleketakl a ikel le ues. 26Ma Jesus a silmesmechii e dmu er ngii el kmo, “Morael el mor a blim, e kele bo msiseb er a beluu.” 27Ma Jesus ma rubengkel a mirrael el mor a ikel beluu el kmeed er a Sesarea Filipi. Ma le ngar a rael e a Jesus a uleker er tir el kmo, “Ka msbedak el kmo a re chad te kmo ngak ak techang?” 28Me te dilu er ngii el kmo, “A re bebil a kmo kau a Johanes el Chad er a Techolb, ma re bebil a kmo kau a Elias ma re kmo ke tar a re profet.” 29Me ng okere er tir el kmo, “E kemiu a kmo ngak ak techang?” Ma Petrus a ulenger el kmo, “Kau a Mesias.” 30Me ng milengelechel er tir el kmo, “Kele msbedii a di tal chad el kmo ngak ak techang.” 31Me ng mocha omuchel a Jesus el olisechakl er a rubengkel el kmo, “A Ngelekel a Chad a kirel el kmal mo chuarm e te mo mekngit er ngii a re mechuodel, ma re bderrir a re prist ma re sensei er a Llach. Te mo mekodir e ngdi ongedel klebesei e ng mo mekiis er a kodall.” 32Tial tekoi a lesal mileketeklii el mor tir. Ma Petrus a ngiluu a Jesus el mo cheroid e chileklii. 33Ma Jesus a mileltii e omes er a rubengkel, e oungeroel er a Petrus el kmo, “Satan, bor ullek! A uldesuem a dimlak le ngar a Dios el mei, e ng bai mlar a re chad el mei.” 34Ma Jesus a ulemekedong er a seked ma rubengkel el mer ngii e dilu er tir el kmo, “A lsekum ng ngar ngii a soal el obengkek e ng kirel el mo diak lomdasu er a di ngii e cholngii a kerus er ngii e oltirakl er ngak. 35Ele ngikel soal el olsobel er a klengar er ngii oridii; e ngikel oridii a klengar er ngii el kirek ma kirel a Ebangkelio a bai mo osebelii. 36Ngar ngii a lengai a chad a lsekum ng korekerengii a beluulchad el rokir e ngii a mo remiid? Ng kmal diak! 37Ele ng diak a nguked el sebechel a chad el nguu el olutii a klengar er ngii. 38A lsekum ng ngar ngii a chad el merur er ngak ma osisecheklek er chelechal mekngit el beluulchad el diak leko Dios, e a Ngelekel a Chad a mo merur er ngii sel le mei el ngar a klebkellel a Demal el obengterir a re mechedaol el anghel.”

will be added

X\