MARKUS 6

1Ma Jesus a tilobed er isei el mor a belual, ma rubengkel a ultirakl er ngii el mong. 2Ma bocha le Ulengull el Sils e ng mlor a blil ongdibel me ng olisechakl. E kmal mle betok a re chad er ngii, me tirkel ulerrenges er ngii a mlo mechas a rengrir, me te dilu el kmo, “A ikal dechal ng ngilai er ker? Ma llemesel a rengul ng mlar ker el mei? E mekera loruul a ongasireng el tekoi? 3Ngika ng diak le ngikel daiksang, el ngelekel a Maria, el tar a Jakobus ma Josef, ma Judas ma Simon? Ma ngar ngii a re tar ngii el redil el kiei er tiang?” Me ng mlo chetirir ngii. 4Ma Jesus a dilu er tir el kmo, “A profet a longull er ngii er a bek el beluu e ngdi belual ma re chedal ma blil a diak.” 5Misei e ng dimlekea le sebechel el meruul ongasireng el ngar isei, ng di ulemor a chimal er a re di mekesai el smecher e ulemekungil er tir. 6E kmal mlo imis el mechas a rengul er tirkal chad el dimlak loumera er ngii. Ma Jesus a mirrael el olisechakl el meliuekl a ikel kmeed el beluu, 7e milekedongeterir a re truich ma terul obengkel el mo kldibel e sola e uldercheterir el merael el dersterung. E milsterir a klisiich el mengedereder a mekngit el chelid 8e dilu er tir el kmo, “Cho morael e kom di olab a skors, e diak molab a blauang ma tet, ma udoud el seluk er a bokket er kemiu. 9Kom oueacher e ngdi diak molab a oidelliu.” 10E dirrek el dilu er tir el kmo, “Sel bor a beluu el le ngikemiu er ngii, e sel blai el bo mkiei er ngii, cho di mkiei er ngii el mo lmuut er sel morolang. 11E a cho mei er a beluu e lak le ngikemiu a re chad er ngii, e diak lorrenges er kemiu, e kom smirs a chebechab er ochemiu e tuobed el merael. Tia mo uleklatk el mor tir el kirel a mekngit el omerellir!” 12Me te tilobed el mo olisechakl me bo lobult a re chad er a kngterir. 13E dirrek el uleltobed a mekngit el chelid, e milengilt er a re betok el smecher el olab a cheluchul olib el omekungil er tir. 14Ma King Herodes a rirenges a ikal tekoi ele ng uleberk a chisel a Jesus er ker me ker. E a re bebil er a re chad a kmo, “Ngika Johanes el Chad er a Techolb el mla lmuut el me chad! Misei a uchul e ng meruul a ngar ngii a klisichel el ongasireng.” 15Ma re bebil a kmo, “Ng Elias.” Ma re kuk bebil a kmo, “Ng profet el ua itirkel mle profet er a irechar.” 16Ma Herodes er a le renges e ng dilu el kmo, “Ngika Johanes el Chad er a Techolb! Ak ngiluu a bdelul, e ng mla lmuut el me chad!” 17Ele Herodes a uldercheterir a re chad el mo mdechemii a Johanes el Chad er a Techolb e rongedii e sukur er a kelebus. A uchul e ng mle ua isei er ngii, a Herodes a mlo bechil a Herodias el mle bechil a tar ngii er a Filip. 18E a Johanes el Chad er a Techolb a di millekoi er a Herodes el kmo, “Ng kmal diak le melemalt el tekoi cho bo bechil a mle bechil a tar kau!” 19Ma Herodias a kmal mlo kesib a rengul er a Johanes me ng mlo soal el mekodir, e ngdi dimlak el sebechel. 20Ele Herodes a mle medakt er a Johanes, ele ng mle medengei el kmo, ng melemalt e chedaol el chad; me ng milengkar er ngii. A bek el lorrenges er a Johanes el mengedecheduch e ng kmal mo ouedikel a rengul e ngdi kmal di mle soal el orrenges er ngii. 21Ngdi ngikal Herodias a kmal mlo ungil a techellel. A Herodes a mirruul er a klou el blengur er a sils er a cherellel el kirir a rokui el ngarbab el chad er a kabelment, ma re ngarbab el soldau ma re mengeteklir a re chad er a Galilea. 22E a ngelekel a Herodias el redil a mle soiseb er a blai el meloik, me ng mlo ungil a rengul a Herodes ma re sechelil. Ma king a dilu er ngii el ekebil el kmo, “Molengit a ikel soam e ak mo meskau.” 23Ng mlo betok el lolsiich er a tekingel el kmo, “A ikel molengit er ngak ak beskau el mo lmuut er a tedobech er a rengedek.” 24Me ng tilobed ngii el ekebil el mo oker er a delal el kmo, “Ng ngera bo kulengit er ngii?” Ma delal a dilu el kmo, “A bdelul a Johanes el Chad er a Techolb.” 25Me ng di mle mereched el mo tmuu el mor a king e olengit el kmo, “Ng soak cho mereched el meskak a bdelul a Johanes el Chad er a Techolb el ngar tial belatong!” 26Ma king a kmal mlo mekngit a rengul, e ngdi dimlak el sebechel el diak le kengei er tial ongit, ele uchul e ng kmal ulelsiich er a telbilel er mederir tirkel rokui el chad el mlar sei. 27Ma king a di mle mereched el oderchii a tar a re mengkerengel el soldau el mo melai er a bdelul a Johanes el mei. Me ng mirrael el mor a kelebus el nguu a bdelul a Johanes; 28e ngiluu el loia er a ongall e nguu el msa ngii el ekebil, me ng ngiluu el mo msa delal. 29Ma le rengesa chisel a rubengkel e te mlo nguu a cheklechel el mo doklii. 30Ma re apostol a liluut el mer a Jesus e uluuchais er ngii a ikel bek el lurruul ma lullisechakl. 31Me ng dilu er tir el kmo, “Mei me doibngid el mor a diak a re chad er ngii e mtelkib el olengull,” ele ng mle betok a re chad el mei ma re merael me ng mlo diak a deledesir el omengur. 32Me te mlar a bos el merael el mor a diak a re chad er ngii. 33Ngdi te betok el chad a milseterir er a lorael e dilengcheterir; me te mlar a bek el beluu el mei e di ulekiu a beluu el remurt el di mla mor sel le bor ngii a Jesus ma rubengkel. 34Ma le kerda Jesus er a bos e losa tial klou el seked, e ng kmal mlo chubteterir, ele te ua ikel diak a mengkerengel el sib. Me ng mocha olisechakl er tir a betok el tekoi. 35Ma bocha le kebesengei e a rubengkel a mler ngii e dilu el kmo, “Ng kor a kmal kebesengei kung e diak a delengchokl er tiang. 36Bai mei me mdu er a re chad me lorael el mor a ikel beluu ma sers el kmeed er tiang me di le tir el omechar a kelir.” 37Ngdi Jesus a ulenger er tir el kmo, “Kemiu besterir a kelir.” Me te dilu er ngii el kmo, “Ng soam a kimorael el mo omechar a blauang el kirel a 200 el silber el udoud el mo omeka er tirkal chad?” 38Ma Jesus a uleker er tir el kmo, “Ng telal blauang cho molab? Ka bo momes.” Me te mlong e mlei me te subedii el kmo, “Ng ngar ngii a kleim el blauang ma erul ngikel.” 39Me ng dilu er a rubengkel el kmo, “Momii er a re chad el mo betok el bliongel e mdu er tir me bo le dengchokl er bebul a chemull el bek el chad el kakerous el trukel.” 40Me te mlo dengchokl el blechobech, el derdart ma dersukeim. 41Ma Jesus a ngilai a ikel kleim el blauang ma erul ngikel e mlo dmangesbab el bedul a eanged e mereng a sulel a Dios. E milached a blauang e ngilai el mesterir a rubengkel me tullab el merous er a re chad. E dirrek el mle ua isei er a ikel erul ngikel el ngilai el remous er a re chad. 42Ma rokui el chad a milengang e kmal mlo medinges. 43Ma rubengkel a chiludel a derengel a blauang ma ngikel e milekeek a truich ma erul sualo. 44E a ildisir a re sechal el milengang a ikal kall a mle 5,000. 45Ma Jesus a di mle mereched el dmu er a rubengkel me te mo doiderekl er a bos e merael el ma mor a Bethsaida el ngar a bital daob e ngii a dirk millemesumech er a re chad. 46Ma bla le ngederterir a re chad me lorael, e ng mirrael el mor a rois el mo meluluuch. 47E a bocha le kebesengei e a bos a dirk ngar a belngel a chei, e a Jesus a di mle ngii el tang el ngar a beluu. 48Ng milseterir el kmal mle chuarm el meius el omtok er a mesisiich el eolt. Ng bekord ngar a edei el mo bedul a elolem el klok er a mochu tutau e ng merola el mor tir el mirrael er a bebul a daob el leko ng di imiu er tir. 49Ngdi tir a milsang el merael er bebul a daob ma rengrir a kmo ng deleb me tuleldiu, 50ele te rokui el kmal mlo medakt er a lesang. Me ng di mle mereched el melekoi er tir el kmo, “Bo le klou a rengmiu e ng ngak; lak kom medakt!” 51Ng mlo doiderekl me te dilak el ngar a bos, me ng di mlo chelellakl a eolt. Me te kmal mlo imis el mechas a rengrir, 52ele ng dirkak lutebengii a belkul ser a lomeka er a re 5,000 el sechal, ele ng kmal dirk rrau a rengrir. 53Ma Jesus ma rubengkel a di mle mereched el mo imuul er a bital daob el mor a Genesaret, me te milekur a bos er tir. 54Ma le kerda er a bos, e a re chad a kmal di mle mereched el dongchii a Jesus, 55me te rirurt el mor a ikel kmeed el beluu el rokui el melai er a re smecher el di ngar a dukllir e ngilititerir el mor a ikel beluu el le rirenges el kmo a Jesus a ngar ngii. 56E a ikel le blar ngii a Jesus el beluu ma lechub e ng sers, a re chad er ngii a ngilititerir a re smecher el mor a blil a makit e ullengit er a Jesus me di bo le sebechir el rutechii a rsel a bilel kung. Me tirkel rirtechii a rokui el di mlo ungil.

will be added

X\