MARKUS 7

1A re bebil er a re Farisi, tir ma re sensei er a Llach el mlar a Jerusalem el mei a mlor a Jesus. 2Te milseterir a re bebil er a rubengkel a Jesus el omengur el dimlak le klikiid a chimorir, el belkul a kmo, ng dimlak lolebal e mengang. 3(Ele re Farisi ma rokui el chad er a Judea a kmal oltirakl a llecherir el mlar tirkel uchelir er a irechar el mei el lak lolebal e ng diak longang; 4ma ka longang a ikel kall el lengai er a makit el dimerkmo lerisu. E lmuut el ngar ngii a betok el llecherir el lolab er a irechar el mei, el kirel omengerumet el kob, ma ollumel, ma omelatech el olekang, ma omellib el sintsiu el delluchel belatong ma bet.) 5Ma re Farisi ma re sensei er a Llach a okere er a Jesus el kmo, “Ngera ma rubengkem a diak loltirakl a ikal llechud er a rechuodel el mei, e di mengang el diak le klikiid a chimorir?” 6Ma Jesus a dilu er tir el kmo, “Ng kmal meral tekoi a ulochel a Isaia el kiriu el kmo, kemiu a cheblad. Ngdi ua ikel lulluches el kmo: A Dios a dilu el kmo, tirkal chad a di mengull er ngak el olab a tekoi, e a rengrir a kmal cheroid er ngak. 7Ng diak a ultutelel a longull er ngak, ele tolisechakl a llecherir a re chad el ua ia le llechuk!’ 8“Kom mla chemoit a llechul a Dios e olengesenges a osisecheklir a re chad.” 9E liluut el dilu er tir el kmo, “Kom meral medecha el mengoit a llechul a Dios el leko di moltirakl osisechekliu. 10Ele Moses a dilu el kmo, ‘Mongull er a demam ma delam.’ e ‘Ngikel melekoi a mekngit el tekoi er a demal ma lechub a delal a kirel el mor a kodall.’ 11Ngdi kemiu olisechakl el kmo a chad a le ngar ngii a ngerang er ngii el sebechel el ngosuir a demal ma delal el obang, e a ledu el kmo, ‘Tia Korban’ (el belkul a kmo, ng mla modars el mor a Dios), 12e seikid e ng di mo ungilbesul a lak lolengeseu er a demal ma delal. 13A lsekum tial osisechakl cho mulebang er a rechuodel el mei el ua isei, e tia meruul a tekingel a Dios el mo diak a belkul. Ng lmuut el kmal dirk betok el ua ikang cho moruul.” 14Ma Jesus a liluut el omekedong er a seked el mer ngii e dilu er tir el kmo, “Morrenges er ngak el rokui, e momtab a kulekoi. 15Ng diak a ngar a ikrel a chad el mo soiseb er ngii el mekidekelii. Ng bai ikel ngar a chelsel a chad el me tuobed a ikei a mekidekelii. ” 17Ng milechititerir a re chad e mlo tmuu er a blai ma rubengkel a dilu er ngii el kmo msodii a belkul sel tekoi el mullekoi er ngii. 18Ma Jesus a dilu er tir el kmo, “Kemiu kom dirrek el di ua itir el diak modengei el kmo a ikel ngar a ikrel el me soiseb er a chelsel a chad a diak longidokel er ngii. 19Ng diak le bor a rengul, ng bai di mor a delel e tuobed.” (Tia le dillii a Jesus el belkul a kmo a rokui el kall a di klikiid.) 20Ng liluut el melemolem el melekoi er tir el kmo, “Ng bai ikel ngar a chelsel a chad el me tuobed, a ikeikid a mengidokel er a chad. 21Ngar sel kmal chelsel a rengul a chad e ng me tuobed a mekngit el uldasu e choitikikii el mor a deleboes, ma rechorech, ma koadelchad, 22ma laokreng, ma ngelbokl, ma ikel bek el bedengel a mekngit el tekoi, el ua cheleblad, ma klekad, ma chelechei, ma otuub, ma kldidairreng, ma klebelung el tekoi. 23A ikal rokui el mekngit el tekoi a duubech er sel kmal chelsel a rengul a chad el mekidekelii.” 24E sola e a Jesus a mirrael el mor a beluu el kmeed er a Tyre. Ng mlo tmuu er a tal blai e dimlak el soal a re chad a bo lodengei el kmo ng ngar isei, e ngdi dimlak le sebechel el obart. 25Ng mlar ngii a tal redil el mlar ngii a ngelekel el redil el blekall er a mekngit el chelid el rirenges a chisel a Jesus el kmo ng ngar sei, me ng di mle mereched el mong e mo terrob er bitar ochil. 26E ngii el redil a mle Chisentael, el mlechell er a beluu er a Fenisia er a Siria. Ng ullengit er a Jesus me lotebedii a mekngit el chelid er a ngelekel el redil. 27Ma Jesus a ulenger er ngii el kmo, “A kot e a re ngalek a kirir el mokang, ele ng diak le melemalt a de ngai a kelir a re ngalek el midokl er a bilis.” 28Me ngii el redil a ulenger er a Jesus el kmo, “Rubak, ng ua isei, e ngdi bilis a dirrek el ngar eungel a tebel el menga tebetbil a kelir a re ngalek!” 29Ma Jesus a dula er ngii el kmo, “Tial tekoi el bla mdelii a uchul me morael el mo remei e a mekngit el chelid a mla tuobed er a ngelekem!” 30Me ng mirrael el mo remei e miltik er a ngelekel el mechiuaiu er a bet e a mekngit el chelid a mla tuobed er ngii. 31Ma Jesus a liluut el tuobed er a beluu el kmeed er a Tyre e engelakl er a Sidon el mor a daob er a Galilea el uleak a beluu el Truich el Beluu a ngklel. 32E a re bebil er a re chad a mlei el oba tal chad el mechad e bengong, e ullengit er ngii me lomor er a chimal er ngii. 33Ma Jesus a ngiluu ngii el chad el mo cheroid er a seked e ultuu a cheldngelel a chimal er a dingal e millub e rutechii a chural ngii el chad. 34E sola e mlo dmangesbab e otuu a telil e dmu er ngii el chad el kmo, “Efata” el belkul a kmo, “Lobok a dingam!” 35Me ng di mle mereched ngii el chad el mo sebechel el orrenges e mo mimokl a chural me ng mlo sebechel el ungil el melekoi. 36Ma Jesus a milengelechel er a re chad me lak louchais er a re chad er tial tekoi. Ngdi sel lolengit er tir me lak louchais, e tir a bai mengal mo ouchais er ngii el tekoi. 37A rokui el chad el rirengesii tial chais a kmal mlo mechas a rengrir, me te dilu el kmo, “Ng meral di ungil a ikel loruul el tekoi; a re mechad a mocha orrenges, ma re bengong a mocha melekoi!”

will be added

X\